دەيۆ برەيلسفورد دەگەن بار. ۇلىبريتانيانىڭ ۆەلوسپورتىندا رەۆوليۋتسيا جاساعان كىسى. ول 2003 جىلى ۆەلوسپورت فەدەراتسياسىنىڭ تىزگىنىن ءوز قولىنا الدى.

اعىلشىنداردىڭ قولىنان ۆەلوسيپەد تەبۋ ەمەس، دوپ تەبۋ عانا كەلەدى دەپ جۇرگەن كەزەڭ. ولار سوناۋ 1908 جىلى وليمپيادادا ۆەلوسپورتتان جالعىز عانا التىن العان. سودان بەرى دىم جوق. تۋر دە فرانستىڭ تاريحىندا دا بىردە-ءبىر رەت مارە سىزىعىن ءبىرىنشى بولىپ كەسىپ كورمەگەن. ءتىپتى اتى بار ۆەلووندىرۋشىلەر «ابىرويىمىزعا نۇقسان كەلەدى» دەپ، اعىلشىنداردىڭ ۆەلوكومانداسىنا ۆەلوسيپەد ساتۋدان باس تارتقان. ودان وتكەن ابىرويسىزدىق بولا ما؟!

وسى تۇستا فەدەراتسياعا دەيۆ برەيلسفورد كەلەدى. ول نە ىستەيدى دەيسىز عوي؟ ونىڭ ستراتەگياسى مىناعان سايادى: جۇمىستى 1% بولسا دا توقتاماي جەتىلدىرىپ وتىرۋ. ءسويتتى دە ءسات سايىن سىنالاپ وزگەرىس ەنگىزە باستادى. ماسەلەن، ۆەلوسيپەدتىڭ ورىندىقتارىن وزگەرتتى. 1% بولسا دا جىلدامدىق ارتتى ما؟ دوڭگەلەكتەر جولعا دۇرىس جابىسۋ ءۇشىن ولاردى سپيرتپەن ءسۇرتتى. تاعى دا 1% جەتىلدى. سپورتشىلاردىڭ بۇلشىق ەتتەرى جاقسى جۇمىس ىستەۋ ءۇشىن ىشىندە ەلەكترجىلىتقىشى بار كيىم تىكتىردى. جىلدامدىققا 1% بولسا دا اسەر ەتتى مە؟ ءتىپتى سپورتشىلار ۆيرۋس جۇقتىرماس ءۇشىن قالاي جۋىنىپ، گيگيەنانى قالاي ساقتاۋعا دەيىن ۇيرەتتى. ونى ۇيرەتۋ ءۇشىن ارنايى مامان جالدادى. ايتپەسە، ءبىر سپورتشى مەزگىلسىز اۋىرىپ قالسا، كوماندانىڭ جالپى كورسەتكىشىنە ويدا جوقتا كەرى اسەر ەتەدى.

سونىمەن نە دەيسىز عوي؟ بەس جىلدان سوڭ 2008 جىلى پەكيندە وتكەن وليمپيادادا بريتاندىقتار تاس جول مەن ترەك جارىسىندا ۇلەستىرىلگەن التىننىڭ 60%-ىن جەڭىپ الدى. سودان سوڭ ءتورت جىلدان كەيىن لوندوندا وتكەن وليمپيادادا 9 وليمپيادا، 7 الەم رەكوردىن جاڭارتتى.

اعىلشىندار 2012-2017 جىلدار ارالىعىندا، التى جىلدىڭ ىشىندە تۋر دە فرانستى بەس رەت جەڭدى.

جالپى، 2007-2017 جىلدارى، ون جىلدا بريتاندىقتار 178 الەمدىك بىرىنشىلىكتە ۆەلوسپورتتا جۇلدە العان. ونىڭ ىشىندە وليمپيادا جانە پاراليمپيادا ويىندارىندا 66 التىن الىپتى.

ءبىر عاسىر تۇرالاعان اعىلشىن ۆەلوسپورتى بەس جىلدا شىڭعا ءبىر-اق شىقتى. رەۆوليۋتسيا ەمەس پە! بىراق بۇل رەۆوليۋتسيا ءبىر كۇندە بولا قالعان جوق. جەتىستىك 1%-دىق ىلگەرلەۋمەن، تابانداپ، ءتىپتى ەلىلەپ كەلدى.

پرەزيدەنتتىڭ جانىنداعى ۇلتتىڭ كەڭەسكە مۇشە بولعانىما 5 اي بولىپتى. وسى ۋاقىت ىشىندە ءبىر رەت وتىرىسى ءوتتى. بىراق نەگىزگى جۇمىس كۇندە ءجۇرىپ جاتىر. كەڭەس مۇشەلەرى قوعامدا بولىپ جاتقان بارلىق جاعداي بويىنشا اقوردانىڭ قۇلاعىن شۋلاتادى. شۋلاتىپ قانا قويمايدى، ماسەلە ناقتى شەشىلگەنشە تابانداپ تۇرىپ الادى. قوعامنىڭ ءۇنى كوبىنە بيلىكتىڭ شەشىمىمەن ۇندەسىپ جاتقانىن كورىپ وتىرمىز. وت پەن سۋدىڭ اراسىندا Karin Erlan جۇرەدى. ەرەكەڭە وڭاي ەمەس. كەڭەستىڭ 44 مۇشەسىمەن جۇمىس ىستەگەننەن 44 قاسقىر باققان وڭاي بولار.

سوڭعى مامىر-ماۋسىم ايلارىندا بىرنەشە اسا ماڭىزدى وزگەرىس بولدى. سونىڭ ءبىرى بەيبىت جينالىستاردى وتكىزۋ حابارلامالىق تارتىپپەن ىسكە اساتىن بولدى. بۇرىن ميتينگ وتكىزۋ ءۇشىن رۇقسات سۇرايتىن، قازىر ۇيىمداستىرۋشىلار تەك حابارلايدى. بۇل، ەندى اسا ماڭىزدى، بىراق وتە قيىن ەنگەن وزگەرىس. سونىمەن بىرگە، ساياسي پارتيانى تىركەۋگە قاجەت مۇشە سانى ەكى ەسەگە ازايدى. ودان بولەك، پارلامەنتتىك وپپوزيتسيا ينستيۋتى ەندى. ساياسي پارتيالارعا ونىڭ بەرەرى كوپ. ەرتەڭ كورەسىزدەر. وعان قوسا، جالا جابۋ قىلمىستىق كودەكستەن الىنىپ، اكىمشىلىك ءىس بولىپ قالدى. قانشا ۋاقىتتان بەرى شۋ بولىپ كەلە جاتقان باپ. ساياسي رەفورمالار بويىنشا ىلگەرىلەۋ بار. ەندى ۆيرۋستان كەيىنگى كەزەڭدە بۇل باعىت الەۋمەتتىك جانە ەكونوميكالىق رەفورمالارمەن جالعاساتىنىنا سەنەمىن.

بايقايمىن، كوپ وزگەرىس قيىن ءجۇرىپ جاتىر. ءبىر جەردەن وقىپ ەدىم: «جەتىستىك – ۆەلوسيپەدپەن تاۋعا شىققان سەكىلدى. قيىن بولسا، دەمەك ىلگەرى كەلە جاتىرسىز». ەڭ باستىسى، 1% وزگەرىس ءسات سايىن ۇزدىكسىز ەنىپ وتىرۋى ءتيىس.

شىڭعىس مۇقاننىڭ جازباسى

Abai.kz