قازاقستانعا قارجى داعدارىسىنىڭ ەكىنشى تولقىنى كەلە جاتىر. قايتپەك كەرەك. قارجى داعدارىسىنا قام-قاراكەتتىڭ باسى رەتىندە قازاقستان بيلىگى پارلامەنت ءماجىلىسىن مەرزىمىنەن بۇرىن تاراتىپ جىبەردى.  ونىڭ جاي-جاپسارىن وتكەندەگى ءبىر سوزىندە ەلباسىمىز دا ايتقان بولاتىن.

قازاقستانعا قارجى داعدارىسىنىڭ ەكىنشى تولقىنى كەلە جاتىر. قايتپەك كەرەك. قارجى داعدارىسىنا قام-قاراكەتتىڭ باسى رەتىندە قازاقستان بيلىگى پارلامەنت ءماجىلىسىن مەرزىمىنەن بۇرىن تاراتىپ جىبەردى.  ونىڭ جاي-جاپسارىن وتكەندەگى ءبىر سوزىندە ەلباسىمىز دا ايتقان بولاتىن.

قازاقستان قارجى داعدارىسىنىڭ ءبىرىنشى تولقىنىن 2008-2009 جىلدارى قارسى الىپ، امان-ەسەن شىعارىپ سالعان-دى. ەستەرىڭىزدە بولسا، سول 2008-ءشى جىلدىڭ باسىندا وكىمەت «قارجى داعدارىسى بىزگە كەلمەيدى، اينالىپ وتەدى» دەگەن. اينالىپ وتپەدى. داعدارىس بانك پەن تۇرعىن ءۇي قۇرىلىسىن تۇرالاتىپ كەتە جازدادى. داعدارىستىڭ كەزىندە بولاتىن كورەسىنى  ۇلەسكەرلەر مەن نەسيەگە «ناسكي ساتىپ كيگەندەر» كوردى. باسپانا ءۇشىن بارىن سالىپ، قۇرىلىسقا قاراجات قۇيعاندار الاياق كومپانيالاردان  اقشاسىن وندىرە الماي ءارى  جايلى پاتەردىڭ قاراسى كوزدەن بۇل-بۇل ۇشىپ اۋىرەگە تۇسكەن. جەكەلەگەن تۇلعالارعا 15-20 پايىز كولەمىندە نەسيە تاراتىپ، پايداعا شاش-ەتەكتەن كەنەلەمىز دەگەن بانكتەر مەملەكەتتتى قارىزعا باتىرىپ اۋپىرىممەن اياققا تۇرعانىن دا ۇمىتا قويماعان شىعارمىز. جانە جادىمىزدا: قارجى داعدارىسى قازاقستاننىڭ قىتايعا قارىزىن 14 ملرد دوللارعا ەسەلەدى. سونداي ءىرى كولەمدە قارجى تارتۋ ءۇشىن ءماسىموۆ ۇكىمەتى سان قۇبىلىپ، ءتىپتى قىتاي ديحاندارىنا قازاق جەرىن جالعا بەرۋدى ۇسىنىپ ءجۇرىپ ايتەۋىر ەكونوميكانى مەڭدەگەن داعدارىس دەرتىنەن داڭ قويىپ جازىلعان سىڭاي تانىتقان. ءسويتىپ «قارجى داعدارىسىنا قارسى ۇكىمەت» اتانعان ءماسىموۆتىڭ قۇزىرىنداعى بۇگىنگى اتقارۋشى بيلىك شۇعىل وتكەن پرەزيدەنت سايلاۋىنان كەيىن دە جىلى ورنىن ساقتاپ قالعان ەدى.

ساراپشىلار ەكىنشى تولقىننىڭ تاعى دا اتالعان سالانى: تۇرعىن ءۇي مەن بانكتى كەپ ۇراتىنى تۋرالى ايتۋدا. بانكتەر بۇرىنعىداي وڭدى-سولدى نەسيە تاراتۋدان قازىر تيىلعان. داعدارىس بانكتەر  ءۇشىن دۇرىس ساباق بولدى. تۇرعىن ءۇي قۇرىلىسى دا كيم، نان سياقتى الپاۋىت كارىستەردىڭ يەلىگىنەن الىنىپ مەملەكەتتىك باقىلاۋعا ءوتتى. تۇرعىن ءۇي قۇرىلىس سەكتورىندا قازىر مەملەكەتتىڭ ۇلەسى باسىم.

حوش دەلىك. الماتىدا ءوتىپ جاتقان بۇگىنگى حالىقارالىق «جىبەك جولى» كونفەرەنتسياسىندا قارجى داعدارىسىنىڭ ەكىنشى تولقىنى تۋرالى ءسوز بولىپ جاتىر. داعدارىس قازاقستاننىڭ مينەرالدى-تابيعي رەسۋرستار ونەركاسىبىنە سالقىنىن تيگىزۋى ابدەن مۇمكىن دەيدى ماماندار. سوندىقتان  قازاق ەكونوميكاسىن مۇناي مەن گازعا تاۋەلدى ەتپەيتىن جولداردى  قاراستىرۋىمىز كەرەك ەكەن.

- مۇنايدىڭ ءبىر بارەللى 80 اقش دوللارى كولەمىندە شەكتەلۋى مۇمكىن، - دەيدى ەكونوميكالىق دامۋ جانە ساۋدا ۆيتسە-ءمينيسترى ءمادينا ابىلقاسىموۆا. - ءبىز ودان تومەن بولاتىن باعانى دا ەسەپكە الىپ وتىرمىز. قازاقستان العاشقى قارجى داعدارىسىنا قارسى ۇلتتىق قوردان 14 ملرد قارجى جۇمساپ تىعىرىقتان شىققان. قورىمىزدا 75 ملرد دوللار بار. بۇنى قارجى داعدارىسىنا قالقان رەتىندە پايدالانامىز.

ابىلقاسىموۆا اپكەمىز وسىلاي دەيدى. ال، قارجى داعادارىسى نە دەيدى ەكەن؟ كۇتەمىز...

«اباي-اقپارات»