انتيكور تۇركىستان وبلىسى اكىمى ورىنباسارىنىڭ ۇستالعانى جايلى اقپاراتقا جاۋاپ بەردى، دەپ حابارلايدى azattyq-ruhy.kz. 

سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتى الەۋمەتتىك جەلىلەردە تاراعان تۇركىستان وبلىسى اكىمىنىڭ ورىنباسارى مەيىرجان مىرزاليەۆتىڭ ۇستالعانى تۋرالى اقپاراتقا قاتىستى كەلەسىنى حابارلادى:

«مىرزاليەۆ قر سىبايلاس جەمقورلىققا قارسى ءىس-قيمىل اگەنتتىگىنىڭ وندىرىسىندەگى قىلمىستىق ءىس بويىنشا قورعالۋعا قۇقىعى بار كۋاگەر رەتىندە شاقىرىلدى. ول كۇدىكتى رەتىندە تانىلعان جوق، وعان قاتىستى بۇلتارتپاۋ شاراسى تاڭدالمادى. وزگە اقپارات قىلمىستىق ءىس جۇرگىزۋ كودەكسىنىڭ 201-بابىنا سايكەس تەرگەۋ مۇددەسىنە ساي جاريالانبايدى»، - دەلىنگەن.

ەسكە سالايىق، 17 مامىردا بىرقاتار تەلەگرام-كانالدا تۇركىستان وبلىسى اكىمىنىڭ ورىنباسارى مەيىرجان مىرزاليەۆتىڭ ءىرى كولەمدە پارا الدى دەگەن كۇدىكپەن ۇستالعانى جانە ۇستىنەن قىلمىستىق ءىس قوزعالعانى جايلى اقپارات تارادى.

بۇگىن وبلىس اكىمدىگىنىڭ ءباسپاسوز قىزمەتى الەۋمەتتىك جەلىدە تاراعان اقپاراتقا قاتىستى جاۋاپ بەرىپ، مەيىرجان يابايۇلىنىڭ گيپەرتونيالىق كريز دياگنوزىمەن وبلىستىق اۋرۋحانالاردىڭ بىرىندە جاتقانىن حابارلادى.

Abai.kz