مەملەكەت باسشىسى قاسىم-جومارت توقاەۆ تۋعان كۇنىن قالاي اتاپ وتەدى دەگەن سۇراققا قر پرەزيدەنتىنىڭ ءباسپاسوز حاتشىسى بەرىك ءۋالي جاۋاپ بەردى.

«بۇگىن ازاننان بەرى بىرقاتار بۇقارالىق اقپارات قۇرالدارىنىڭ وكىلدەرى حابارلاسىپ، «مەملەكەت باسشىسى تۋعان كۇنىن قالاي اتاپ وتەدى؟» دەپ سۇراپ جاتىر.

بۇل جايىندا بىلتىر ارنايى تۇسىنىكتەمە بەرگەن ەدىك. دەگەنمەن تاعى ءبىر مارتە ايتا كەتەيىك. 17 مامىر ادەتتەگىدەي جۇمىس كۇنى. پرەزيدەنت قاسىم-جومارت توقاەۆ بەكىتىلگەن كەستەگە سايكەس جۇمىس ىستەيدى. سوندىقتان ەشقانداي ءىس-شارا ۇيىمداستىرىلمايدى، ءتىپتى، اكىمشىلىك قىزمەتكەرلەرىنە دە پرەزيدەنتتى قۇتتىقتاۋعا رۇقسات ەتىلمەدى. مەملەكەت باسشىسى ءۇشىن بۇگىن قالىپتى جۇمىس كۇنى.

ونىڭ اۋلەتىندە بالالاردىڭ دا، ۇلكەندەردىڭ دە تۋعان كۇنىن تويلاۋ ءداستۇرى قالىپتاسپاعان», - دەپ جازدى بەرىك ءۋالي جەلىدەگى پاراقشاسىندا.

سونىمەن قاتار ول پرەزيدەنتكە قۇتتىقتاۋلار لەگى كەلىپ جاتقانىن جەتكىزدى.

«قازىردىڭ وزىندە كورشى مەملەكەتتەردىڭ باسشىلارى جانە ۇكىمەت، پارلامەنت، حالىقارالىق ۇيىمداردىڭ جەتەكشىلەرى جۇرەكجاردى تىلەكتەرىن جەدەلحاتتار ارقىلى جولداۋدا، سونداي-اق، تەلەفون شالىپ قۇتتىقتاۋدا. قۇتتىقتاۋلار تولاسسىز كەلىپ جاتىر»، - دەپ تولىقتىردى ول.

ايتا كەتەيىك، بۇگىن پرەزيدەنت قاسىم-جومارت توقاەۆ 68 جاسقا تولدى.

Abai.kz