مەنىڭ كەلەسىدەي بىرنەشە قورقىنىشىم بار. مەملەكەتكە جانە حالىققا قاتىستى. ولار:

1. ەاەس-ءتىڭ كوزدەگەنى ساياسي وداق. ەكونوميكا تەك بەتپەردە عانا. سول ساياسيلانىپ، اقىرى وسى وداقتىڭ شىرماۋىنان شىعا الماي تاۋەلسىزدىكتەن ايىرىلىپ قالمايمىز با دەپ قورقامىن.

2. ودكب دەگەن بىزگە پايداسى جوق، بىراق رەسەي اۆانتيۋراسىنا بولاشاقتا جۇمىس ىستەۋى مۇمكىن اسكەري وداقسىماقتىڭ كەسىرىنەن، بىزگە قاتىسى بولماسا دا ءبىر اسكەري جانجال يا سوعىسقا ىلىگىپ، جاس ساربازدار قان قاساپقا ءتۇسىپ كەتە ما دەپ قورقامىن.

3. قازاقستاننىڭ سىرتقى قارىزى قايتارا المايتىن دەڭگەيگە جەتىپ(قازىر 160 ملردقا جۋىق بولسا دا، اقىرىنداپ قايتارىلۋدا), دە-يۋرە تاۋەلسىز، دە-فاكتو كرەديتورلارعا تاۋەلدى ەلگە اينالىپ كەتەمىز با دەپ قورقامىن. (الدە قازىردەن سولاي ما؟)

4.بيلىكتە رەسەيشىل، قىتايشىل، باتىسشىل، ارابشىل، اقششىلدار ارتىپ (وسىلاردىڭ بىرەۋى), اقىرى قازاقى مۇددە تۇرعىسىنان، ۇلتتىق مۇددە نەگىزىنەن ويلايتىن بيلىك بولماي قالا ما دەپ قورقامىن (قازىر دە مۇندايلار بيلىكتە بار، بىراق بالانس ءالى ساقتالۋدا دەپ سەنەمىن).

5. قازاقستاندا زايىرلىلىق بۇزىلىپ، اتا-بابامىز ۇستانعان تازا يسلام ەمەس، بۇرمالانعان تەرىس ءدىندى ۇستانۋشىلار ارتىپ، قوعامدى جىككە ءبولىپ، سوڭى قانتوگىسكە اينالىپ، اۋعانستان مەن سيريانىڭ، يراك پەن ليۆيانىڭ كەبىن كيىپ كەتەمىز با دەپ قورقامىن.

6. رەسەي "قىرىم ستسەناريى" سياقتى سولتۇستىككە، شىعىسقا كىرىپ، وعان لايىقتى قارسىلىق كورسەتە الماي، عاسىرلار بويى بابالار قانىمەن كەلگەن جەردى قورعاي الماي قالامىز با دەپ قورقامىن.

7. ۇلتتىق ءداستۇردى ۇمىتىپ، تىم باتىسشىل يا باسقاشىل كوزقاراستى ۇستانىپ، ار-ۇيات دەگەننىڭ شەكاراسىنان انىق اتتاپ، قوعامدا ەر ەركەكتىگىنەن، ايەل نازىكتىگىنەن ايىرىلعان "كوگىلدىر ەلدەر" ىشىنە كىرىپ كەتەمىز با دەپ قورقامىن.

8. اباي سويلەپ، اقان ءان ايتىپ، ابىلاي بۇيرىق بەرگەن، "الاش وردا" زيالىلارى حات جازعان قازاق ءتىلىن لايىقتى تۇعىرىنا قوندىرا الماي، دوسقا كۇلكى، دۇشپانعا ماڭگى تابا، ال بابالار الدىندا قارابەت بولىپ وتەمىز با دەپ قورقامىن.

9. قازاقستان ەكونوميكاسى شيكىزاتتىق قاقپاننان شىعا الماي، ەكونوميكانى ءارتاراپتاندىرۋ ءسوز جۇزىندە قالىپ، ءتۇبى ءىلىنىپ-سالىنعاندار قاتارىنان وزىپ شىقپايمىز با دەپ قورقامىن.

10. عىلىم-بىلىمنەن ادا قالعان، الەم مەن ادامزات دامۋىنا ۇلەس قوسپايتىن، ساتۋشى ەمەس ساتىپ الۋشى قوعام كەيپىن ماڭگى ساقتاپ، الەم تانيتىن بىردە ءبىر برەندىمىز بولماي ما دەپ قورقامىن.

11. ساياسي جانە ەكونوميكالىق رەفورمالارعا تىم كەش قالىپ قويعان جوقپىز با؟ جەمقورلىق پەن پاراقورلىقتى ءومىر زاڭدىلىعى دەپ قابىلداپ، ساناعا بايلاپ، قانعا ابدەن ءسىڭىرىپ جىبەرگەن ادەتتى جويا المايمىز با دەپ، دامۋ مەن وزگەرىسكە كەرەك ۋاقىتتى جوعالتىپ الدىق پا دەپ قورقامىن.

13. وسى قورقىنىشتارىم ىسكە اسىپ كەتە ما دەپ قورقامىن.

پىسى: بالا-شاعاڭ بار كەزدە، ەل ءۇشىن الاڭداۋىڭ ارتا باستايدى. ءتىپتى جاس بولساڭ دا. ويتكەنى سول ەلدە ەرتەڭ ۇرپاعىڭ تۇرادى. ال ول ۇرپاق قانداي قوعامدا ءومىر سۇرەدى؟ بەيبىت ءارى دامىعان ەلدە ما، الدە وق داۋسىمەن تاڭدى اتىراتىن، مەشەۋ قالعان مەملەكەتتە ما؟ ەۆرەي ويشىلى ايتقانداي "باسىڭداعى قارا بۇلتتى كەتىرگىڭ كەلسە، اشىق اسپان جاققا قونىس اۋدار" دەگەندەي، بۇلىڭعىر بولاشاقتان قاشىپ، ۇرپاعىمىزدى شەتەل اسىرىپ جىبەرۋگە ءماجبۇر بولماساق بولعانى. ال وندا ول ءسوزسىز ءوزىنىڭ كىم ەكەنىن ءبىراز ۋاقىت وتكەن سوڭ ۇمىتادى. بىرەۋگە بۇل مۇمكىن ماڭىزدى ەمەس شىعار، بىراق ماعان ماڭىزدى. ءار كۇن سايىن تاريحي ءبىر ماقالا وقىماسام باسىم اۋىراتىن مەن ءۇشىن، ۇرپاعىمنىڭ كىم ەكەنىن ۇمىتپاۋى ماڭىزدى. ونىڭ عىلىم مەن ءبىلىمدى يگەرگەن، وركەنيەتكە ۇلەس قوساتىن ەلدە تۇراتىن، جۇرەگىندە ات تۇياعىنىڭ ءدۇرسىلى بار، ال اۋزىندا باباسى سويلەگەن ءتىلى سايراپ تۇرعان قوعامدا ءومىر سۇرگەنىن قالايمىن، ارماندايمىن. بيلىكتىڭ قازىرگى قابىلداۋعا ءتيىس شەشىمدەرى، بىزدە قانداي بولاشاق بولاتىنىن ايقىندايدى. سوعان جاقىنداپ قالدىق-اۋ.

اسحات قاسەنعاليدىڭ جازباسى

Abai.kz