ايماقتار ءۇشىن بيىلعى جىل وڭايعا تۇسكەن جوق. الايدا تۋىنداعان توتەنشە جاعدايلارعا قاراماستان قاراعاندى وبلىسى الەۋمەتتىك-ەكونوميكالىق كورسەتكىشتەر بويىنشا تۇراقتى تۇردە دامىپ كەلەدى. «ۆرەميا» گازەتىنە بەرگەن سۇحباتىندا ءوڭىر باسشىسى جەڭىس قاسىمبەك بۇل وسىمگە قالاي قول جەتكىزىلگەنىن جانە وزەكتى ماسەلەلەردى شەشۋ جۇمىستارى قالاي جالعاساتىنىن ايتىپ بەردى.

- جەڭىس ماحمۇتۇلى، داعدارىس ۋاقىتىندا قاراعاندى وبلىسىنىڭ قيىندىقتار الدىندا ءوسىمدى ساقتاپ قالۋىنا نە سەپتەستى؟

- ايماقتىڭ دامۋىنا باعا بەرەتىن ناقتى كورسەتكىشتەر بار. بۇعان ونەركاسىپتىك ءوندىرىس كولەمى، ينۆەستيتسيا، ساۋدا، قۇرىلىس، كولىك قىزمەتى جانە باسقا دا بىرقاتار باعىتتىڭ كورسەتكىشتەرى ەنەدى. ءبىزدىڭ وڭىردە وتكەن جىلمەن سالىستىرعاندا وسى اتالعان بارلىق پوزيتسيا بويىنشا وڭ ديناميكا بار. ەڭ الدىمەن ونەركاسىپ ءوندىرىسى تۋرالى ايتقىم كەلەدى. ونەركاسىپ جالپى ايماقتىڭ ىشكى ءونىمىنىڭ 50 پايىزىن قامتاماسىز ەتەدى. بۇل سالادا وتە تۇراقتى - 2019 جىلدان قاراعاندا شامامەن 103 پايىزدىق ءوسىم بار. ءبىز وسى كورسەتكىشتى جىل سوڭىنا دەيىن ساقتايمىز دەپ جوسپارلاپ وتىرمىز. سونىمەن قاتار وڭدەۋ ونەركاسىبىنىڭ ءوسۋ قارقىنى ءبىزدى ەرەكشە قۋانتادى. وندا 4,5 پايىزدىق پۋنكتتە ءوسىم بايقالادى.

- ال اۋىل شارۋاشىلىعى سالاسىنداعى احۋال قانداي؟

- بيىل ءوڭىر ديقاندارى ميلليون گەكتاردان استام جەرگە ءتۇرلى داقىلداردى، بىراق نەگىزىنەن بيدايدى ەكتى. بۇعان كۇمان كەلتىرگەن ادامدار قاراعاندى وبلىسىندا «مۇنداي كولەمدەگى داقىلداردى ارەڭ سەبۋگە بولاتىن ەدى» دەگەندەي حات جازعان بولاتىن.

الايدا ءبىزدىڭ اۋىل شارۋاشىلىعىنىڭ تاۋارىن وندىرۋشىلەر بۇل جوسپاردى ورىنداپ، ميلليون تونناعا جۋىق ءونىم الدى! سونداي-اق بۇل رەتتە اڭگىمە ساپالى استىق، قىمبات سۇرىپتار تۋرالى بولىپ وتىر. قازىر ونىڭ باعاسى جاقسى، ال ءبىزدىڭ استىق وسىرۋشىلەر ەكسپورت ءۇشىن دە، ىشكى نارىق ءۇشىن دە بەلسەندى جۇمىس جۇرگىزىپ كەلەدى. جالپى ءبىزدىڭ اۋىلشارۋاشىلىعىنىڭ تاۋارىن وندىرۋشىلەرىمىز ىشكى تۇتىنۋشىعا ءتيىمدى شىعىنداردى ۇستاپ وتىر. سول ءۇشىن ولارعا وتە ريزامىن. قازىر ءبىز ولاردان 40 مىڭ تونناعا جۋىق استىقتى جەڭىلدەتىلگەن باعامەن، تونناسىن 75 مىڭ تەڭگەدەن ساتىپ الامىز. بۇل الەۋمەتتىك نان ءۇشىن ارزان ۇن وندىرۋگە مۇمكىندىك بەرەدى.

