قر سىرتقى ىستەر ءمينيسترى مۇحتار تىلەۋبەردى بەيرۋتتا بولعان جارىلىسقا قاتىستى تۇسىنىكتەمە بەردى.

«ليۆانداعى بەيرۋت قالاسىنىڭ پورتىندا بىرنەشە جويقىن جارىلىس بولدى. قالالىق ينفراقۇرىلىمعا زيان كەلدى، ادام شىعىنى بار. جارىلىس تۋرالى اقپاراتتى العاننان كەيىن پرەزيدەنتىمىز قاسىم-جومارت توقاەۆ سىرتقى ىستەر مينيسترلىگىنە ليۆانداعى قازاقستاندىق ازاماتتاردىڭ قاۋىپسىزدىگىن قامتاماسىز ەتۋدى تاپسىردى», - دەلىنگەن قر سىرتقى ىستەر مينيسترلىگىنىڭ پاراقشاسىندا جاريالانعان مۇحتار تىلەۋبەردىنىڭ تۇسىنىكتەمەسىندە.

ونىڭ دەرەگىنشە، قازىرگى ۋاقىتتا قازاقستاننىڭ 113 ازاماتى ليۆاندا كونسۋلدىق ەسەپتە تۇر.

«ديپلوماتتارىمىز ولارمەن بايلانىستا، قازاقستاندىقتاردىڭ اراسىندا زارداپ شەككەندەر جوق. وزدەرىڭىز بىلەتىندەي، ديپلوماتيالىق ميسسيا كەڭسەسىنە دە جارىلىستىڭ زيانى تيگەن بولاتىن. ول الداعى ۋاقىتتا قالپىنا كەلتىرىلەدى. قىزمەتكەرلەرىمىز بەن ولاردىڭ وتباسى مۇشەلەرى زارداپ شەككەن جوق. وزدەرىڭىز بىلەتىندەي، ليۆاندا بۇۇ بىتىمگەرشىلىك كونتينگەنتى بار. ونىڭ قۇرامىنا 120 قازاقستاندىق جاۋىنگەر كىرەدى. قازىر ولاردى روتاتسيالاۋ پروتسەسى ءجۇرىپ جاتىر جانە كۇنى كەشە عانا قازاقستاندىق بىتىمگەرلەر قىزمەت ەتەتىن ورىندارىنا امان-ەسەن جەتتى»، - دەدى مينيستر.

ايتا كەتەيىك، 4 تامىزدا ليۆاننىڭ اسكەري-تەڭىز كۇشتەرى (اتك) بازاسىنا جاقىن بەيرۋت پورتى اۋدانىندا جويقىن جارىلىس بولدى. جارىلىس سالدارىنان قازاقستاننىڭ ءسىم ليۆانداعى ديپلوماتيالىق ميسسياسى عيماراتىنا زيان كەلگەن.

5 تامىز كۇنى جارىلىستىڭ سەبەبى انىقتالدى. بيلىك مالىمدەمەسىنە سايكەس، امموني نيتراتىنىڭ ۇلكەن پارتياسى (اممياك سەليتراسى دەپ تە اتالادى) پورتتا ۇزاق ۋاقىت ساقتالىپ، قاۋىپسىزدىك تالاپتارى ساقتالماعان.

Abai.kz