ماسكا تاعۋ ءتارتىبىن ساقتاماعانى ءۇشىن جەكە تۇلعالارعا ايىپپۇل سالىنا باستادى. بۇل تۋرالى الماتى قالاسىنىڭ وڭىرلىك كوممۋنيكاتسيالار قىزمەتىنىڭ الاڭىندا وتكەن ونلاين بريفينگ بارىسىندا الماتىنىڭ ناۋرىزباي اۋدانى اكىمىنىڭ ورىنباسارى باعلان داندىباەۆ مالىمدەدى.

قالا تۇرعىندارى اراسىندا اۋىرۋ جاعدايلارىن ازايتۋ ماقساتىندا بارلىق اۋدان اۋماقتارىندا ماسكا تاعۋ ءتارتىبى مەن الەۋمەتتىك قاشىقتىق ساقتاۋ ماڭىزدىلىعى تۋرالى كۇشەيتىلگەن اقپاراتتىق-ءتۇسىندىرۋ جۇمىستارى جۇرگىزىلىپ جاتىر.

قالادا ەپيدەميولوگيالىق جاعدايدىڭ ناشارلاۋىن بولدىرماۋ ءۇشىن قاتاڭ شەكتەۋ شارالارى قابىلدانعانى بەلگىلى، ولاردى بۇزعانى ءۇشىن اكىمشىلىك جاۋاپكەرشىلىك قاراستىرىلعان. وسىعان بايلانىستى الماتىدا كاسىپكەرلىك سۋبەكتىلەرى مەن قالا تۇرعىندارىنىڭ كارانتين شارالارىن، سونىڭ ىشىندە ماسكا تاعۋ تارتىبىنە قاتىستى ءتارتىپ بۇزۋشىلىقتاردى انىقتاۋ بويىنشا مونيتورينگتىك توپتار جۇمىس ىستەيدى.

الماتىنىڭ ناۋرىزباي اۋدانى اكىمىنىڭ ورىنباسارى باعلان داندىباەۆتىڭ ايتۋىنشا، اۋدان اۋماعىندا حالىق تاراپىنان ماسكا تاعۋ ءتارتىبىن بۇزۋشىلاردى انىقتاۋ بويىنشا جۇمىستار بەلسەندى جۇرگىزىلىپ جاتىر.

"بۇگىندە كارانتين رەجيمىن بۇزۋعا قاتىستى 41 اكىمشىلىك ماتەريال تولتىرىلدى. ونىڭ ىشىندە 24 جەكە تۇلعاعا ماسكا كيمەگەندەرى ءۇشىن جانە 14 كاسىپكەرلىك وبەكتىلەرىنە سانيتارلىق نورمالاردى ساقتاماعانى ءۇشىن. جابىق عيماراتتاردىڭ كىرەبەرىس ەسىكتەرى مەن كوشەلەرگە اقپاراتتىق ماتەريالدار ءىلىپ قويعانىمىزعا قاراماستان، ماسكا تاعۋ ءتارتىبىن بۇزاتىن ادامدار بار", - دەدى باعلان داندىباەۆ.

سونداي-اق، ول ماسكا تاعۋ ءتارتىبىن بۇزعاندارى ءۇشىن تۇرعىنداردىڭ ايىپپۇل تولەي باستاعانىن اتاپ ءوتتى.

دەرەككوز: Almaty.tv

Abai.kz