- ينۆەستيتسيالاردىڭ كولەمى ارتىپ كەلە جاتىر ما؟

- ءبىز وڭىرگە تارتىلاتىن ينۆەستيتسيا دەڭگەيىن ساقتاپ قالدىق. وتكەن جىلى «سارىارقا» گاز قۇبىرىنا 200 ميلليارد تەڭگەدەن استام بيۋدجەتتىك ينۆەستيتسيا تارتىلعان ەدى. ونى ەسەپتەمەگەندە بيىل ءبىزدىڭ ءوڭىردىڭ ينۆەستيتسيا كولەمى شامامەن 700 ميلليارد تەڭگەنى قۇراپ وتىر. ونىڭ - 83 پايىزى جەكەمەنشىك ينۆەستيتسيالار. بۇل باعىتتاعى جۇمىس قاراعاندى وبلىسىنداعى ينۆەستيتسيالىق احۋال تارتىمدى ءارى تۇراقتى ەكەنىن كورسەتەدى. پاندەمياعا قاراماستان بىزگە ءىرى ينۆەستورلار كەلىپ جاتىر. بيىل 12 جاڭا جوبا ىسكە قوسىلادى. جالپى قازىر ايماقتا 2 تريلليون تەڭگەدەن اساتىن 40-تان استام جوبا جۇزەگە اسىرىلۋدا. جالپى ينۆەستيتسيا تۋرالى اڭگىمە قوزعاعاندا ءبىز ءتۇرلى سالالاردى ايتىپ تۇرعانىمىزدى ايتا كەتكىم كەلەدى. مۇندا ماشينا جاساۋ، تاۋ-كەن جابدىقتارىن ءوندىرۋ، فەرروقورىتپالار، بىرقاتار اۋىلشارۋاشىلىق جوبالارى، مىسالى، ءسۇت فەرماسى، ەت وڭدەۋ جانە تاعى باسقا ماڭىزدى سالالار قامتىلۋدا.

- ايتسە دە داعدارىس شاعىن جانە ورتا بيزنەستى شاتقاياقتاتىپ كەتكەن بولار؟

- ارينە، پاندەميا شوب دامۋىنا اسەر ەتكەنىن مويىنداۋىمىز كەرەك. كاسىپكەرلەر بۇرىن-سوڭدى مۇنداي سىناقپەن ەشقاشان بەتپە-بەت كەلىپ كورگەن ەمەس. مەيرامحانالار، كافەلەر، قوعامدىق تاماقتانۋ ورىندارى مەن كينوتەاتر يەلەرىنىڭ، كولىك قىزمەتى مەن ءارتۇرلى ساۋدا سالاسىنداعى ازاماتتاردىڭ الدىندا ۇلكەن قيىندىق تۋىندادى. بىراق مەملەكەت تاراپىنان دا قولداۋ بولعانىن ايتا كەتۋ كەرەك: سالىقتار، ءوسىمپۇلدار بويىنشا تولەمدەردى جىل سوڭىنا دەيىن شەگەرۋ شارالارى قاراستىرىلدى. بانك قارىزدارى مەن كوممۋنالدىق تولەمدەر كەيىنگە قالدىرىلدى. مەملەكەتتىك ورگاندار مەن ۇيىمدار كاسىپكەرلەردەن نىساندى جالعا الۋ بويىنشا اقى المايدى. جەكە پاتەر يەلەرى دە جاعدايدى ەسكەرە وتىرىپ، جالداۋ اقىسىن ازايتتى، كەيبىرى ءتىپتى اقى الۋدان باس تارتتى.

