ەركiن جۋاسبەك، ق.قۋانىشباەۆ اتىنداعى مەملەكەتتiك اكادەميالىق قازاق مۋزىكالىق-دراما تەاترىنىڭ ديرەكتورى ءارى كوركەمدىك جەتەكشىسى:

- ەركىن تىلەۋقۇلۇلى، بۇكىل الەم حالقى كوز تىگىپ وتىرعان ەلوردامىزداعى ءوزىڭىز باسقارىپ وتىرعان قاللەكي تەاترى 20 جىلدىق تورقالى تويىن ەگەمەندى ەلىمىزدىڭ مەرەيلى تاۋەلسىزدىك تويىمەن بىرگە اتاپ وتكەنىن بىلەمىز. وسى 20 جىل ىشىندەگى اتقارعان ەڭبەكتەرىڭىز باعالانىپ، تەاتر ۇجىمىنا اكادەميالىق مارتەبە بەرىلدى. بۇل - بۇكىل ۇجىمنىڭ ەڭبەگىنىڭ جەمىسى ەكەندىگى ءسوزسىز. ارينە، بۇل دارەجە وڭايلىقپەن كەلمەگەنى شىندىق. وسى ورايدا وتكەن كۇندەرگە كوز جۇگىرتىپ، قاللەكي تەاترىنىڭ تاريحىنا توقتالىپ وتسەڭىز؟!

ەركiن جۋاسبەك، ق.قۋانىشباەۆ اتىنداعى مەملەكەتتiك اكادەميالىق قازاق مۋزىكالىق-دراما تەاترىنىڭ ديرەكتورى ءارى كوركەمدىك جەتەكشىسى:

- ەركىن تىلەۋقۇلۇلى، بۇكىل الەم حالقى كوز تىگىپ وتىرعان ەلوردامىزداعى ءوزىڭىز باسقارىپ وتىرعان قاللەكي تەاترى 20 جىلدىق تورقالى تويىن ەگەمەندى ەلىمىزدىڭ مەرەيلى تاۋەلسىزدىك تويىمەن بىرگە اتاپ وتكەنىن بىلەمىز. وسى 20 جىل ىشىندەگى اتقارعان ەڭبەكتەرىڭىز باعالانىپ، تەاتر ۇجىمىنا اكادەميالىق مارتەبە بەرىلدى. بۇل - بۇكىل ۇجىمنىڭ ەڭبەگىنىڭ جەمىسى ەكەندىگى ءسوزسىز. ارينە، بۇل دارەجە وڭايلىقپەن كەلمەگەنى شىندىق. وسى ورايدا وتكەن كۇندەرگە كوز جۇگىرتىپ، قاللەكي تەاترىنىڭ تاريحىنا توقتالىپ وتسەڭىز؟!

