بىرىككەن ۇلتتار ۇيىمىنىڭ باتىس ساحاراداعى بىتىمگەرلىك ميسسياسىنا قازاقستان قارۋلى كۇشتەرى دە قاتىسىپ جاتقانى بەلگىلى. ولار بۇۇ باقىلاۋىمەن باتىس ساحارادا رەفەرەندۋم وتكىزۋ جونىندەگى ميسسيانى اتقارۋدا. جۋىردا اتالعان بىتىمگەرلىك ميسسياعا قاتىسىپ جاتقان قازاقستان قارۋلى كۇشتەرىنىڭ اسكەريلەرى، وفيتسەرلەرى جاساق قۇرامىن الماستىردى. بۇل تۋرالى «Abai.kz» اقپاراتتىق پورتالى قر قورعانىس مينيسترلىگىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

جاڭا قۇرامدا ءۇش وفيتسەر بار. ولار: پودپولكوۆنيك – ءۋاليحان بايكەنوۆ، پودپولكوۆنيك – ءسابينا مۇرزالينوۆا جانە كاپيتان – داۋرەن سادۋاقاسوۆ.

جاڭا قۇرامداعى وفيتسەرلەر وسىعان دەيىن باتىس ساحارا ميسسياسىندا ءبىر جىلعا جۋىق بىتىمگەرلىك جۇمىستار ورىنداعان پودپولكوۆنيك – ارمان وماروۆ، پودپولكوۆنيك – ەرنار امانيازوۆ پەن كاپيتان ريمما شاكەەۆانى الماستىرعان.

قورعانىس مينيسترلىگىنىڭ ايتۋىنشا، باتىس ساحارا بىتىمگەرلىك ميسسياسىنا جىبەرىلمەس بۇرىن قازاقستاندىق اسكەريلەر تىڭعىلىقتى دايىندىقتان وتكەن. ولار ءبىر ايعا جۋىق سول ەلدەگى جاعدايدى، گەوگرافيالىق لاندشافتارى مەن بىتىمگەرلىك ميسسياسىنىڭ مىندەتتەرى، ەرەكشەلىكتەرىن تۇتاستاي زەرتتەگەن. ەندى قازاقستاندىق اسكەريلەر 30-دان تاستام وزگە مەملەكەتتەردىڭ وكىلدەرىمەن بىرگە بىتىمگەرلىك ميسسيالارىن ورىندايتىن بولادى.

قر قورعانىس مينيسترلىگى ءباسپاسوز قىزمەتى بۇۇ باتىس ساحارا بىتىمگەرلىك ميسسياسىنان قازاقستانعا قايتىپ ورالاتىن وفيتسەرلەردىڭ جۇمىسىنا قاتىستى پىكىر ءبىلدىرىپتى.

«بىتىمگەرلىكتەن ەلگە ورالعان قازاقستاندىق اسكەريلەر ميسسيا جۇمىستارىن جاۋاپكەرشىلىكپەن اتقارىپ، وزدەرىنىڭ جوعارى بىلىكتى مامان ەكەندىكتەرىن كورسەتتى»، - دەيدى قورعانىس مينيسترلىگى.

ناقتىلاپ ايتقاندا، قر قاۋلى كۇشتەرىنىڭ پودپولكوۆينيگى ارمان وماروۆ ميسسيا كەزىندە ۇشۋ قاۋىپسىزدىگى تەحنيكاسى مەن ولاردىڭ جۇمىسىن ۇيلەستىرۋگە جاۋاپتى بولعان. وسى ءبىر جىلعا جۋىق ۋاقىت ىشىندە پودپولكوۆنيك وماروۆ داعدارىستى جاعدايدا كورسەتكەن كاسىبيلىگى مەن باستاماسى ءۇشىن بىتىمگەرلىك ميسسيا قولباسشىسىنان العىس حات العان.

ال پودپولكوۆنيك ەرنار امانيازوۆ بىتىمگەرلىكتەگى سوڭعى جەتى ايعا جۋىق ۋاقىت بويى ميسسيا قولباسشىسىنىڭ لوگيستيكاعا جاۋاپتى اعا اسكەري كەڭەسشىسى قىزمەتىن اتقارعان.

ول ميسسيا كەزىندە بىرنەشە مارتە ماتەريالدىق جانە تەحنيكالىق قامتاماسىز ەتۋ مەن جوسپارلاۋ ىسىنە قاتىسقان. ميسسيا جۇمىسى ءتۇرلى قيىندىقتارعا تاپ بولعاندا، ءوزىنىڭ ۇسىنىس-پىكىرلەرىن ايتىپ وتىرعان. ناتيجەدە بىتىمكەرلىك ميسسيا كوماندالارى امانيازوۆتىڭ ۇسىنىستارىن دۇرىس ءارى نەگىزدى دەپ قابىلداعان.

قازاقستان قارۋلى كۇشتەرىنىڭ تاعى ءبىر ولكىلى، كاپيتان – ريمما شاكەەۆا اسكەر قاتارىنداعى ايەل قىزمەتكەرلەردىڭ ىتىمگەرلىك ميسسياسىنىڭ ءتۇرلى كەزەڭدەرىندە ءھام بارلىق سالالارىندا، ءتىپتى كۇردەلى اسكەري جاعدايلار كەزىندە دە ەر ازاماتتارمەن قاتار دەڭگەيدە قىزمەت اتقارا الاتىنىن جانە ءبىر مارتە دالەلدەگەن.

ريمما شاكەەۆا بۇۇ باتىس ساحارا ميسسياسىنداعى ءوز قىزمەتىن بىتىمگەرلىك بازاسىنىڭ وپەراتورى رەتىندە باستاعان. ناقتىلاپ ايتقاندا، پاترۋلدەردى جوسپارلاۋعا جاۋاپتى بولعان. كەيىن، ميسسيانىڭ باس شتابى جانىنداعى ارنايى بولىمگە اۋىستىرىلعان. وندا ريمما شاكەەۆا ميسسياعا كەلگەن وفيتسەرلەردى، جاڭا بىتىمگەرلەردى دايارلاۋ جۇمىستارىنا قاتىسىپ، ءوزىنىڭ كاسىبي دارەجەسىن كورسەتكەن.

اقپارات ءۇشىن ايتا كەتەيىك، قازىرگى تاڭدا بۇۇ-نىڭ باتىس ساحارا بىتىمگەرلىك ميسسياسىندا قازاقستان قارۋلى كۇشتەرىنىڭ اسكەري بارلاۋ قىزمەتىندە بەس قازاقستاندىق وفيتسەر جۇمىس اتقارۋدا. ولار بىتىمگەرلىك ميسسياسىنا قارۋسىز قاتىسادى جانە قاقتىعىسۋشى تاراپتاردىڭ ەشقايسىسىن قولدامايدى، بەيتاراپ پوزيتسيا ۇستانادى.

Abai.kz