كەشە قازاقستان پرەزيدەنتى قاسىم-جومارت توقاەۆ قحر توراعاسى سي تسزينپينمەن تەلەفون ارقىلى سويلەستى. 

پرەزيدەنت جۋىردا قازاقستانعا «CoronaVac» ۆاكتسيناسىنىڭ العاشقى لەگىنىڭ جەتكىزىلگەنىن ايتىپ، قىتاي تاراپىنا ريزاشىلىعىن ءبىلدىردى.

سي تسزينپين ەكىجاقتى ستراتەگيالىق ارىپتەستىككە جانە كۇردەلى كەزەڭدە كورسەتىلگەن ءوزارا كومەككە قاتىستى قازاقستان پرەزيدەنتىنىڭ بەرگەن باعاسىن قۇپتادى.

– ەلدەرىمىز اراسىنداعى ىنتىماقتاستىقتىڭ فورماتى بىرەگەي سيپاتتا جانە قىتايدىڭ باسقا كورشى ەلدەرمەن قارىم-قاتىناسى مۇنداي دەڭگەيدە ەمەس، – دەدى قىتاي باسشىسى.

پرەزيدەنت قازاقستان مەن قىتاي شەكاراسىنداعى اۆتوكولىكتەر مەن تەمىرجول وتكىزۋ بەكەتتەرىنىڭ جۇمىستارىن، سونداي-اق، ەكى ەل اراسىنداعى تۇراقتى اۋە قاتىناستارىن تەزىرەك قالىپتى جاعدايعا كەلتىرۋ قاجەت ەكەنىن ايتتى. بۇل قادام ەكى ەلدىڭ ىسكەر توپتارى مەن جالپى جۇرتشىلىعى ءۇشىن اسا جاعىمدى جاڭالىق بولار ەدى.

مەملەكەت باسشىسى «ءبىر بەلدەۋ – ءبىر جول» تۇجىرىمداماسىنىڭ باسقا دا باعىتتارىن بىرلەسىپ ىلگەرىلەتۋدە يننوۆاتسيالىق، اتاپ ايتقاندا، قارجى، تسيفرلاندىرۋ جانە «جاسىل» تەحنولوگيالارعا قاتىستى شەشىمدەردى ىزدەستىرۋگە شاقىردى.

سونىمەن قاتار، ەكى ەل باسشىلارى جاڭا ءداۋىر كەزەڭىندە مۋلتيلاتەراليزم تۇجىرىمداماسىن جانە «ادامزاتتىڭ ورتاق تاعدىرى» قوعامداستىعىن قۇرۋدىڭ اسا قاجەت ەكەنىن ايتتى.

جانە، قحر باسشىسىنىڭ قازاقستانعا مەملەكەتتىك ساپارمەن كەلۋ مەرزىمىن ديپلوماتيالىق جولدار ارقىلى كەلىسۋ جونىندە ۋاعدالاستىققا قول جەتكىزىلدى.

سونداي-اق، سي تسزينپين كومپارتيا وكىلدەرىنىڭ الدىندا سويلەگەن سوزىندە "دوستارىمىزدىڭ قاتارىن كەڭەيتۋىمىز كەرەك" دەپ مالىمدەگەن.

سي تسزينپين پارتيالاستارىن قىتايدىڭ "سەنىم ۇيالاتاتىن، جاعىمدى جانە قۇرمەتكە يە" وبرازىن قالىپتاستىرۋعا شاقىرعان.

ۆۆس سايتىنا پىكىر بىلدىرگەن ساراپشىلار "بۇل قىتايدىڭ ديپلوماتيالىق ساياساتىنىڭ وزگەرتۋگە دەگەن نيەتى بولۋى مۇمكىن" دەيدى.

سي تسزينپين بۇل مالىمدەمەسىن باتىس ەلدەرى مەن قىتايدىڭ اراسى سۋىپ كەتكەن تۇستا جاسادى. حالىقارالىق ۇيىمدار مەن باتىس ەلدەرى قىتاي شىڭجاڭداعى ۇيعىر، قازاق جانە باسقا دا مۇسىلمانداردى لاگەرگە قاماپ جاتىر جانە گونكونگتە دەموكراتيانى قولدايتىندارعا قىسىم جاسادى دەپ ايىپتايدى.

قىتاي باسشىسى 31 مامىردا پارتيالاستارىنىڭ الدىندا "دوستار تاۋىپ، بىرىگۋىمىز كەرەك جانە حالىقارالىق پىكىر الماسۋ كەزىندە دوستارىمىزدىڭ قاتارىن ۇنەمى ارتتىرىپ وتىرعان ءجون" دەگەن.

بۇعان قوسا، سي تسزينپين قىتاي الەم ەلدەرىمەن قارىم-قاتىناستا "اشىق، سەنىمدى ءارى بايسالدى بولۋى كەرەك" دەدى.

ايتا كەتەيىك، سي تسزينپين 2012 جىلى قىتاي باسشىسى بولىپ بەكىتىلىپ، سودان بەرى ەلدى باسقارىپ وتىر. ساراپشىلار ونىڭ بيلىگىن اۆتوريتاريزمگە جاتقىزادى.

Abai.kz