اقتوبەدە مەكتەپتە وقيتىن قىزدار جاپپاي جەزوكشەلىككە تارتىلىپ جاتىر-مىس دەگەن اقپاراتتىڭ تاراعانىنا ءبىراز بولدى. بىراق ونى قۇزىرلى ورگاندار راستاعان جوق. ايتسە دە، ەل اراسىندا تاراعان ءسوزدىڭ انىق-قانىعىن بىلمەككە تىرىسقانبىز. بىراق تۇرعىنداردىڭ وزىنەن سىر سۋىرتپاقتاۋ قيىنعا ءتۇستى.

قىزدىڭ مىنەزى قاتتى وزگەردءى

- وقيعادان حاباردار بولارسىزدار. بىزدەرگە بولعان جايدى ەشكىمگە ءتىس جارىپ ايتپاڭىزدار دەگەن ەدى. ءارى بالالاردىڭ قىلىقتارىن باسىلىمعا جاريالاۋ دا ىڭعايسىز. مەن بىلگەنىمدى عانا ايتىپ بەرەيىن، - دەپ باستادى اڭگىمەسىن كلارا (اتى وزگەرتىلگەن - اۆت.) ەسىمدى كەيىپكەرىمىز. - اعامنىڭ قىزى ايىم (اتى وزگەرتىلگەن - اۆت.) بيىل 10-سىنىپتى ءبىتىردى. اجەسىنىڭ قولىندا وسكەندىكتەن، تىم ەركە ەكەنى راس. بىراق ول - اقىلدى تەنتەك. ساباعىن ۇزدىك ءبىتىردى. الايدا سوڭعى كەزدە ايىمنىڭ مىنەزى قاتتى وزگەردى. ۇيدەن «مەكتەپكە كەتتىم» دەپ شىعىپ كەتكەنىمەن، كەي كۇندەرى ساباققا دا قاتىسپايتىن بولعان. مۇنى بىزگە مۇعالىمدەرى حابارلاپ ءجۇردى. وتپەلى كەزەڭ بولعان سوڭ شىعار دەپ ءبىز ەلەمەپ ەدىك، الايدا ونىڭ قىلىعى شەكتەن شىعىپ كەتتى. اناسى كيىمدەرىن جۋار كەزدە قالتاسىنان قوماقتى اقشالار تا تاۋىپ جۇرگەن. سۇراسا، ءتۇرلى سىلتاۋلار ايتادى ەكەن.
كلارانىڭ ايتۋىنشا، ايىمنىڭ بوگدە ادامدارمەن ارالاسىپ، جول باعىتىن مەكتەپتەن باسقا ارناعا بۇرىپ جۇرگەنىن باۋىرلارى بايقاپتى. ولار دەرەۋ اتا-اناسىنا حابارلاپ، بولعان جايدى ەسكەرتكەن. ايىمنان قانشا ۇرسىپ سۇراعانىمەن، ول باسىنان وتكىزگەن جايلارىن ءتىس جارىپ ايتپايدى. بالاسىنىڭ كەلەشەگىنەن قورىققان اتا-اناسى ونى مەكتەپكە اپارىپ، الىپ كەلىپ جۇرگەن. سونىمەن قاتار الدەبىرەۋلەردىڭ ارباۋىنا ەرىپ، ءبىر قاتەلىككە ۇرىنىپ قالۋى مۇمكىن دەگەن ويمەن پوليتسيا قىزمەتكەرلەرىنە شاعىمدانىپتى.

«جەڭگەتاي» شولپان

وسى تۇستا اقتوبە وبلىسى ىشكى ىستەر دەپارتامەنتىنىڭ ماماندارى كامەلەت جاسىنا تولماعان قىزداردى دا جەزوكشە بولۋعا ماجبۇرلەگەن 33 جاستاعى شولپان ەسىمدى ازاماتشانى قولعا ءتۇسىردى. پوليتسيا قىزمەتكەرلەرى كۇدىكتىنى 19 جاستاعى بويجەتكەندى 30 مىڭ تەڭگەگە «ساتۋ» ۇستىندە ۇستاپتى. جەدەل تەرگەۋ ناتيجەسىندە شولپاننىڭ سوڭعى ءۇش ايدا 16-20 جاس ارالىعىنداعى قىزداردى جەزوكشەلىكپەن اينالىسۋعا يتەرمەلەپ كەلگەنى انىقتالدى.
وسى ۋاقىتقا دەيىن وڭىردەگى ىشكى ىستەر دەپارتامەنتىنە جابىرلەنگەن قىزداردان 14 ارىز كەلىپ تۇسكەن. جيناقتالعان بارلىق دەرەكتەر بويىنشا ءىس قوزعالدى.
پوليتسيا قىزمەتكەرلەرى شولپاننىڭ ءۇش سىبايلاسى بار ەكەنىن انىقتاپتى. ەكى ايەل مەن ءبىر جىگىتتەن تۇراتىن كومەكشىلەرى بۇرىن پوليتسيا ەسەبىندە بولماعان. قازىرگى كۇنى كۇدىكتى «جەڭگەتايدىڭ» ۇستىنەن قىلمىستىق ءىس قوزعالىپ، ەشقايدا شىقپاۋ تۋرالى قولحاتپەن ۇيىنە جىبەرىلدى.
اقتوبە وبلىستىق ىشكى ىستەر دەپارتامەنتى ءباسپاسوز قىزمەتىنىڭ باستىعى المات يمانعاليەۆ بۇل وقيعا تۋراسىندا بىلاي دەيدى: «پوليتسيا قىزمەتكەرلەرىنە كامەلەتتىك جاسقا تولماعان قىزداردىڭ جەزوكشەلىكپەن اينالىساتىنى تۋرالى اقپاراتتىڭ تۇسكەنى راس. بىراق كەيبىر باسىلىمدار بۇل ماسەلەنى تىم ۋشىقتىرىپ جازىپتى. «ءتان ساۋداسىنا 5 مىڭ وقۋشى قىزدىڭ ساتىلعاندىعى» تۋرالى اقپارات جالعان. ءىس ءالى دە تەرگەلىپ جاتىر. سونىمەن قاتار قالامىزدا الماتىلىق جانە قاراعاندىلىق قىلمىستىق توپ ءىس-ارەكەت ەتۋدە دەگەن اقپارات تا شىندىققا سايكەس كەلمەيدى».
دەرەككە سۇيەنسەك، اتالمىش دەپارتامەنت قىزمەتكەرلەرى بۇل ىستەن بولەك، بيىل كامەلەتتىك جاسقا تولماعان 13 قىزدى ىزدەستىرۋ جۇمىستارىمەن اينالىسقان. بىراق بۇل بويجەتكەندەردىڭ «جامان ىسپەن» اينالىسپاعاندىعى انىقتالىپ، ۇيلەرىنە جەتكىزىلىپتى.
جەرگىلىكتى جانە رەسپۋبليكالىق باسىلىمداردا جاريالانىپ كەتكەن كامەلەت جاسىنا تولماعان مىڭداعان قىزدىڭ جەزوكشەلىك جولعا تارتىلعانى، ءتىپتى سولاردىڭ اراسىندا ولگەندەر، ءىز-ءتۇسسىز جوعالعاندار دا بار ەكەنى تۋرالى مالىمەتتى ەلىمىزدىڭ ىشكى ىستەر مينيسترلىگى دە تەرىسكە شىعاردى.

ايگۇل بايتىبيقىزى،
اقتوبە

«جاس قازاق» گازەتى