بۇۇ باس اسسامبلەياسىنىڭ توراعاسى تۇركى اكادەمياسىنا كەلدى
حالىقارالىق تۇركى اكادەمياسىنا بۇۇ باس اسسامبلەياسىنىڭ توراعاسى ۆولكان بوزكىر ارنايى كەلدى.
مارتەبەلى مەيماندى تۇركى اكادەمياسىنىڭ پرەزيدەنتى دارحان قىدىرالى قارسى الدى.
تۇركى اكادەمياسىنىڭ كىتاپحاناسىمەن جانە ونداعى مول كىتاپ قورىمەن تانىستىرعان اكادەميا باسشىسى بۇۇ باس اسسامبلەياسىنىڭ توراعاسىنا ۇيىمنىڭ جۇمىسى تۋرالى كەڭ مالىمەت بەردى.
ءوز كەزەگىندە كورنەكتى ديپلومات ۆولكان بوزكىر اكادەميا باسشىسى دارحان قىدىرالىمەن كوپجىلعى تانىستىعىن جوعارى باعالاپ، تۇركى تىلدەس ەلدەر اراسىنداعى ىنتىماقتاستىقتى نىعايتۋدا اكادەميانىڭ ايرىقشا ماڭىزدى ۇيىم ەكەنىنە توقتالىپ، اتقارىلعان جۇمىستارعا ريزاشىلىعىن ءبىلدىردى.
بۇۇ باس اسسامبلەياسىنىڭ توراعاسىنىڭ تۇركى اكادەمياسىنا ارنايى كەلۋى تۇركى ينتەگراتسياسىنىڭ الەمدىك ارەنادا بەدەلى ءوسىپ كەلە جاتقانىن كورسەتەدى.
اكادەميا باسشىسى مەيمانعا ارنايى قۇرمەت كورسەتىپ، تۇركى اكادەمياسى جارىققا شىعارعان باعالى باسىلىمداردى تارتۋ ەتتى.
Abai.kz
