وسكەمەندەگى شىعىس قازاقستان وبلىستىق ونەر مۋزەيىندە «دالا ديدارى» اتتى ونەر فەستيۆالى ءجۇرىپ جاتىر. ءالى دە كوپشىلىككە تانىلماي جۇرگەن، ەل ىشىندەگى ساف التىنداي تالانتتاردىڭ  جولىن اشىپ، شەبەرلىكتەرىن شىڭداۋعا مۇمكىندىك بەرەتىن بۇل رۋحاني جوبا تاۋەلسىزدىكتىڭ 30 جىلدىعىنا ارنالىپ وتىر. فەستيۆال كوكپەكتى اۋدانى شەبەرلەرىنىڭ كورمەسىمەن اشىلعان ەدى.

مۋزەيدىڭ كىشى زالىنا كوكپەكتى اۋدانى شەبەرلەرىنىڭ قولىنان شىققان ەلۋ جەتى بۇيىم قويىلىپتى. ىشىندە قولونەر تۋىندىلارى مەن كەسكىندەمەلىك كارتينالار، پەيزاجدىق جۇمىستار دا بار.

- ءبىر قاراعاندا قاراپايىم دۇنيەلەر بولىپ كورىنگەنىمەن، وزدەرى مالمەن، كۇندەلىكتى كۇيبىڭ تىرشىلىكپەن  اينالىسىپ جۇرگەن ادامداردىڭ ۋاقىتتارىن ءبولىپ، قولونەرگە كوڭىل بولۋلەرىنىڭ ءوزى قانشالىقتى؟! وسى كورمەنى ۇيىمداستىرۋدىڭ ءوزى ۇلكەن قاجىرلىلىقتى تالاپ ەتەرى ءسوزسىز، - دەيدى ونەر مۇراجايىنىڭ قىزمەتكەرى سىيلىق كاشەي.

ماماننىڭ ايتۋىنشا جۇمىستاردىڭ اراسىندا تىڭ ستيلدە ورىندالعان، قازىلار القاسىنىڭ نازارىن سەلت ەتكىزگەن دۇنيەلەر بار ەكەن. مىسالى، گۇلگينا   احمەتقاليەۆانىڭ ارالاس ستيلدە ورىندالعان كارتينالارىن الايىق. ءبىز ادەتتە كارتينالاردى تەك بوياۋمەن سالادى دەپ قابىلداپ ۇيرەنگەنبىز عوي، باسىندا ءوزىمىز دە سولاي ويلادىق. انىقتاپ قاراساق، نەگىزى، فونى دەيمىز بە، جۇننەن جاسالعان، وسى ستيلدە بىرنەشە تۋىندىسى بار. ءجۇننىڭ ءار تالى ءتۇتىلىپ، قانىق تۇستەرگە بويالعان. جىلىلىق سىيلايتىن تۇستەر تاڭدالىپ الىنىپتى. ال سىرعا تولى تاستاعى سۋرەتتەردى جىپپەن كەستەلەگەن بە دەپ قالاسىز. سويتسەك، ول جىڭىشكە سىممەن توقىلعان ەكەن.  «كۇزگىتۇرىم» دەگەن پەيزاجدىق سۋرەتى دە ءتۇسى قانىق،  ورىندالۋى وتە سابىرلىقتى، شىدامدىلىقتى قاجەت ەتەتىن دۇنيە.  ال جاننا جابەكوۆانىڭ  قولىنان شىققان سەبەت پەن كيىز ءۇيدى قاراپايىم قاعازدان جاسالعان دەپ استە ويلامايسىز. شەبەر الدىمەن گازەت بەتتەرىنەن تۇتىكشە جاساپ، ولاردى ينە ارقىلى ءبىر بىرىنە جابىستىرىپ، توقىما ماتەريال دايىنداپ الىپ، سودان توقىعان ەكەن. مۇمكىندىگى شەكتەۋلى جان بولعانىنا قاراماستان جاننا وسى قولونەرىنىڭ ارقاسىندا قوسىمشا تابىس تا تاۋىپ وتىرعان كورىنەدى. ولگا لۋتسكايانىڭ كەندىر جىپتەن توقىلعان  تورسىعى مەن  توستاعاندارىن تەك ساندىك ءۇشىن جيناپ قويماي، كۇندەلىكتى  تۇرمىستا قولدانۋعا دا بولادى، دەيدى مۇراجاي قىزمەتكەرى.  كوكپەكتىنىڭ كورىكتى تابيعاتى بەينەلەنگەن سەرىكباي رىسۇمبەتوۆتىڭ «قىس»، ەلميرا ىزعۇتتىنوۆانىڭ «تاڭ» اتتى پەيزاجدارى دا كوپشىلىكتىڭ نازارىنا ىلىكتى.

- كورمە جەلتوقساننىڭ ون التىسىنا دەيىن سوزىلادى. جىل سوڭىنا دەيىن وڭىردەگى ون بەس اۋداننىڭ سۋرەتشىلەرى مەن قولونەر شەبەرلەرى كەزەكپەن ءوز تۋىندىلارىن اكەلىپ وتىرادى. كوكپەكتىدەن كەيىن شىعىس جۇرتى مامىر ايىندا التاي، تارباعاتاي  اۋداندارىنىڭ كورمەسىن تاماشالايدى. قورىتىندى كورمەدە قازىلار القاسىنىڭ شەشىمىمەن ەڭ تاڭداۋلىلارى ماراپاتتالاتىن بولادى، - دەدى مۋزەيدە.

فەستيۆال بارىسىندا اۋداننىڭ ونەرپازدارىنا  ءان مەن جىردان شاشۋ شاشىپ، بار ونەرلەرىن پاش ەتۋلەرىنە مۇمكىندىك بار.  وسىلايشا تاسادا قالعان تالانتتاردىڭ كوزىن اشۋ – رۋحاني جوبانىڭ باستى ماقساتى.

ايتپاقشى، قازىر وبلىس ورتالىعى «قىزىل» ايماقتا بولعاندىقتان، كورمەنى كەلىپ كورۋشىلەردىڭ قاراسى از. الايدا  مۋزەي قىزمەتكەرلەرى الەۋمەتتىك جەلى ارقىلى ونلاين ەكسكۋرسيا ۇيىمداستىرۋدى قولعا العان.

اينا ەسكەنقىزى

Abai.kz