جۇما, 20 قىركۇيەك 2024
2426 0 پىكىر 17 تامىز, 2020 ساعات 10:32

وزبەك ۇكىمەتى ستۋدەنتتەر نارازىلىعىنان كەيىن وقۋ باعاسىن تۇسىرۋگە كەلىستى

وزبەكستاننىڭ جوعارى جانە ورتا ءبىلىم بەرۋ مينيسترلىگى مەن قارجى مينيسترلىگى ستۋدەنتتەر نارازىلىعىنان كەيىن كۇندىزگى بولىمدە وقيتىنداردىڭ وقۋ اقىسىن 10 پروتسەنتكە ءتۇسىرۋ تۋرالى شەشىم قابىلدادى.

بۇدان بولەك اكە-شەشەسى جوق، مۇمكىندىگى شەكتەۋلى جاستارعا جانە تۇرمىسى تومەن وتباسىنان شىققان ستۋدەنتتەرگە قارجىلاي كومەك كورسەتىلەتىن بولادى.

ۇكىمەت مالىمەتىنشە، ستۋدەنتتەرگە بەرىلەتىن قارجىلاي كومەكتىڭ مولشەرى 4 ميلليون سۋم (400 دوللار) شاماسىندا.

كوروناۆيرۋس پاندەمياسى تۇسىندا وزبەك ستۋدەنتتەرى Telegram پلاتفورما ارقىلى بىرىگىپ، ۇكىمەتتەن وقۋ اقىسىن ءتۇسىرۋدى تالاپ ەتكەن.

اتاپ ايتقاندا "يوشلارني قўللاب- قۋۆۆاتلاش" Telegram-كانالىندا 120 مىڭعا جۋىق ستۋدەنت ساۋالناماعا قاتىسىپ، ولاردىڭ 91 پايىزى جاڭا وقۋ جىلىندا جوعارى وقۋ ورىندارى وقۋ اقىسىن ءتۇسىرسىن دەگەن تالاپ قويعان.

وتكەن اپتادا 25 جاستاعى يسلامبەك پۋلاتوۆ ازاتتىقتىڭ وزبەك قىزمەتى ارقىلى وزبەكستان ۇكىمەتىنە ۆيدەو ۇندەۋ جاساعان. ول ەلدىڭ جوعارى جانە ورتا ءبىلىم بەرۋ ءمينيسترى ينومجون ماجيدوۆتىڭ وتستاۆكاعا كەتۋىن تالاپ ەتكەن.

وزبەكستاندا جوعارى وقۋ ورنىندا ساباق 2 قىركۇيەكتەن باستالادى. ستۋدەنتتەر ازىرگە ونلاين رەجيمدە وقيدى. ال ءبىرىنشى كۋرس ستۋدەنتتەرى ءۇشىن ساباق 1 قازاندا باستالادى.

Abai.kz

0 پىكىر