ءبىز كارانتين شەكتەۋى جاعدايىندا بۇل كومپانيالاردىڭ سانيتارلىق نورمالاردى ساقتاي وتىرىپ جۇمىسىن جالعاستىرۋىنا رۇقسات بەرۋگە تىرىسامىز. سونىمەن قاتار، مەن قاراعاندىنىڭ شوب-ى مىقتى بولىپ شىققانىن ەرەكشە اتاپ وتكىم كەلەدى. وسىناۋ قيىن كەزەڭدە كوپتەگەن كاسىپورىندار بالاما شەشىمدەردى تابا ءبىلدى. مىسالى، ءبىز قاشىقتان جۇمىس ىستەۋگە كوشتىك، ال جەتكىزۋ قىزمەتىنە دەگەن سۇرانىس ءتىپتى ارتتى. ەلەكتروندىق ساۋدا بەس ەسە ءوستى. بۇل وتە جاقسى ءۇردىس، ويتكەنى وسىلايشا بيزنەس كولەڭكەدەن شىعادى، قوسىمشا سالىقتار تۇسە باستايدى، ادامداردىڭ جالاقىسى اشىق بولادى.

سونداي-اق، وسى كەزەڭدە ايماقتارعا «جۇمىسپەن قامتۋدىڭ جول كارتاسى»، «اۋىل - ەل بەسىگى»، «ەڭبەك» جانە باسقالارى سياقتى مەملەكەتتىك باعدارلامالار دا كومەكتەسكەنىن اتاپ ءوتۋ كەرەك.

- بۇل رەتتە «جۇمىسپەن قامتۋدىڭ جول كارتاسىنىڭ» كۇردەلى كەزەڭدە كومەگى قانشالىقتى ءتيدى؟ حالىقتى جۇمىسپەن قامتۋ ءۇشىن وسى شارالاردى جالعاستىرعان ءجون بە؟

- «جۇمىسپەن قامتۋدىڭ جول كارتاسى» وسىنداي قيىن كەزەڭدە ازاماتتاردىڭ ناقتى قولداۋدىڭ جارقىن ۇلگىسى دەۋگە ابدەن بولادى. كارتا قىسقا مەرزىمدە تابىسى جوق، جۇمىسسىز قالعانداردىڭ بارلىعىن جۇمىسپەن قامتاماسىز ەتۋگە، سونداي-اق سۇرانىسقا يە ماماندىقتار بويىنشا مامانداردى قايتا دايارلاۋعا مۇمكىندىك بەردى. ادامدار كەز كەلگەن ۋاقىتتا ەلدى مەكەندەر مەن ايماقتار اراسىندا قوزعالا المايتىندىعىنا بايلانىستى، اۋلالاردى اباتتاندىرۋ سياقتى نىسانداردىڭ اياقتالۋ مەرزىمىنە قاتىستى شاعىمدار ءتۇسىپ جاتىر. ايتسە دە بارلىق نىساندار قاراشا ايىندا پايدالانۋعا بەرىلەدى.

باعدارلامانىڭ تيىمدىلىگى مەن جقجك-نىڭ ناقتى قولداۋىن ءتۇسىنىپ، ءبىزدىڭ پرەزيدەنت ۇكىمەتكە جانە ۇلتتىق بانككە باعدارلامانى 2021 جىلعا دەيىن ۇزارتۋدى تاپسىردى.

- پاندەميا الەۋمەتتىك سالالارعا سوققى بەرىپ، كەمشىلىكتەردىڭ بەتىن اشىپ بەرگەنى بەلگىلى. ءبىلىپ وتىرعانىمىزداي، ءبىلىم سالاسى قاشىقتان وقىتۋ جۇيەسىنە دايىن بولماي شىقتى. حالىقتىڭ از قامتىلعان بولىگىنىڭ گادجەت ساتىپ الۋعا شاماسىنىڭ جوقتىعى تاعى بەلگىلى. وعان ەلدەگى كەيبىر وڭىرلەردە ينتەرنەت ساپاسىنىڭ ناشارلىعىن تاعى قوسىڭىز. ءبىلىم سالاسىندا قوردالانعان وسىنداي ماسەلەلەردى شەشە الدىڭىزدار ما؟

