12 تامىزدا سەنات دەپۋتاتتارىنىڭ سايلاۋى وتەدى. الايدا، قازىر بۇل ساياسي ناۋقان تۋرالى كوپ اقپارات جازىلىپ جاتقان جوق. ىندەت ءورشىپ، ەل دە، ەل باسقارۋشىلار دا ابىر-سابىرعا سالىنىپ جاتقان وسى كەزدە ەشكىمنىڭ سايالاۋدى ويلاپ، سارساڭعا ءتۇسىپ جاتپاسى دا تۇسىنىكتى. 

الايدا اقپاراتتىق ناسيحاتى كوروناۆيرۋس پاندەمياسىنىڭ تاساسىندا قالىپ قويعان سەنات سايلاۋى دەيتىن ساياسي پروتسەسس ءبىر ساتكە توقتاعان جوق. ناۋقان جالعاسىپ، كانديداتتار تىركەلىپ جاتىر. سەنات سايلاۋىنا بيۋدجەتتەن قانشا قاراجات ءبولىندى؟ سەناتتا كىمدەر وتىر؟ كىمدەردىڭ دەپۋتاتتىق مەرزىمى اياقتالدى؟ بۇعان دەيىن جازدىق.

بۇگىن بەلگىلى زاڭگەر، قۇقىق قورعاۋشى باقىتجان تورەعوجينا الەۋمەتتىك جەلىدەگى پاراقشاسىندا الداعى سەنات سايلاۋى تۋرالى جازىپتى. تورەعوجينا حانىم ءوز جازباسىندا: «ەلدەگى قوعامدىق-ساياسي ماسەلەلەرگە كەلگەندە ءۇنسىز قالاتىن سەناتورلاردان سۇراۋ بار ما»، دەپتى. اتالعان جازبانى وقىرمان نازارىنا ۇسىنعاندى ءجون كوردىك.

رەداكتسيا

(سۋرەت ازاتتىق سايتىنان الىندى)

باقىتجان تورەعوجينا:

- ءبىز ءبارىمىز قوس بىردەي كارانتينگە تۇسكەنىمىزگە، ادامدار مارقۇم بولىپ جاتقانىنا، ەلدەگى تارتىپسىزدىككە، ءدارى-دارمەكتىڭ جوقتىعىنا، اۋرۋحانالاردا ورىن بولماعانىنا، بارلىق سالانى جەمقورلىق جايلاعانىنا قارسى نارازىلىعىمىزدى بيلىككە ۆيرتۋالدى تۇردە ايتامىز، جازامىز. بىراق، بيلىك ءبىزدىڭ قاسىمىزدا ءجۇر. بۇلار قالاي بولعاندا دا بيلىكتىڭ زاڭ شىعارۋشى سالاسى رەتىندە ەلدەگى جاعدايعا جاۋاپ بەرەتىن دەپۋتاتتار. ولار دا قازىر، باسقالار سياقتى، كوروناۆيرۋس نىساناسىندا.

ءبىز ارقايسىمىز ءىس جۇزىندە ولارمەن بەتپە-بەت تۇرىپ، اينالادا بولىپ جاتقان باسسىزدىقتارعا نە ءۇشىن ۇندەمەيتىندەرىن، نەگە ونى كورمەيتىنىن سۇراي الامىز با؟ ولار قازىر نە ىستەپ جاتىر؟ ولار ەلدى قالاي ساقتايدى؟ 12 تامىزدا كەزەكتى سەنات سايلاۋى.

تومەندە 16 سەناتوردىڭ ءتىزىمى بەرىلگەن. ولاردىڭ 13-ءى سەناتتان كەتەدى، ويتكەنى ولار ءوز كانديداتۋرالارىن جاڭا مەرزىمگە ۇسىنباعان. ال 3 سەناتور س.م.ەرشوۆ، و.ۆ.پەرەپەچينا جانە بەكتاەۆ قايتا سايلاندى. مەندە كوپشىلىككە سۇراق بار: وسى سەناتورلار پاندەميا كەزىندە ەل ازاماتتارى ءۇشىن ءبىر نارسە جاسادى دەگەندى ەستىگەندەرىڭىز بار ما؟

