بيىل ەلوردادا الاش ارىستارىنا ەسكەرتكىش ورناتۋ جوسپارلانعان. بۇل جايىندا ءماجىلىس دەپۋتاتتارىنىڭ ساۋالىنا قر پرەمەر-ءمينيسترىنىڭ ورىنباسارى ەرالى توعجانوۆتىڭ جاۋابىندا ايتىلعان.

- «نۇر-سۇلتان قالاسى اكىمدىگىنىڭ مالىمەتىنە سايكەس، تۇران داڭعىلى مەن سىعاناق كوشەلەرىنىڭ قيىلىسىنداعى اللەياعا «الاش» اتاۋىن بەرۋ ماسەلەسى الداعى ۋاقىتتا قالالىق ونوماستيكا كوميسسياسىنىڭ كەزەكتى وتىرىسىندا تالقىلانادى. سونىمەن بىرگە استانا اكىمشىلىگى وسى جىلى الاش ارىستارىنا ەسكەرتكىش ورناتۋدى جوسپارلاپ وتىر. قازىرگى ۋاقىتتا ەسكەركىشتى ورنالاستىرۋ نۇسقالارى قاراستىرىلۋدا. جالپى الاش قايراتكەرلەرىنىڭ ەسىمىن ۇلىقتاۋ جۇمىستارى جالعاسۋدا جانە ۇكىمەتتىڭ تۇراقتى باقىلاۋىندا», - دەدى ۆيتسە-پرەمەر ساۋالعا بەرگەن جاۋابىندا.

جالپى، بۇگىندە رەسپۋبليكا دەڭگەيىندە الاش قايراتكەرلەرىنىڭ ەسىمدەرى 200-دەن اسا ءبىلىم جانە مادەنيەت مەكەمەلەرىنە بەرىلگەن. الماتى قالاسىندا، اتىراۋ، اقمولا، اقتوبە، ماڭعىستاۋ، قاراعاندى، پاۆلودار، قوستاناي، تۇركىستان، شىعىس قازاقستان وبلىستارىندا الاش ارىستارىنىڭ ەسىمدەرىمەن ەلدى مەكەندەر، اۋداندار، الاڭدار، كوشەلەر مەن ءتۇرلى نىساندار اتالىپ، ولارعا ارنالعان ەسكەرتكىشتەر ورناتىلعان.

Abai.kz