بۇل تۋرالى مەملەكەتتىك بەلتا اگەنتتىگى حابارلادى.

جينالىس كەزىندە لۋكاشەنكو قاعازعا جازىلعان بايانداماسىن ءبىر ءسات ىسىرىپ قويىپ، سوڭعى كەزدەرى پرەزيدەنت اكىمشىلىگىنىڭ، ءوزىنىڭ ءباسپاسوز حاتشىسىنىڭ جانە رەسپۋبليكا كەڭەسى توراعاسىنىڭ جۇمىسى تاڭداندىرىپ ءجۇر دەپ مالىمدەدى. ونىڭ پىكىرىنشە، شەنەۋنىكتەر ەلدە جانە الەمدە بولىپ جاتقان وقيعالاردا دۇرىستاپ ءتۇسىندىرۋى ءتيىس.

ء"بىز وسى ەلدىڭ قوجايىنىمىز. مىندەتتەرىڭدى دۇرىستاپ اتقارىڭدار. اتقارا الماساڭدار، سولاي دەپ ايتىڭدار. باسقالارى اتقارادى. ۇكىمەتتە دە، سىرتقى ىستەر مينيسترلىگىندەگى شەنەۋنىكتەردىڭ بارلىعى پرەزيدەنتتىڭ كومانداسىن كۇتەدى. ەلگە قۇرمەتىمىز وسى ما؟ BBC, ازاتتىق [راديوسى]، ازات ەۋروپا جانە باسقالارى، سول سەكىلدى ستريمدەر. بىرجاقتى اقپاراتىن بىلاي قويعاندا، ولار جاپپاي تارتىپسىزدىككە ۇندەپ ءجۇر عوي. بۇعان قالاي شىداپ جۇرسىڭدەر؟ ولاردى وسىندا تىركەۋگە العان سەندەر ەمەس پە؟" - دەپ مالىمدەدى لۋكاشەنكو.

ول سايلاۋ ناۋقانىنىڭ اياقتالعانىن كۇتپەي، شارا قودانۋدى تالاپ ەتتى. "حالىقتى "مايدانعا" شاقىرىپ، ءبىزدىڭ زاڭدى ساقتامايتىن بولسا، ەلدەن شىعارىپ جىبەرىڭدەر", - دەپ مالىمدەدى لۋكاشەنكو.

بەلارۋستە پرەزيدەنت سايلاۋى ناۋقانى ءجۇرىپ جاتىر. الەكساندر لۋكاشەنكو قاتارىنان التىنشى مارتە پرەزيدەنت قىزمەتىن اتقارعىسى كەلەدى. ونىڭ باستى قارسىلاستارى سايلاۋعا جىبەرىلمەدى، كوبىسى قاماۋدا وتىر. ەلدە نارازىلىق اكتسيالارى كوبەيدى. وعان قاتىسقاندار مەن حابار تاراتقان جۋرناليستەردى ۇستاپ جاتىر.

بۇنىڭ الدىندا 200-دەن استام جۋرناليست بيلىكتەن باق وكىلدەرىن قۋدالاۋدى دوعارۋىن تالاپ ەتتى. سايلاۋ ناۋقانى كەزىندەگى ەكى ايدا ونداعان جۋرناليست ۇستالدى، ولاردىڭ اراسىندا ازاتتىق راديوسى بەلارۋس رەداكتسياسىنىڭ قىزمەتكەرلەرى دە بار.

بەلارۋس پرەزيدەنتىن سايلاۋ 9 تامىزدا وتەدى. ورتالىق سايلاۋ كوميسسياسى 14 شىلدەدە پرەزيدەنت قىزمەتىنەن ۇمىتكەرلەردى تىركەدى. ولار: سۆەتلانا تيحانوۆسكايا، اندرەي دميتريەۆ، اننا كانوپاتسكايا، سەرگەي چەرەچەن، الەكساندر لۋكاشەنكو.

Abai.kz