اشارشىلىق پەن ساياسي قۋعىن سۇرگىن – كەڭەس وداعىنىڭ قازاق حالقىنا توندىرگەن ەڭ ۇلكەن زوبالاڭى. حالقىمىزدىڭ باس ساۋعالاپ شەكارا اسىپ كەتۋىنە، ۇلت زيالىلارىنىڭ تۇرمەگە توعىتىلىپ، ءزابىر كورۋىنە تىكەلەي كەڭەستىك كەر زاماننىڭ كەرتارتپا ساياساتى سەبەپ بولدى. بۇگىنگى تاۋەلىز قازاقستان قوعامى وسى ءبىر تاريحتىڭ اقتاڭداق بەتتەرىن ۇمىتپاۋى ءھام سول كەزدە جازىقسىز جالامەن اتىلعان، قۋعىنعا ۇشىراعان قۇربانداردى اقتاپ الۋى ءتيىس.

وسى ماقساتتا قر اقپارات جانە قوعامدىق دامۋ مينيسترلىگىنىڭ مۇرىندىق بولۋىمەن “رۋحاني جاڭعىرۋ” قوعامدىق ينستيتۋتى تاريحشىلار مەن قوعام بەلسەندىلەرىنىڭ باسىن قوسىپ، قۋعىن-سۇرگىنگە ۇشىراعان ساياسي اقتاڭداقتاردى اقتاپ الۋ ماسەلەسىن قاراستىردى.

وتكەن جىلى مەملەكەت باسشىسى قاسىم-جومارت توقاەۆتىڭ باستاماسىمەن ساياسي قۋعىن-سۇرگىن كورگەن جازىقسىز جانداردى اقتاپ الۋ ءۇشىن مەملەكەتتىك كوميسسيا قۇرىلىپ، تاريحي ادىلدىكتى قالپىنا كەلتىرۋ جۇمىستارىن باستاپ كەتكەن بولاتىن.

ال، اتالعان وتىرىستىڭ تىزگىنىن اقپارات جانە قوعامدىق دامۋ مينيسترلىگىنىڭ وكىلى بولات تىلەپوۆ ۇستادى. ول ءوز سوزىندە قۋعىن-سۇرگىن قۇرباندارىن اقتاۋ بۇگىنگى قوعامنىڭ اتقارۋى ءتيىس باستى مىندەتى ەكەنىنە توقتالدى.

-وتكەن جىلى مەملەكەت باسشىسىنىڭ تاپسىرماسىمەن ارنايى قۇرىلعان كوميسسيا قازىر ۇلكەن جۇمىستار اتقارىپ جاتىر. بۇل ىسكە ەڭ الدىمەن عىلىمي نەگىزدەمە جاسالۋى ءتيىس. سونىڭ نەگىزىندە مەملەكەتتىك يدەولوگيا جۇمىستارى جۇرەتىن بولادى,- دەدى تىلەپوۆ.

سونىمەن قاتار پروفەسسور حانگەلدى ءابجانوۆ الاش ارىستارىن ناسيحاتتاۋ جونىندەگى قازىر اتقارىلىپ جاتقان جۇمىستار تۋرالى ايتتى.

-وتارلاۋشى كەزەڭ – ادامنىڭ ءومىرى، دەنساۋلىعى مەن بوستاندىعىنىڭ قۇنى ايرىقشا ەكەنىن سەزدىردى. سەبەبى، زيالىلارىمىز كورگەن رەپرەسسيا كەزەڭى وتە اۋىر بولدى. سونىڭ كەسىرىنەن تالاي قازاق بوسىپ كەتتى، قانشاما ارىستارىمىز جازىقسىز اتىلدى. بۇگىن سولاردى اقتاۋ جۇمىستارى ءجۇرىپ جاتىر. مەملەكەتتىك كوميسسيا وتكەن جىلى قۇرىلدى. ال، اقتالماي جاتقان ارىستارىمىزدىڭ سانى جۇزدەگەن مىڭنان اسادى. سوندىقتان ارىستاردى اقتاۋ كەزەڭى وتە باياۋ ءجۇرىپ جاتقانداي. وعان كوپ ۋاقىتتىڭ كەرەگى جوق. تەك، رەپرەسسياعا ساياسي باعا بەرىپ، ءبىر عانا قۇجاتپەن بارلىعىن اقتاۋ قاجەت. وسى ءبىر ساياسي باعا بەرۋ دەيتىن شەشىم عانا جەتپەي تۇر. ال، ودان كەيىنشى پروتسەستەر ءوز كەزەگىمەن جۇرە بەرەدى. باستىسى، بارلىعىن اقتاۋعا ءبىر عانا شەشىم كەرەك, - دەدى ءابجانوۆ.

Abai.kz