قمدب توراعاسى، باس ءمۇفتي ناۋرىزباي قاجى تاعانۇلى شورناق پەن ساتباەۆتاعى جاعدايعا قاتىستى پىكىر ءبىلدىردى.

«كەشە عانا تاعى دا قابىرعامىزدى قايىستىراتىن، جانىمىزعا باتاتىن جاعدايلار جونىندە ەستىپ قالدىق. ساتباەۆ قالاسىندا بولعان جاعداي، اللا ساقتاسىن. تۇركىستان وبلىسىندا بولعان جاعداي. وسى تۇستا ءبىز بارىنشا سابىرلىق تانىتايىق. ءبىز – قۇقىقتىق مەملەكەتپىز. قىلمىسكەرلەر جازاسىن مىندەتتى تۇردە زاڭ اياسىندا الاتىن بولادى. تەك بۇل كەزدە ءتارتىپ ساقتاماي، بايقاماي ءبىر كىشكەنتەي جاعدايدى ۇلكەنگە اينالدىرىپ المايىق. وسى تۇستا قۇقىق قورعاۋ ورگاندارى دا اشىق قاراپ، حالىققا شىنايى اقپارات بەرسە دەگەن ۇمىتتەمىز», - دەدى ول.

باس ءمۇفتي وسى كۇنگە دەيىن ەلىمىز مەملەكەت باسشىسىمەن بىرىگىپ، قابىلدانعان شەشىمدەرگە بويۇسىنىپ، امان-ەسەن كەلە جاتقانىن ايتتى.

«بۇل جاعدايدان دا وتەمىز. تەك رۋحىمىز بيىك بولسىن. ءوزىمىز بەن وتباسىمىزدىڭ، بالا-شاعامىزدىڭ، اعايىننىڭ اماندىعىن ويلايىق. بۇل كەز دە ارتتا قالادى. وتانىمىزدىڭ ماڭگىلىك بولۋىن اللا ءناسىپ ەتسىن» , - دەدى ول.

Abai.kz