ءبىز ولاردىڭ ءبىرىنشى كارانتين كەزىندە ميتينگىلەر تۋرالى جاڭا زاڭ قابىلداپ، قالاي ۇياتقا قالعاندارىن كوردىك. ويتكەنى ولار «پارلامەنتتىك وپپوزيتسيا» تۋرالى، «سايلاۋ تۋرالى» زاڭدى داريعا نازارباەۆاعا ءبىر سۇراق قويماستان، ءبىراۋىزدان ءۇنسىز قابىلدادى. (مەن دن-نىڭ جانكۇيەرى ەمەسپىن، بىراق زاڭ بار).

مۇنداي «يدەال» سەناتورلار بارلىق ديكتاتورلاردىڭ ارمانى (يرونيا)... ءۇن-ءتۇنسىز وتىرعان ولاردان توسىن مىنەز كۇتىلمەيدى.

ءبىز قر ازاماتى رەتىندە ولاردان سەناتتا نە ىستەگەندەرىن سۇراي الامىز. قانشا دەگەنمەن ولار ءبىر-ءبىر وبلىستىڭ وكىلدەرى عوي. قانشا دەگەنمەن سەناتور اتاعى بۇكىل الەمدە ماقتانىش پەن بەدەلگە يە.

1. راشيت اكىموۆ قايىرجانۇلى، اقمولا وبلىسى،

2. مارات تاعىموۆ مىرزاعاليۇلى، اقتوبە وبلىسى،

3. اڭسار مۇساحانوۆ تۇرسىنقانۇلى، الماتى وبلىسى،

4. سارسەنباي ەڭسەگەنوۆ قۇرمانۇلى، اتىراۋ وبلىسى،

5. سەرگەي پلوتنيكوۆ ۆيكتوروۆيچ، شىعىس قازاقستان وبلىسى،

6. مۇراتباي جولداسباەۆ سماتايۇلى، جامبىل وبلىسى،

7. ەربولات مۇقاەۆ راحمەتۇلى، باتىس قازاقستان وبلىسى،

8. سەرگەي ەرشوۆ ميحايلوۆيچ، سەنات دەپۋتاتى، قاراعاندى وبلىسىنان قايتا سايلانادى،

9. سەرىك بەكتۇرعانوۆ شىڭعىسۇلى، قوستاناي وبلىسى،

10. بەكمىرزا ەلامانوۆ قايىپۇلى، قىزىلوردا وبلىسى،

11. ميحايل بورتنيك ميحايلوۆيچ، ماڭعىستاۋ وبلىسى،

12. مانات كۋبەنوۆ شاراپيدەنوۆيچ، پاۆلودار وبلىسى،

13. ولگا پەرەپەچينا ۆالەنتينوۆنا، سەنات دەپۋتاتى، سقو دان قاي سايلانادى،

14. ءالي بەكتاەۆ ابدىكارىمۇلى، سەنات دەپۋتاتى، تۇركىستان وبلىسىنان قايتا سايلاندى،

15. سەرىك جاقسىبەكوۆ رىسكەلدىۇلى، نۇر-سۇلتان قالاسى،

16. تولەۋبەك مۇقاشەۆ تولەۋۇلى، الماتى قالاسىنان.

P.S. ولار ازاماتتاردىڭ قۇقىعى جايلى ماسەلەلەردى قالاي شەشەدى؟ ولار ءبىزدىڭ قۇقىقتارىمىز بەن پروبلەمالارىمىزدى قاجەت ەتە مە؟ مەن پارلامەنتتىڭ بيلىك تارماعى رەتىندە قوعامداعى ورنى مەن ماڭىزى تۋرالى پىكىر الماسۋدى جالعاستىرا بەرەمىن.

بارلىعى پارلامەنتتىك رەسپۋبليكانى جاقتايدى. بىراق، بىزدەگىلەردىڭ سيقىن قاراڭىز... ەگەر ءبىز ولاردىڭ جۇمىسىنا قازىر باعا بەرىپ، سۇراۋ سالماساق، وندا بۇل باسسىزدىقتار ءالى دە جالعاسا بەرەدى.

باقىتجان تورەعوجينا

Abai.kz