اتىراۋ وبلىسىنا يمانعالي تاسماعامبەتوۆتىڭ مۇرىندىق بولۋىمەن «ءسابي» قايىرىمدىلىق قورى رەسەيدىڭ استراحان قالاسىنان جەدەل 59 مىڭ دارىلىك پرەپارات جەتكىزدى. بۇل تۋرالى جۋرناليست نۇرعالي نۇرتاي الەۋمەتتىك جەلىدەگى جەكە پاراقشاسىندا جازدى. 

ونىڭ حابارلاۋىنشا، بىرنەشە مىڭ ادامدى امبۋلاتوريالىق ەمدەۋگە ارنالعان ءدارى-دارمەكتىڭ جالپى قۇنى 26 ميلليون 450 مىڭ تەڭگە.

اتالعان مەديتسينالىق كومەكتى تاراتۋعا اتىراۋ قالاسىنداعى يمانعالي مەشىتىنىڭ يمامى، جىلىوي اۋدانىنىڭ جانە ماحامبەت اۋدانىنىڭ يمامى باستاعان ەرىكتى جاندار ارنايى ءتىزىم جاساپ، جەتكىزۋ جۇمىستارىن باستاپ كەتتى. وعان قوسا، وسى مەشىتتەردىڭ ۇيىتقى بولۋىمەن 50 سيىر سويىلىپ، 1400 مۇقتاج جانعا ازىق-تۇلىك رەتىندە تاراتىلعان.

اتىراۋ وبلىسى كوروناۆيرۋس جۇقتىرعاندار سانى وسى ايدا كۇرت وسكەن. وسىنداي ساتتە سوڭعى قىزمەتى رەسەيدەگى توتەنشە جانە وكىلەتتى ەلشىلىكتەن زەينەتكە شىققان يمانعالي نۇرعاليۇلى دا ەلدىڭ ءبىر شەتىنەن شىعىسىپ، كومەك قولىن سوزىپ وتىر.

وعان قوسا 3 جاساندى تىنىس الدىرۋ (يۆل) اپپاراتى بۇگىن جەتكىزىلمەك. تاعى دا اپپاراتتار اكەلۋ جونىندە كەلىسسوزدەر جاسالعان. وڭىردەگى قاجەتتى اۋرۋحانالارعا بەرىلەدى.

سونداي-اق، يمانعالي نۇرعاليۇلى وزگە دە وڭىرلەرگە رەسەيدەن مەديتسينالىق جانە گۋمانيتارلىق كومەكتەردى جەتكىزۋگە كومەك قولىن سوزىپ جاتقان كورىنەدى.

Abai.kz