- بۇگىنگى تاڭدا وڭىردەگى حالىقتىڭ 90%-ى ينتەرنەتپەن قامتاماسىز ەتىلگەن. ينتەرنەتكە قوسىلماعان، ورتالىقتان الىس ورنالاسقان شاعىن اۋىلداردا شاعىن مەكتەپتەر جۇمىس ىستەپ تۇر. وندا بالالار ءداستۇرلى تۇردە وقىتىلادى. بىراق بۇل فاكتور ولاردى ينتەرنەتسىز قالدىرۋ كەرەك دەگەندى بىلدىرمەيدى. 2021 جىلدىڭ اياعىندا پروۆايدەرلەر بارلىق جەردە جاقسى بايلانىستاردى قامتاماسىز ەتۋى كەرەك.

كوپبالالى جانە الەۋمەتتىك جاعىنان وسال وتباسىلارعا كەلەتىن بولساق، ءبىلىم باسقارماسىنىڭ قاراجاتى ەسەبىنەن ءبىز وسى ساناتتاعى وتباسىلاردىڭ بالالارىنا مودەمدەرمەن قامتاماسىز ەتىلگەن 24 مىڭ كومپيۋتەر مەن نوۋتبۋك ساتىپ الىپ بەردىك. سونىمەن قاتار ءبىز رەسپۋبليكالىق بيۋدجەتتەن تاعى 28 مىڭ جاڭا كومپيۋتەر الدىق. سونىڭ ارقاسىندا قازىر وبلىستا بارلىق مۇقتاج وتباسىلار قاجەتتى قۇرال-جابدىقتارمەن قامتاماسىز ەتىلگەن.

- دەنساۋلىق ساقتاۋ سالاسى دا ەداۋىر سىنعا ۇشىرادى. وتكەن جازدا تىركەلگەن وقيعالارعا جول بەرمەۋ ءۇشىن ايماق دەڭگەيىندە قازىر قانداي شارۋالار اتقارىلىپ جاتىر؟

- الەمنىڭ كوپتەگەن مەملەكەتى بۇل ىندەتكە دايىن بولماي شىقتى. بولىنگەن قارجىنى دەنساۋلىق ساقتاۋ ينفراقۇرىلىمىن نىعايتۋعا پايدالانۋ ءۇشىن ءبىز باسقا سالالارداعى بيۋدجەت شىعىنىن ەداۋىر قىسقارتتىق.

بيىل ءبىز وبلىس بويىنشا 70-كە جۋىق مەديتسينالىق مەكەمەنى جوندەدىك. جەزقازعاندا جاڭا ءمودۋلدى اۋرۋحانا سالدىق، بارلىق جۇقپالى اۋرۋلار اۋرۋحانالارىن رەتكە كەلتىردىك، توموگرافتاردىڭ سانىن كوبەيتتىك، قاراشانىڭ سوڭىنا دەيىن ولاردىڭ سانى 21-گە جەتەدى.

