«شەكاراسىز رەپورتەرلەر» ۇيىمى جىل سايىنعى ءسوز بوستاندىعىنىڭ الەمدىك رەيتينگىن جاريالادى. بۇل تۋرالى Factcheck.kz سايتى حابارلادى.

قازاقستان ءسوز بوستاندىعى كارتاسىندا جاعدايى «ناشار» دەپ باعالانعان ەلدەردىڭ قاتارىندا. الايدا، رەيتينگتە 157-ورىننان 155-ورىنعا كوتەرىلگەن.

ال تمد ەلدەرى اراسىندا قازاقستاننىڭ رەيتينگى رەسەيدەن (150-ءشى ورىن), ۋكراينادان (97-ءشى ورىن), مولدوۆادان (89-ورىن), قىرعىزستاننان (79-شى ورىن), ارمەنيا ء(63–شى ورىن), گرۋزيادان (60-ورىن), ليتۆادان (28-ورىن), لاتۆيادان (22–ورىن) جانە ەستونيادان (15-ورىن) تومەن.

كەرىسىنشە، قازاقستان بۇل رەيتينگ بويىنشا وزبەكستاننان (157-ورىن), بەلارۋستەن (158-ورىن) تاجىكستاننان (162-ورىن), ءازىربايجاننان (167-ورىن) جانە تۇركىمەنستاننان (178-ورىن) جوعارى.

رەيتينگتە نورۆەگيا(1-ورىن), فينليانديا(2-ورىن), شۆەتسيا(3-ورىن), دانيا(4-ورىن), كوستا-ريكا (5-ورىن) كوش باستاپ تۇر. ال ەڭ سوڭعى ورىنداردا دجيبۋتي(176-ورىن), قىتاي(177-ورىن), تۇركىمەنستان(178-ورىن), سولتۇستىك كورەيا(179-ورىن) جانە ەريترەيا(180-ورىن) ورنالاسقان.

ەۋروپا مەن امەريكا (سولتۇستىك جانە وڭتۇستىك) ءسوز بوستاندىعىنىڭ ەڭ قولايلى كورسەتكىشى بار كونتينەنت رەتىندە كورسەتىلگەن. سونىمەن قاتار، الەمنىڭ 132 ەلىندە جۋرناليستەردىڭ جۇمىسى قيىن ەكەنى جازىلعان.

Abai.kz