قازاقستان رەسپۋبليكاسىنىڭ تۇڭعىش پرەزيدەنتى، ەلباسى نۇرسۇلتان ءابىشۇلى نازارباەۆتىڭ باستاماسىمەن «اۋىل - ەل بەسىگى» جوباسى باستالعان بولاتىن. ەلباسى قازاقستان حالىقىنا ارناعان جولداۋلارى مەن ۇندەۋلەرىندە اۋىلدى جەرلەردى دامىتۋدىڭ ماڭىزدىلىعىن ۇنەمى اتاپ وتەتىن.

«اۋىل - ەل بەسىگى» باعدارلاماسى جولعا قويىلعاننان بەرى ەلىمىزدىڭ ءار ايماعىنداعى اۋىلداردىڭ تامىرىنا قان جۇگىرىپ، جاڭاشا كۇەيگە بولەندى. اتالعان باعدارلاما اياسىندا مىڭداعان ۇيلەر سالىنىپ، جولدار جوندەلدى، كوشەلەر جاڭارتىلىپ، تۇرعىن ۇيلەر تۇرعىزىلدى. بۇل جوبا اياسىنداعى جۇمىستار جىل سايىن ەمەس، كۇن سايىن جۇزەگە اسىپ جاتىر.

ءبىز تومەندە «اۋىل-ەل بەسىگى» باعدارلاماسى اياسىندا قولعا الىنعان بىرقاتار يگى شارۋالاردى تانىستىرامىز. تۇركىستان وبلىسى، سارىاعاش اۋدانى قابلانبەك اۋىلدىق وكرۋگىندە بيىلعى جىلى 16 كوشەگە جوندەۋ جۇمىستارى جۇرگىزىلىپ جاتىر. اتاپ ايتقاندا اۋىلداعى 18,8 شاقىرىم جولعا اسفالت توسەلىپ وتىر.
⠀
سارىاعاش اۋدانى اكىمدىگىنىڭ ءباسپاسوز قىزمەتىنىڭ حابارلاۋىنشا، ۇزىندىعى 1200 مەترگە جەتەتىن تاتۋلىق كوشەسى مەن ۇزىندىعى 500 مەتر بولاتىن تولەگەن ايبەرگەنوۆ كوشەلەرىندەگى جول جوندەۋ جۇمىستارى اياقتالۋعا جاقىن. بۇل كوشەلەردىڭ جوندەۋ جۇمىسىنا جاۋاپتى مەردىگەر مەكەمە «DSM SERVICE» جاۋاپكەرشىلىگى شەكتەۋلى سەرىكتەستىگى بولىپ تابىلادى. اتالعان ەكى كوشەدەن وزگە ون ءتورت كوشەنى جوندەۋ جۇمىستارى قىركۇيەك ايىندا اياقتالادى دەپ جوسپارلانىپ وتىر. بۇل كوشەلەردەگى جول قۇرىلىسى اياقتالعان بەتتە پايدالانۋعا بەرىلەتىن بولادى.
⠀
ايتا كەتەيىك، قابلانبەك اۋىلدىق وكرۋگى سارىعاش اۋدانىنىڭ ورتالىعىنان ون شاقىرىم قاشىقتىقتا ورنالاسقان. بۇگىنگى تاڭدا اتالعان اۋىلدىق وكرۋگ اۋماعىنداعى بارلىق كوشەلەردىڭ جالپى ۇزىندىعى ءجۇز ەكى شاقىرىمدى قۇرايدى. مۇنىڭ ىشىندە 39,2 شاقىرىم كوشە جولىنىڭ جاعدايى قاناعاتتانارلىق دەڭگەيدە. بۇل جالپى كوشەنىڭ قىرىق التى پايىزىن قۇرايدى.

جوعارىدا ءبىز ءسوز ەتكەن ون التى كوشەدەگى 18,8 شاقىرىم جول «اۋىل – ەل بەسىگى» باعدارلاماسى اياسىندا الداعى ۋاقىتتا تولىق جوندەۋدەن وتكەننەن كەيىن، اۋىل وكرۋگىندەگى جولداردىڭ قاناعاتتانارلىق دەڭگەيىنىڭ ۇلەسى ەلۋ سەگىز پايىزعا جەتەدى دەپ جوسپارلانىپ وتىر.
⠀
سونىمەن قاتار، جالپى سارىاعاش اۋىندانى بويىنشا 2020 جىلى وتىز ءتورت كوشەگە جاڭادان جوندەۋ جۇمىستارى جۇرگىزىلەتىن بولادى. جوندەۋدەن وتەتىن بۇل كوشەلەردىڭ جالپى ۇزىندىعى 55,2 شاقىرىمدى قۇرايدى دەپ جوسپارلانعان.

اۋىلداردىڭ دامۋى ەل ەكونوميكاسىنىڭ وركەندەپ، ازاماتتاردىڭ جۇمىسپەن تولىقتاي قامتىلىپ، حالىقتىڭ تۇرمىس ورەسىنىڭ وسۋىنە وتە ۇلكەن اسەر ەتەدى. بۇل الدەقاشان دالەلدەنگەن تۇجىرىم. اسىرەسە جەر اۋماعى كەڭ، اۋىلشارۋاشىلىعىن دامىتۋعا قولايلى جاعداي قالىپتاسقان قازاقستاندا اۋىلدى جەرلەردى دامىتۋدىڭ قاجەتتىلىگى جوعارى. سول ءۇشىن دە اۋىل – ەل بەسىگى» باعدارلاماسىنىڭ ماڭىزى زور.

Abai.kz