كلينيكالاردا 24 وتتەگى ستانساسى ورناتىلدى، پالاتاعا وتتەگى بەرەتىن جابدىقتار جەتكىزىلۋدە. بىزگە دەنساۋلىق ساقتاۋ مينيسترلىگى وكپەنى جاساندى جەلدەتۋ بويىنشا ۇلكەن قولداۋ كورسەتتى. ولار بۇگىن دە جەتكىلىكتى. وبلىستاعى 40-تان استام اۋرۋحانا پنەۆمونيانى ەمدەۋگە دايىن. جالپى العاندا ءبىزدىڭ اۋرۋحانالارعا بەس مىڭعا دەيىن پاتسيەنتتەردى ورنالاستىرۋ مۇمكىندىگى بار. قاراعاندى وبلىسىندا اۋىر ناۋقاستار نەمەسە وكپەنى جاساندى جەلدەتكىشكە مۇقتاج ناۋقاستاردىڭ قازىر جوقتىعىن اتاپ وتكىم كەلەدى. بۇدان ءبىز قاراعاندىلىقتاردىڭ جاۋاپكەرشىلىك پەن ساقتىقتى سەزىنەتىنىن بايقايمىز. ءبىزدىڭ دارىگەرلەردىڭ بىلىكتىلىگى جەتكىلىكتى ءارى پاندەميامەن كۇرەسۋدە جاقسى تاجىريبەگە يە ەكەنىن اتاپ وتكىم كەلەدى. سونىمەن قاتار قاراعاندىدا العاشقى تولقىن كەزىندە ۇلكەن كومەك كورسەتكەن كەرەمەت مەديتسينالىق ۋنيۆەرسيتەتىمىز بار. جۇمىسقا جوعارعى كۋرس ستۋدەنتتەرى، ينتەرندەر مەن وقىتۋشىلار تارتىلعان ەدى.

- قاراعاندى وبلىسىندا جاڭا تۇرعىن ۇيگە، اسىرەسە كوپبالالى وتباسىلارعا جانە باسقا دا الەۋمەتتىك وسال ازاماتتار تاراپىنان ۇلكەن قاجەتتىلىك بار. ايماقتا قۇرىلىس سەكتورىنىڭ جاندانا تۇسكەنى بايقالادى. بىراق تاياۋ ارادا كەزەكتى ەداۋىر قىسقارتىپ، مۇقتاج وتباسىلاردىڭ بارلىعىنا پاتەر بەرۋ مۇمكىن بە؟

- كەيىنگى كەزدە ءبىزدىڭ وبلىستىڭ تۇرعىندارى اراسىندا جيناعىن استانانىڭ جىلجىمايتىن مۇلىگىنە سالۋ ءۇردىسى بولعان. سوڭعى 3-4 جىلدا ءبىز تەك وبلىس ورتالىعىندا عانا ەمەس، بۇكىل ءوڭىر بويىنشا جاڭا اۋدانداردى سالا باستادىق. وسىعان وراي قازىر تەندەنتسيا وزگەرە باستادى.

وتكەن جىلى وبلىستا جالپى اۋماعى 427 مىڭ شارشى مەتر بولاتىن باسپانالار سالىندى. ال بيىل ءبىز بۇل كورسەتكىشتى شامامەن 600 مىڭ شارشى مەترگە جەتكىزەمىز. 1 800 پاتەردى ءار ءتۇرلى قورلاردىڭ ەسەبىنەن كوپبالالى وتباسىلارعا بەرەمىز. ءىرى كاسىپورىندار دا قولداۋ كورسەتەدى. ماسەلەن، وتكەن اپتادا عانا بالقاشتا «قازاقمىس» كومپانياسى 65 پاتەر ءبولدى. ەكى-ءۇش جىل ىشىندە قۇرىلىس قارقىنى 15-20 پايىزعا وسەدى دەپ جوسپارلاپ وتىرمىز.

- قاراعاندىدا جەكە تۇرعىن ءۇي سالۋعا جەر ۋچاسكەلەرى بەرىلىپ جاتىر. ايتسە دە داعدارىس كەزىندە ەكىنىڭ ءبىرى جەكە جەر ۋچاسكەسىندە قۇرىلىس جۇمىسىن جۇرگىزە الماۋى مۇمكىن عوي...

- ءيا، سوڭعى 7-8 جىل ىشىندە جەكە تۇرعىن ءۇي سالۋ ءۇشىن جەر ۋچاسكەلەرى ءىس جۇزىندە بەرىلمەگەن. سەبەبى بۇعان دەيىن كوپتەگەن ۋچاسكەلەر ينفراقۇرىلىمسىز بەرىلگەن بولاتىن. بۇعان مىسال رەتىندە قاراعاندىداعى «كۇنگەي» شاعىن اۋدانىن الۋعا بولادى. بۇگىنگى كۇنى قاراعاندى قالاسىنىڭ اكىمدىگى جەكە تۇرعىن ءۇي قۇرىلىسى ءۇشىن جەر ۋچاسكەلەرىن ينجەنەرلىك جەلىلەردەن كەيىن عانا بەرۋ ماسەلەسىن ءبىرىنشى ورىنعا قويىپ وتىر.

