سانكت-پەتەربۋرگتا "يسلام مەملەكەتى" راديكال توبىنا قوسىلۋ ءۇشىن سيرياعا بارۋدى جوسپارلاپ جاتقان تاجىكستاننىڭ جەتى ازاماتى ۇستالعانى جونىندە ارنايى قىزمەتكە سىلتەمە جاساپ، رەسەيلىك بىرقاتار باق جاريالادى.

اقپاراتقا قاراعاندا، سيرياعا كەتەر الدىندا ورتالىق ازيالىق ميگرانتتار كۇش قۇرىلىمدارىنا قول سالىپ جانە "كاپىرلەردى" ءولتىرۋدى كوزدەگەنى ايتىلادى.

بىرنەشە كۇن بۇرىن ماسكەۋدە "تەرراكت ۇيىمداستىرماق بولدى" دەگەن كۇدىكپەن ءبىر تاجىكستاندىق ولتىرىلگەن. ونىڭ 19 جاستاعى وديل كايۋموۆ ەكەنى بەلگىلى بولدى.

تاجىكستاننىڭ ماسكەۋدەگى ەلشىلىگى كايۋموۆتىڭ ءولىمى بويىنشا ورىس بيلىگىنەن ءتۇسىندىرۋدى تالاپ ەتكەنىن ازاتتىققا مالىمدەگەن.

رەسەيدەگى ورتالىق ازيالىق ميگرانتتارمەن جۇمىس ىستەيتىن قۇقىق قورعاۋشىلار كايۋموۆتى ءولتىرۋى كۇش قۇرىلىمدارىنىڭ ەلدەگى نارازىلىق شارالارىن باسقا جاققا بۇرۋ ءۇشىن "ارنايى جۇرگىزگەن وپەراتسياسى" دەپ ەسەپتەيدى.

Abai.kz