«قازاقكونتسەرت» ۇيىمى ەل تاريحىنداعى ايتۋلى مەرەكە – اباي كۇنىنە وراي بارشا ونەر سۇيەر قاۋىمعا ەرەكشە توسىن سىي جاساماق.

ەل رۋحانياتى ءۇشىن ايرىقشا مەرەكەگە وراي، 10 تامىز كۇنى ساعات 21:00-دە قازاقكونتسەرتتىڭ YouTube ارناسىندا «اباي ارمانى» اتتى كونتسەرتتىڭ ونلاين كورسەتىلىمى وتەدى. ونلاين كونتسەرتتە بەلگىلى انشىلەر، قازاقستاننىڭ ەڭبەك سىڭىرگەن قايراتكەرلەرى بيبىگۇل جانۇزاق، ازامات جىلتىركوزوۆ، مەدەت شوتاباەۆ، ەرلان رىسقالي، ارداق بالاجانوۆا جانە حالىقارالىق بايقاۋلاردىڭ لاۋرەاتتارى اسقار مۇقيات، اياۋلىم قاماجان ونەر كورسەتەدى. بارشاعا قولجەتىمدى ونلاين فورماتتا وتەتىن مەرەكەلىك كونتسەرتتە ابايدىڭ اندەرى مەن ونىڭ ولەڭدەرىنە جازىلعان اندەر ورىندالادى.

«ۇلت رۋحانياتىنىڭ تەمىرقازىعىنا اينالعان ابايدىڭ 175 جىلدىعى اياسىندا «اباي كۇنى» دەگەن اتاۋلى داتانىڭ بەلگىلەنۋى – ءبىز ءۇشىن قۋانىشتى جاڭالىق بولدى. ۇلى ابايدىڭ باي مۋزىكالىق مۇراسىندا ۇلتتىق ونەگە مەن مول تاعىلىم جاتىر. سونداي-اق پوەتيكالىق جانە كومپوزيتورلىق تۋىندىلارىمەن قازاق مۋزىكاسىنا جاڭا لەپ اكەلگەن ابايدىڭ ءان مۇراسى ەرەكشە سۇلۋلىعىمەن، كوركەمدىك بايلىعىمەن، اۋەزدىلىگىمەن قۇندى. ابايدىڭ شىعارماشىلىعىنا عانا ءتان وسى قازاقكونتسەرت سوليستەرى ۇسىناتىن جاڭا كونتسەرتتىك باعدارلاما كورىنىس تابادى»، - دەپ ءبولىستى قازاقكونتسەرت باسشىسى جەڭىس سەيدۋللاۇلى.

Abai.kz