- قازاقستاننىڭ تۇڭعىش پرەزيدەنتى نۇرسۇلتان نازارباەۆ قاراعاندىنى ميلليون تۇرعىنى بار قالا رەتىندە كورگىسى كەلەتىنىن ايتقان. بۇل ماقساتقا جەتۋ جولىندا ناقتى جوسپارلارىڭىز بار ما؟

- ءىس جۇزىندە، قاراعاندى ىرگەلەس قالالار مەن جاقىن اۋىلداردى ەسەپتەگەندە قازىردىڭ وزىندە 800-900 مىڭ ادام ءومىر سۇرەتىن تۇتاس اگلومەراتسيا. ولاردىڭ كوپشىلىگى 20-30 مينۋتتىق جولدى ءجۇرىپ-اق وبلىس ورتالىعىنا جۇمىسقا بارادى. سوندىقتان ميلليون دەگەنىمىز ۋاقىت تالابى. قالا ءوسىپ كەلەدى، ءبىز كوپ تۇرعىن ءۇي سالىپ، كەلگەن تۇرعىندارعا جاعداي جاساۋىمىز كەرەك.

- الايدا مونوقالالار مەن اۋىلدار تۋرالى ۇمىتۋعا بولمايدى. وبلىستىڭ اۋداندارىندا ساپالى اۋىز سۋمەن قامتاماسىز ەتۋ ماسەلەسى وتكىر تۇر. شەتتە قاراپايىم عانا جاعداي بولماعاننان كەيىن البەتتە جۇرتتىڭ بارلىعى قالاعا قاشاتىنى تاعى تۇسىنىكتى. «اۋىل - ەل بەسىگى» باعدارلاماسى جانە باسقالارى قاڭىراپ جاتقان اۋىلداردى قۇتقارا الا ما؟

- بۇل باعدارلاما بولاشاعى بار جانە تىرەك اۋىلداردى دامىتۋعا ارنالعان. جالپى ادامعا ينفراقۇرىلىم ەمەس، ادام ينفراقۇرىلىمعا باراتىنى بۇكىل الەمگە ءتان ءۇردىس. بىراق 200 ادام تۇراتىن دەيىنگى شاعىن اۋىلدار بار. ول اۋىلداردى ورتالىقتاندىرىلعان سۋمەن جابدىقتاۋدىڭ ءمانى جوق. الايدا ءبىز ونداعى جەرگىلىكتى اۆتونومدى ينفراقۇرىلىمدى قولداۋعا تىرىسامىز.

«اۋىل - ەل بەسىگى»، «نۇرلى جەر»، «جۇمىسپەن قامتۋدىڭ جول كارتاسى» باعدارلامالارى اياسىندا اۋىلدىق ەلدى مەكەندەردىڭ ينجەنەرلىك ينفراقۇرىلىمىنا، ونىڭ ىشىندە ساپالى سۋمەن قامتاماسىز ەتۋگە بايلانىستى كوپتەگەن ماسەلەلەر شەشىلۋدە. «اۋىل - ەل بەسىگى» ارنايى جوباسىنىڭ ەكى جىلىندا سەگىز اۋداننىڭ 16 تىرەك اۋىلىندا 73 جوبا جۇزەگە اسىرىلدى، ونىڭ ىشىندە ساپالى اۋىز سۋمەن قامتاماسىز ەتۋ ىستەرى دە بار.مىسالى، جاڭاارقا اۋدانىنىڭ اتاسۋ اۋىلىندا قازاندىقتار مەن تازارتۋ قۇرىلىمدارىنىڭ قۇرىلىسىن جۇرگىزۋدىڭ ارقاسىندا الەۋمەتتىك نىسانداردا ورتالىقتاندىرىلعان سۋمەن جانە جىلۋمەن قامتاماسىز ەتىلدى، قازاندىقتاردىڭ قۋاتى ارتتى.

