قاراعاندى وبلىسىنداعى شاحتالار مەن مەتاللۋرگيا كومبيناتتارىنىڭ يەسى "ارسەلورميتتال تەمىرتاۋ" كومپانياسى 1 شىلدەدەن باستاپ جۇمىسشىلارىنىڭ جالاقاسىن وسىرەتىنىن مالىمدەدى. بۇل تۋرالى centralasian.org-كە سىلتەمە جاساپ Abai.kz حابارلايدى. 

امت جالاقى ءوسىرۋ تۋرالى شەشىم قابىلداعاندا تاۋ-كەن سالاسىنداعى "تابىس كولەمىن سارالاپ", "ازىق-تۇلىك، باسقا دا تاۋارلاردىڭ، كوممۋنالدىق قىزمەت قۇنىنىڭ قىمباتتاۋىن" ەسكەرگەن. بۇل شەشىم كاسىپوداقتارمەن تالقىلانعان.

"جالاقى ءوسىرۋ بىرتىندەپ، اي سايىن 20 مىڭ تەڭگەدەن يا ايلىق تابىسىنىڭ 6 پايىزى مولشەرىندە قوسىلادى" دەپ حابارلادى كومپانيا رەسمي سايتىندا.

وسىعان دەيىن امت باس ديرەكتورى بيدجۋ ناير دا جالاقى وسەتىنىن ايتقان. كومپانيا "الەۋمەتتىك قوسىمشا قولداۋ ءۇشىن" شىلدەنىڭ باسىندا جۇمىسشىلارعا ءبىر رەتتىك 150 مىڭ تەڭگە تولەيتىنىن مالىمدەدى. امت جالاقى ءوسىرۋ شەشىمىن كومپانيادا ءتۇرلى وقىس وقيعالار مەن ادام ءولىمى جيىلەگەن تۇستا قابىلدادى.

مامىردىڭ سوڭىندا تەمىرتاۋداعى مەتاللۋرگيالىق كومبيناتتا وقىس وقيعا بولىپ، ەكى جۇمىسشىنىڭ دەنەسى كۇيىپ، اۋىر حالدە اۋرۋحاناعا تۇسكەن. وسىدان سوڭ جەلىدە تۇرعىندار مەن بلوگەرلەر كومبيناتتار مەن شاحتالارداعى جۇمىس جاعدايىنىڭ ناشارلىعىن ايتىپ، دابىل قاققان.

2018 جىلى امت كومبيناتىندا بولعان اپاتتان سوڭ ءماجىلىس دەپۋتاتى البەرت راۋ جاعدايعا الاڭداپ، پرەمەر-مينيسترگە قايىرىلعان. دەپۋتات "كەن ورنىن جاڭالاۋ مەن ونى جوندەۋگە جەتكىلىكتى قارجى بولىنبەگەندىكتەن اپات بولىپ جاتىر" دەگەن.

سول كەزدە مينيسترلەر كابينەتى "امت كومپانياسىنىڭ جۇمىسى ۇكىمەتتىڭ باقىلاۋىندا" دەپ مالىمدەگەن.

Abai.kz