بۇل تۋرالى 16 شىلدەدەگى بريفينگتە ەلدىڭ ۆيتسە-پرەمەرى ايدا سمايلوۆا مالىمدەدى.
سمايلوۆانىڭ سوزىنشە جاقىن ارادا دەنساۋلىق ساقتاۋ مينيسترلىگى COVID-19 جونىندەگى ۇلتتىق كلينيكالىق نۇسقاۋلىقتىڭ ءۇشىنشى نۇسقاسىن شىعارعان.
"[نۇسقاۋلىق] ستاتسيونارلىق جانە امبۋلاتوريالىق كومەك كورسەتۋ ءۇشىن ناۋقاستاردى كوروناۆيرۋس ينفەكتسياسىنان، ونىڭ اسقىنعان جاعدايلارىنان، سونىڭ ىشىندە اۋرۋحانادان تىس پنەۆمونيادان ەمدەۋ الگوريتمىنەن تۇرادى. دۇنيەجۇزىلىك دەنساۋلىق ساقتاۋ ۇيىمىنىڭ اۋرۋلاردىڭ حالىقارالىق جىكتەمەسىندە COVID-19 زەرتحانالىق تالداۋ ارقىلى انىقتالاتىن U.07.1 كودىنا دا، زەرتحانادا ناقتىلانبايتىن، بىراق كلينيكالىق بەلگىلەرى نەمەسە رەنتگەن ارقىلى كورىنەتىن U.07.2 كودىنا دا جاتادى. دەنساۋلىق ساقتاۋ مينيسترلىگى اۋرۋحانادان تىس پنەۆمونيانى U.07.2 كودىنا جاتقىزاتىن بۇيرىق شىعاردى. وسىلايشا اۋرۋحانادان تىس پنەۆمونيانىڭ ستاتيستيكالىق جاعدايلارى COVID-19 بولىپ سانالادى" دەدى يسمايلوۆا.
كوروناۆيرۋس ەپيدەمياسى باستالعالى قىرعىزستاندا كوروناۆيرۋستان رەسمي 167 ادام، پنەۆمونيادان 612 ادام قايتىس بولعان. دارىگەرلەردىڭ ايتۋىنشا، پنەۆمونياعا شالدىعۋ جاعدايلارىنىڭ 95 پايىزىندا اۋرۋدىڭ قوزدىرۋشىسى COVID-19 بولىپ وتىر. وسى ۋاقىتقا دەيىن بيلىك COVID-19 ناۋقاستارى مەن پنەۆمونيا ناۋقاستارىن بولەك ساناپ كەلدى.
قىرعىزستان بەلگىلەرى كوروناۆيرۋستىكىنە ۇقسايتىن، بىراق تەست ناتيجەسى تەرىس شىققان پنەۆمونيا جاعدايلارى كۇرت كوبەيگەن ەكى ەلدىڭ ءبىرى. ءدال وسىنداي جاعداي قازاقستاندا دا بايقالىپ وتىر.
قازاقستاندا 2020 جىلدىڭ العاشقى التى ايىندا پنەۆمونياعا شالدىققاندار سانى الدىڭعى جىلدىڭ وسى مەرزىمىمەن سالىستىرعاندا 55,4 پايىزعا ءوسىپ 98 546-عا جەتكەن. تەك 1-8 شىلدە ارالىعىندا پنەۆمونياعا 56 809 ادام شالدىققان. ونىڭ ىشىندە 39 702 جاعدايدا پتر ناتيجەسى تەرىس شىققان، بىراق اۋرۋ بەلگىلەرى كوروناۆيرۋستىكىنە ۇقساعان. بيلىك شىلدە پنەۆمونيادان قايتىس بولعانداردى جۇيەلى تۇردە حابارلاپ وتىرعان جوق. دەگەنمەن دەنساۋلىق ساقتاۋ مينيسترلىگى ماۋسىم ايىندا پنەۆمونيادان 628 ادامنىڭ، 29 ماۋسىم مەن 7 شىلدە ارالىعىندا 453 ادامنىڭ قايتىس بولعانىن حابارلادى. پنەۆمونيانىڭ وسى دەرەكتەرى كوروناۆيرۋس ستاتيستيكاسىنا كىرمەگەن. بيلىك شىلدە ايىندا قانشا ادامنىڭ پنەۆمونيادان قايتىس بولعانىن، 9 شىلدەدەن بەرى قانشا ادامنىڭ پنەۆمونياعا شالدىققانىن ايتپاي وتىر.
رەسمي ستاتيستيكا بويىنشا، قازاقستاندا بارلىعى 65 188 ادامنىڭ كوروناۆيرۋس ينفەكتسياسىن جۇقتىرعانى راستالعان. ونىڭ 39 مىڭنان استامى جازىلىپ شىققان، 396-سى قايتىس بولعان.
Abai.kz
