Tut.By اگەنتتىگىنىڭ جازۋىنشا، اكتسياعا كەمىندە 60 مىڭ ادام قاتىسقان. "ينتەرفاكستىڭ" حابارلاۋىنشا، جينالعاندار مونۋمەنتتىڭ ءتورت جاعىندا تۇرعان. حالىقتىڭ قولىندا اق-قىزىل-اق جالاۋ، گۇلدەر مەن شارلار بولعان.
داۋىستى قايتا ساناۋدى تالاپ ەتكەن جانە قۇقىق قورعاۋ ورگاندارىنىڭ زورلىق-زومبىلىعىنا قارسى اكتسيالار مينسكىدەن وزگە دە ۆيتەبسك، گومەل، گرودنو، شكلوۆ، بارانوۆيچي قالالارىندا ءوتتى. قارسىلىق بىلدىرۋشىلەردى قولداۋ ماقساتىندا ۋكراينا، گەرمانيا، وڭتۇستىك كورەيا جانە مالتادا دا اكتسيا ءوتتى. پراگا قالاسىندا دا بەلارۋس حالقىن قولداۋ شاراسى بولدى.
بەلارۋس ىشكى ىستەر ءمينيسترى يۋري كاراەۆ جەكسەنبى كۇنى رۇقسات ەتىلمەگەن اكتسيادا 21 جىل بۇرىنعى قايعىلى وقيعانىڭ قايتالانۋى مۇمكىندىگىن ەسكەرتكەن. ول كەزدە "نەميگا" مەتروسىندا 53 ادام قايتىس بولعان. "كەز كەلگەن حالىق كوپ جينالعان توپ – ەكىنشى نەميگا", – دەدى كاراەۆ.
جەكسەنبى كۇنى مينسكىدەگى تاۋەلسىزدىك الاڭىندا دا بيلىكتى جاقتايتىن ميتينگ ءوتتى. رەسمي مالىمەت بويىنشا، وعان 70 مىڭ ادام جينالعان. جينالعانداردىڭ الدىندا ەل پرەزيدەنتى الەكساندر لۋكاشەنكو ءسوز سويلەگەن. ول سوزىندە وپپونەنتتەرىن ايىپتاعان. "سىزدەر قاتىگەزدىك تانىتتىڭدار، ونى تۋعىزعان مەن بە؟ بيلىك پە؟ ول بىزگە كەرەك ەمەس", - دەگەن التىنشى رەت سايلاۋعا تۇسكەن لۋكاشەنكو. ول سايلاۋ قورىتىندىسى بۇرمالانعانىن تەرىسكە شىعاردى.
9 تامىزدان بەرى بەلارۋستىڭ بارلىق قالالارىندا پرەزيدەنت سايلاۋىنىڭ ناتيجەسىنە قارسى نارازىلىق شارالارى ءوتىپ جاتىر. ورتالىق سايلاۋ كوميسسياسى مالىمەتى بويىنشا، لۋكاشەنكو جەڭىسكە جەتكەن. حالىقتى كۇشپەن تاراتۋ كەزىندە جۇزدەگەن حالىق جارالاندى، ءبىر ادام قايتىس بولدى. ەۋروپالىق وداق حالىققا كۇش كورسەتكەنى ءۇشىن ەلدىڭ جوعارى لاۋازىمدى شەنەۋنىكتەرىنە قارسى سانكتسيا سالاتىنىن ەسكەرتتى.
Abai.kz
