الماتى وبلىسى تالعار اۋدانىنىڭ اكىمى جولان وماروۆ پنەۆمونيادان قايتىس بولدى. بۇل اقپاراتتى اۋدان اكىمشىلىگىنىڭ قىزمەتكەرلەرى راستادى.

- بۇگىن تاڭەرتەڭ اۋدان اكىمى جولان وماروۆ پنەۆمونيادان قايتىس بولدى. جولان ىبىراياقىنۇلى 1979 جىلى تۋعان. تۋىستارى مەن جاقىندارىنا قايعىرا كوڭىل ايتامىز، - دەپ حابارلادى اۋدان اكىمدىگىندەگىلەر.

جولان ىبىراياقىنۇلى وماروۆ 1979 جىلى تۋعان. ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىن زاڭگەر، قازاق ۇلتتىق اگرارلىق ۋنيۆەرسيتەتىن كاداستر باكالاۆرى ماماندىقتارى بويىنشا بىتىرگەن.

ەڭبەك جولىن «كيرزاۆود-1» جشس اتقارۋشى ديرەكتورى بولىپ باستادى. ءار جىلدارى «كيرزاۆود-1» جشس باس ديرەكتورىنىڭ ورىنباسارى، «الماتىجەر عوو» ەمك الماتى فيليالى زاڭ سەكتورىنىڭ مامانى، قاسكەلەڭ جەر-كاداسترلىق فيليالىنىڭ باسشىسى، «الماتىجەر عوو» ەمك ديرەكتورىنىڭ ءبىرىنشى ورىنباسارى، ديرەكتوردىڭ مىندەتىن اتقارۋشى، قازاقستان رەسپۋبليكاسى جەر رەسۋرستارىن باسقارۋ اگەنتتىگىنىڭ «جەر كاداسترى عىلىمي-وندىرىستىك ورتالىعى» شجق رمك الماتى وبلىستىق فيليالى ديرەكتورىنىڭ مىندەتىن اتقارۋشى، الماتى وبلىستىق جەر قاتىناستارى باسقارماسىنىڭ باس مامانى، وبلىستىق تۋريزم باسقارماسىنىڭ ءبولىم باسشىسى قىزمەتتەرىن اتقارعان.

2014 جىلدىڭ تامىز ايىنان باستاپ الماتى وبلىستىق جەر قاتىناستارى باسقارماسىنىڭ باسشىسى بولدى. كەيىن رايىمبەك اۋدانىنىڭ اكىمى بولعان. 2019 جىلدىڭ 13 قىركۇيەگىنەن باستاپ تالعار اۋدانعا باسشىلىق ەتتى.

Abai.kz