ءبىز مۇنى ءوز ازاتتىعىمىزدى اڭساپ، كوشەگە اتويلاپ شىققان البىرت شاعىمىزدا – 1986 جىلدىڭ ايگىلى جەلتوقسانىندا ەستىگەنبىز. ءبىز مۇنى كۇنى كەشە عانا قورداي وقيعاسىندا ەستىگەنبىز. ءالى دە ەستىپ كەلەمىز. توتاليتارلىق جۇيەنىڭ تامىرى تەرەڭگە كەتكەن باسقارۋ ادىسىنەن ارىلمايىنشا، قاراپايىم حالىق داۋىس كوتەرسە بولدى، مىندەتتى تۇردە «بانديت، ماسكۇنەم، ناشاقور» بولىپ شىعا كەلەدى. (ز.كاماليدەنوۆتىڭ سوكپ ورتالىق كوميتەتىنە جازعان قۇپيا حاتىن قاراڭىز. 1987 جىل 6 قاڭتار. جەلتوقساندىقتاردىڭ ارەكەتىنە ول «...ناتسيوناليستيچەسكيە ۆىلازكي حۋليگانستۆۋيۋششيح گرۋپپ مولودەجي...» دەپ باعا بەرىپتى.).

جاڭا عاسىردا سونىڭ جاڭعىرىعى ءالى باسىلماپتى. بەلورۋسسياداعى جاعدايدى كورىپ وتىرمىز. سول باياعى جارتاس! باياعى توتاليتارلىق كوزقاراس! وزگەرمەگەن.

ۇلى جەلتوقساندا رەسەيدەن اكەلىنگەن مۇزداي قارۋلانعان قالىڭ اسكەر، بتر، ورتسوندىرگىش ماشينالار قازاقتاردى قايتا باس كوتەرمەيتىندەي ەتىپ، جايپاپ سالدى. الماتى قالاسىنىڭ 70-رازەزىندە ارنايى تانك پولكى قالانى قورشاپ، ۇرەي تۋعىزىپ تۇردى. كوشەگە قالىڭ اسكەرمەن بىرگە، كوممۋنيستىك بيلىكتىڭ ايتاقتاۋىمەن جۇمىسشى جاساقتارى شىقتى. سونىڭ سالدارىنان مىڭداعان جازىقسىز قازاق جاستارى اۋىر جاراقات الدى. اباقتىعا توعىتىلدى. سوتتالدى. اتىلدى.

بۇگىنگى بەلورۋسسيادا سونداي جاعداي قايتالانباسىن دەپ تىلەيىك! لۋكانىڭ رەسەيدەن كومەك سۇراعانى راس بولسا، ارتى سۇراپىلعا ۇلاسۋى بەك مۇمكىن. لايىم، وتىرىك بولعاي!

وسى ءبىر سىندارلى ساتتەردە بەلارۋستار ناعىز ەر ەكەندىكتەرىن كورسەتۋدە! ىنتىماعى بەرىك، مادەنيەتى بيىك، كوزى اشىق حالىق ەكەندىكتەرىن الەمگە تانىتا ءبىلدى! دەموكراتيانى قولدايتىن بۇكىل الەم جۇرتشىلىعى ولارعا قولداۋ بىلدىرۋدە. سوعان قاراعاندا، ديكتاتورلىق بيلىكتىڭ ساعاتى ساناۋلى قالعان سياقتى...