ىلە الاتاۋ ۇلتتىق پاركىنىڭ جالپى كولەمى 187,7 گەكتار بولاتىن 35 اۋماعى جەكەمەنشىككە پايدالانۋعا بەرىلەدى.

ۇلتتىق پاركتىڭ رەسمي سايتىندا جاريالانعان قۇجاتقا سايكەس، تۋريستىك جانە رەكرەاتسيا نىساندارىن دامىتۋ ماقساتىندا اتالعان اۋماقتاردى پايدالانۋ ءۇشىن تەندەر جاريالانىپ، كونكۋرس وتەدى. 9 اۋماقتى – 25 جىلعا دەيىن، 26 اۋماقتى 5 جىلعا دەيىن جەكەمەنشىك كومپانيالارعا پايدالانۋعا بەرۋ جوسپارلانىپ وتىر.

ونداعى اقپاراتقا سايكەس، پارك اۋماعىندا تومەندەگىدەي نىساندار سالۋعا باسىمدىق بەرىلەدى:

ۇلكەن الماتى ورمانى اۋماعىنان تاۋ-شاڭعى كۋرورتىن سالۋعا – 140 گەكتار جەر بولىنەدى;

ەكو-قوناق ۇيگە سالۋعا 1.5 گەكتار جەر قاراستىرىلعان;

تۋريستىك ساۋىقتىرۋ كەشەندەرى;

قوعامدىق تاماقتانۋ ورىندارى;

بالالار لاگەرى.

ىلە الاتاۋ ۇلتتىق پاركىنىڭ اۋماعى العاش رەت تەندەرگە قويىلىپ جاتقان جوق. بىلتىر كوكتەم مەن جازدا ىلە الاتاۋى ۇلتتىق پاركىنە تيەسىلى جەردىڭ ءبىر بولىگىنىڭ (بۇل اۋماققا ۇلكەن الماتى كولى، الما-اراسان شاتقالى، اسى ءۇستىرتىنىڭ ۋچاسكەلەرى مەن باسقا دا جەرلەر كىرەدى) جەكەمەنشىك كومپانياعا 49 جىلعا جالعا بەرگەنى بەلگىلى بولعان. ۇلتتىق مەنشىك سانالاتىن اۋماقتى جالعا بەرۋ ەكوبەلسەندىلەر اراسىندا ۇلكەن رەزونانس تۋعىزعان. ىلە الاتاۋى ۇلتتىق پاركىنىڭ ۋچاسكەلەرىن جالعا العان «قۇلتاۋ جانە ك» كومپانياسىنىڭ ارتىندا كىم تۇرعانىن دا ازاتتىق جازعان.

Abai.kz