دجون ليۋيس
بۇگىن اقش-تا 80 جاستان اسقان شاعىندا كونگرەسسمەن دجون ليۋيس قايتىس بولدى. ناعىز اڭىز ادام. بۇكىل عۇمىرىن ازاتتىق، تەڭدىك جانە ادىلدىك يدەياسىنا ارناعان شىنايى كۇرەسكەر.
دجون ليۋيس روزا لۋيزا پاركc پەن مارتين ليۋتەر كينگتى ۇلگى تۇتىپ، ادىلدىك ءۇشىن كۇرەسكەن ازاماتتىق قوزعالىستىڭ قىزمەتىنە بەلسەنە ارالاستى. 1963 جىلى 23 جاسىندا “ۆاشينگتونعا مارشتا” ەڭ جاس سپيكەر رەتىندە ءسوز سويلەپ، “Wake up, America” دەپ امەريكانى ويانۋعا شاقىردى. تالاي رەت اق ءناسىلدى بانديتتەر ساباپ كەتسە دە، تالاي رەت پوليتسەيلەردەن تاياق جەسە دە، تالاي رەت ءولىم اۋزىنان قالسا دا ادىلدىك ءۇشىن بەيبىت كۇرەسىن توقتاتپادى. 1960-1966 جج. ارالىعىندا 40 رەت سوتتالدى.
1987-2020 جج. 33 جىل بويى كونگرەسستە اتلانتا حالقىنىڭ وكىلى بولدى. بارلىق اشىق ءارى ءادىل سايلاۋدا تازا جەڭىسكە جەتتى. 16 رەت ايقىن باسىمدىقپەن (سايلاۋشىلاردىڭ 70%-تەن جوعارى داۋىسىن الىپ، تەك 1994 جىلى 69% داۋىس العان) وكىلدەر پالاتاسىنا قايتا سايلاندى. كونگرەسستە راسيزم مەن ادىلەتسىزدىكپەن زاڭ ارقىلى كۇرەسسە، ومىردە ونەگەلى ءومىر جولى ارقىلى ادامداردىڭ ساناسىن وزگەرتۋ ءۇشىن كۇرەستى.
قازاقتا “ادەمى قارتايا ءبىلۋ دە — ونەر” دەگەن وتە كەرەمەت ءسوز بار. ول ءسوزدىڭ سالماعى ۇزاق ۋاقىت ساياساتتا جۇرگەن ادامدارعا قاتىستى قولدانعاندا ەكى ەسە ارتادى. اتلانت مۇحيتىنىڭ ارعى جاعىنداعى دجون ليۋيس ساياساتقا ادەمى كەلىپ، ادەمى كەتە ءبىلدى. ساياساتتا تازا ويناپ، تازا كۇرەستى. دجون ليۋيستەي تيتان ساياساتكەردىڭ ءومىر جولىن مۇحيتتىڭ بەرگى جاعىندا كوممۋنيزمنىڭ قىزىل جولىمەن كارەرا جاساعان كارليك ساياساتكەر قۇرداستارىمەن سالىستىرۋعا مۇلدەم كەلمەيدى.
RIP, the Legend!
شالقار نۇرسەيىتوۆتىڭ جازباسى
Abai.kz
