قىتاي 3 استروناۆتىن «اسپان سارايى» اتانعان ءوز عارىش ستانتسياسىنىڭ قۇرىلىسى ءۇشىن 3 ايعا ساپارعا اتتاندىردى. مەملەكەتتىك ساياساتتىڭ ماقساتى اسپاناستى ەلى «حالىقارالىق عارىش ستانتسياسىنان» بولەك، تاۋەلسىز جەكە ءوزى جاڭا جاڭا عارىش ستانتسياسىن سالماقشى. قۇرىلىس 2022 جىلى اياقتالادى. قازىرگى تاڭدا ستانتسيانىڭ بولىكتەرى عارىشقا شىعارىلعان. استروناۆتتار سول بولىكتەردى قوسۋ مەن وزگە دە قۇرىلىس جۇمىستارىن اتقارادى.

بۇگىنگى تاڭدا بۇكىل الەم ەلدەرى بىرىگىپ پايدالاناتىن «حالىقارالىق عارىش ستانتسياسىنىڭ» قولدانۋ مەرزىمى 2028 جىلى اياقتالادى. ەگەر عارىش دەرجاۆاسىنا جاتاتىن باسقا ءبىر ەل جاڭا ستانتسيا سالماسا قىتاي عارىش ستانتسياسى بار الەمدە جالعىز مەملەكەت بولادى. الەم ەلدەرى قىتايدىڭ شارتتارىندا، شىعىستاعى اعايىننىڭ عارىش ستانتسياسىن قولدانۋعا ءماجبۇر حالگە تۇسەدى. بۇگىنگى كۇننىڭ وزىندە الەمنىڭ 17 ەلى قىتايمەن بىرلەسە جۇمىس ىستەۋگە ءوتىنىش بىلدىرگەن. ونىڭ ىشىندە رەسەي دە بار.

رەسەيدىڭ 2025 جىلى «روسس» اتتى ءوز عارىش ستانتسياسىن سالادى دەگەن جوسپارى بار. سونىمەن بىرگە قىتاي ماماندارىمەن دە بىرلەسە جۇمىس ىستەۋگە ءازىر.

وسى جىلى مارسقا زەرتتەۋ اپپاراتىن ءساتتى قوندىرعان قىتاي كەڭ كولەمدى مەملەكەتتىك قولداۋ مەن ساياساتتىڭ ارقاسىندا عارىش دەرجاۆالارىنىڭ قاتارىنا قوسىلدى دەپ ايتۋعا تولىق بولادى. ءبىز قالايىق، قالامايىق الداعى 10 جىلدا الەمدىك ەكونوميكادا، ساياساتتا، عىلىمدا قىتاي فاكتورى ءبىرىنشى ورىنعا شىعادى.

بىراق بۇل فاكتور ءتىلى باي، تاريحى تەرەڭ ءبىزدىڭ ەلگە اسەر ەتپەۋى ءتيىس. قىتاي ءبىزدىڭ تەرەڭ تاريحىمىزدى، اسقاق رۋحىمىزدى مويىنداپ، حالىقارالىق ساياساتتا تەڭ ارىپتەستىك ورناتادى دەپ سەنەمىن.

باۋىرجان سەرىكباەۆتىڭ جازباسى

Abai.kz