قازاقستاندا پاندەميا كەزىندە مەديتسينا سالاسىنداعى ءدارى-دارمەكتەر مەن مەديتسينالىق بۇيىمداردى ساتۋ بويىنشا 869 قۇقىق بۇزۋشىلىق انىقتالعان. بۇل تۋرالى اقوردا مالىمدەدى. 

ەلدە قالىپتاسقان ەپيدەميولوگيالىق احۋال اياسىندا جەكەلەگەن پرەپاراتتارعا جوعارى سۇرانىستى پايدالانا وتىرىپ، نارىقتىڭ جوسىقسىز قاتىسۋشىلارى ءدارى-دارمەكتەردى بولشەك ساۋدادا وتكىزۋ ءۇشىن بەلگىلەنگەن شەكتىك باعالارعا قاراماستان، ولاردى جوعارى باعامەن ساتا باستادى (قايتا ساتۋ).

اعىمداعى جىلدىڭ 5 شىلدەسى مەن 3 تامىزى ارالىعىندا ءدارى-دارمەكتىڭ باعاسىن كوتەرۋدىڭ 522 فاكتىسى انىقتالدى. سونىمەن قاتار، ولاردى زاڭسىز ساتۋ مەن دايىنداۋدىڭ 338 فاكتىسى بەلگىلى بولدى.

ءدارى-دارمەكتەر مەن مەديتسينالىق بۇيىمداردى ساتۋ سالاسىندا بارلىعى 869 قۇقىق بۇزۋشىلىق انىقتالدى، ونىڭ ىشىندە 10 قىلمىستىق جانە 745 اكىمشىلىك قۇقىق بۇزۋشىلىق انىقتالدى.

اتالعان ساننىڭ 742 فاكتىسىن ىشكى ىستەر ورگاندارى، 111-ءىن – ەكونوميكالىق تەرگەۋ قىزمەتى، 14-ءىن – سىبايلاس جەمقورلىققا قارسى قىزمەت جانە 2-ءىن – ۇلتتىق قاۋىپسىزدىك كوميتەتىنىڭ شەكارا قىزمەتى انىقتادى.

مىسالى، ىشكى ىستەر ورگاندارى نۇر-سۇلتان قالاسىنداعى ءدارىحانانىڭ قوسالقى ءۇي-جايىنان ءتۇرلى دارىلەردىڭ 2811 وراماسىن، قۇيۋعا ارنالعان 2650 جۇيەنى، 400 دانا بەتپەردە مەن 15 ليتر انتيسەپتيكتى زاڭسىز ساتۋ فاكتىسىن انىقتادى، ال ءدارىحانانىڭ وزىندە ولار ساتىلماعان.

سىبايلاس جەمقورلىققا قارسى ءىس-قيمىل اگەنتتىگى 7,4 ملن.مەديتسينالىق ماسكانى زاڭسىز ساتۋ فاكتىسى بويىنشا، سونداي-اق، وكپەنى جاساندى جەلدەتۋ اپپاراتتارىن جوعارى باعامەن ساتىپ الۋ كەزىندە بيۋدجەت قاراجاتىن جىمقىرعان قوستاناي جانە قىزىلوردا وبلىستارىنىڭ دەنساۋلىق ساقتاۋ ورگاندارىنىڭ قىزمەتكەرلەرىنە قاتىستى قىلمىستىق ىستەردى تەرگەۋدە.

ەكونوميكالىق تەرگەۋ قىزمەتى جالعان دارىلىك زاتتار مەن مەديتسينالىق ماقساتتاعى بۇيىمداردى باسقا تاۋار بەلگىسىن پايدالانا وتىرىپ، زاڭسىز ءوندىرىستى جولعا قويعان الماتى قالاسىنىڭ ءۇش تۇرعىنىنا قاتىستى قىلمىستىق ءىس قوزعادى. 60 مىڭ دانا كونترافاكتىلىك 17 ءتۇرلى ءدارى-دارمەك تاركىلەندى.

بۇدان باسقا، قۇقىق قورعاۋ ورگاندارى ءدارى-دارمەك وندىرۋشىلەر مەن جەتكىزۋشىلەردىڭ اراسىندا باعاعا قاتىستى ءسوز بايلاسۋعا، ولاردى ەمدەۋ مەكەمەلەرىنەن جىمقىرۋعا، گۋمانيتارلىق كومەكتى ساتۋعا جول بەرمەۋ بويىنشا ءىس-شارالار جۇرگىزۋدە.

بۇل رەتتە قۇقىق قورعاۋ ورگاندارىنىڭ وزىندىك قاۋىپسىزدىك بولىمشەلەرىنىڭ جۇمىسى اتالعان ءىس-شارالاردى ورىنداۋ كەزىندە جەكە قۇرام اراسىندا سىبايلاس جەمقورلىق كورىنىستەرىنىڭ الدىن الۋعا جانە ادال كاسىپكەرلەردىڭ قۇقىقتارىن بۇزۋعا جول بەرمەۋگە باعىتتالعان.

جۇرگىزىلىپ جاتقان جۇمىس پەن قىلمىستىق ىستەردى تەرگەۋ قاۋىپسىزدىك كەڭەسى اپپاراتىنىڭ ەرەكشە باقىلاۋىندا.

Abai.kz