بيىل وساكاروۆ اۋدانىنىڭ ەسىل اۋىلىنداعى 25 شاقىرىمدىق سۋ جەلىسىن قايتا جوندەۋ جۇمىستارى اياقتالۋدا. 1500-گە جۋىق تۇرعىن ۇزدىكسىز ساپالى سۋمەن قامتاماسىز ەتىلەدى.

- مەملەكەت باسشىسى قاسىم-جومارت توقاەۆ قىركۇيەك ايىنداعى قازاقستان حالقىنا جولداۋىندا قورشاعان ورتانى قورعاۋعا ەرەكشە نازار اۋداردى. قاراعاندى وبلىسى - وندىرىستىك ايماق، مۇندا قورشاعان ورتانىڭ لاستانۋىنا ناقتى ۇلەس قوساتىن ونەركاسىپ الپاۋىتتارى بار. ولار جاڭا ەكولوگيا كودەكسىنىڭ نورمالارىن قانشالىقتى ساقتايدى دەپ ويلايسىز؟

- 2025 جىلعا قاراي ءىرى كاسىپورىندار زياندى شىعارىندىلاردى 30 پايىزعا تومەندەتەدى دەپ جوسپارلانۋدا. جاڭا كودەكس ولاردى ەكولوگيالىق ەرەجەلەردى ساقتاۋعا شاقىرادى، ايتپەسە ولار شىعارىندىلار ءۇشىن ايىپپۇلدى كوبىرەك تولەيتىن بولادى. بۇل كاسىپورىنداردىڭ باسشىلىعى شىعارىندىلاردى ازايتۋعا مۇددەلى جانە جابدىقتى جاڭارتۋعا قاراجات سالادى. «سارىارقا» گاز قۇبىرىنىڭ قاراعاندىعا قوسىلۋىن ەسكەرە وتىرىپ، كاسىپورىندار ءوندىرىستىڭ ءبىر بولىگىن كومىردەن گازعا كوشىرەدى.

- پرەزيدەنت مەملەكەتتىك قىزمەتتى قايتا جۇكتەپ، مەملەكەتتىك اپپاراتتىڭ شتات سانىن ەداۋىر قىسقارتۋدىڭ ۋاقىتى كەلگەنىن اتاپ ءوتتى. قاراعاندىنىڭ قانشا شەنەۋنىگى جۇمىسسىز قالدى؟

- ازىرگە قىزمەتكەرلەردى قىسقارتۋ تۋرالى اكتىگە قول قويىلعان جوق. ءبىزدىڭ وبلىستا 3,5 مىڭ مەملەكەتتىك قىزمەتكەر جۇمىس ىستەيدى. بيىل ولاردىڭ 10 پايىزى قىقارتىلادى. كەلەسى جىلى - تاعى 15 پايىز. مەملەكەت باسشىسىنىڭ بۇيرىعى ورىندالادى.

- سۇحبات سوڭىندا ايتارىڭىز بار ما؟

- مەن قاراعاندى وبلىسىنىڭ بارلىق تۇرعىنىنا العىس ايتامىن. وسىناۋ قيىن كەزەڭدە ءبىز ءوزىمىزدىڭ ىنتىماقتاستىعىمىزدى جانە جاۋاپكەرشىلىگىمىزدى كورسەتتىك. ەرىكتىلەر ءبىزدىڭ سەنىمدى تىرەگىمىزگە اينالدى. دارىگەرلەر مەن پوليتسيا قىزمەتكەرلەرى وزدەرىنىڭ ادالدىقتارى مەن كاسىبي شەبەرلىكتەرىن تاعى ءبىر رەت دالەلدەۋگە دايىن. وزىڭىزگە جانە جاقىندارىڭىزعا قامقور بولىڭىز.

Abai.kz