- جالپى، جەتىستىكتىڭ، مارتەبە مەن اتاقتىڭ ءبىر كۇندە كەلمەيتىنى تۋرالى ايتقان پىكىرىڭىزگە تولىقتاي قوسىلامىن. بىراق، قازاقستانداعى باسقا تەاترلارعا قاراعاندا استانا تەاترىنىڭ دامۋ ەرەكشەلىگىندەگى ىرعاقتىڭ جىلدامداۋ بولۋىنىڭ وزىندىك سەبەبى بار. ەڭ الدىمەن مۇنى مەن باس قالامىز ەلوردانىڭ دامۋىمەن بايلانىستىرا ايتقىم كەلەدى. ءوزىڭىز بىلەتىندەي، استانا ەڭ العاش استانا بولعان كەزدە بۇعان دا كۇدىكپەن قاراعان جاندار از بولعان جوق. دەگەنمەن، ءبىزدىڭ ەلباسىمىزدىڭ سارابدال ساياساتىنىڭ، بىرنەشە مارتە قايتا ورالعان ەكونوميكالىق داعدارىستىڭ قيىندىعانا قاراماستان ەلىمىزدىڭ قالىپتى دامۋىنىڭ ارقاسىندا استانانىڭ ارايلانا، اجارلانا تۇسكەنى بارشاڭىزعا ءمالىم. شىن مانىندە، «جۇمىلا كوتەرگەن جۇك جەڭىل» دەيتىن بولساق، بۇل بۇكىل ەلىمىزدىڭ جۇرەگى رەتىندە قازاقستاننىڭ سوڭعى كەزەڭدەگى دامۋ كەلبەتى مەن ىرعاعىن تۇگەلدەي ايشىقتاپ تۇرعانى انىق. ال، ەندى وسىنداي قالادا تۇرعان تەاتردىڭ دا باسقالارعا قاراعاندا جىلدام ءوسىپ-وركەندەۋى، مەنىڭ ويىمشا، زاڭدىلىق سياقتى. سەبەبى، سوڭعى جىلدارداعى استانا حالقىنىڭ تەك قانا سانىنىڭ ەمەس، ساپا جاعىنان ءوسۋى، حالىقتىڭ تالابىنىڭ كۇشەيۋى، حالىقتىڭ مادەنيەتكە، ونەرگە، رۋحاني مۇرامىزعا دەگەن بەت-الپەتىنىڭ تۇزەلۋىنە بايلانىستى تەاترعا قويىلعان تالاپ تا كۇشەيە ءتۇستى. سوندىقتان، وسى تەاتردىڭ 20 جىلدىڭ ىشىندەگى ءوسۋ تاريحىنا كوز سالا وتىرساڭىز، سوناۋ اقمولا كەزىندە قۇرىلعان جاقىپ وماروۆتىڭ ەڭبەگى بۇل تەاتردى قالىپتاستىرۋ، وسى وڭىرگە تانىستىرۋ بولاتىن بولسا، ودان كەيىنگى قادىر جەتپىسباەۆ سول جۇمىستى جالعاستىرعاندىعى، ال ەندى ەلباسىنىڭ تىكەلەي ۇسىنىسىمەن تەاترعا ءازىربايجان مامبەتوۆ اعامىزدىڭ شاقىرىلۋى - بۇل تەاتردىڭ ەكىنشى وركەندەۋ كەزەڭى دەپ ايتۋعا بولادى. اقيقاتىندا، ازەكەڭمەن بىرگە تەاتردىڭ ساپاسى جاندانعانى انىق. سەبەبى، ازەكەڭ وزىمەن بىرگە تەاترعا مىقتى اكتەرلەردى تارتا ءبىلدى، تەاتردىڭ جاستارىن وسىندا قالۋعا، ولاردىڭ شىعارماشىلىق جۇمىس جاساۋعا باسىن بىرىكتىرە ءبىلدى. سول سەكىلدى، تەاتردىڭ ساحناسىنىڭ تارلىعىنا، كورەرمەن زالىنىڭ ازدىعىنا قاراماي-اق ۇلكەن-ۇلكەن قويىلىمداردى الىپ كەلدى. بۇل تەاتردى اۋەزوۆ تەاترىنىڭ مەكتەبىنەن ءوتتى دەۋگە ابدەن بولادى. نەگە دەسەڭىز، اۋەزوۆ تەاترىندا ءازىربايجان اعانىڭ ساحنالاۋىمەن قويىلعان، ەڭ مىقتى دەگەن بىرنەشە كلاسسيكالىق كولەمدى تۋىندىلار وسى ساحنادا قويىلدى. مۇنىڭ ەڭ ءبىرىنشى قاجەتتىلىگى - شىعارماشىلىق قۇرامدى شىڭداۋدىڭ جولى بولعانىن ءبىز بۇگىن ءتۇسىنىپ وتىرمىز. مىنە، وسىنداي مەكتەپتەن وتكەن تەاتر 20 جىلدىڭ ىشىندە اكادەميالىق مارتەبەگە لايىق بولدى دەپ باعالانعاندىعىن زاڭدى دەپ تۇسىنەمىز.

- شىنى كەرەك، جاڭا عيمارات تۋرالى اڭگىمەنىڭ قوزعالىپ كەلە جاتقاندىعىنا ءبىراز ۋاقىت بولدى. ءبىر جاعىنان، تۇركi دۇنيەسi مادەنيەتiنiڭ استاناسى اتانىپ وتىرعان ەلوردامىزدا قازاق دراما تەاترىنىڭ ەڭسەلى عيماراتى بولماۋى - باس قالا مارتەبەسىنە سىن ەكەندىگى جاسىرىن ەمەس. بىراق، تار عيماراتتى سىلتاۋ ەتىپ، قول قۋسىرىپ وتىرماعاندارىڭىزعا - ونەر سۇيەر قاۋىم كۋا. ءزاۋلىم عيماراتى بار، ەسەسىنە قويىلىمدارى ماردىمسىز تەاتردا بارشىلىق. دەگەنمەن، «جاقىن كۇندەرى قاللەكي تەاترىنىڭ عيمارات ماسەلەسى شەشىلەدى» دەگەن اڭگىمەنى قۇلاعىمىز شالعان-دى. وسىنىڭ اقيقاتىن ءوز اۋزىڭىزدان ەستىسەك...

- شىنىندا دا، اكادەميالىق مارتەبە تەاتر ۇجىمىنا تاپسىرىلىپ جاتقان كەزدە، بۇگىنگى بيلىك باسىنداعى اعالارىمىزدىڭ اۋزىنان وسىنداي اڭگىمەنىڭ شىققانى راس. بۇل بىزگە ءۇمىت ۇيالاتادى. ارينە، ءبىز بايبالام سالىپ، نە بولسا سونى ايتا بەرۋدەن اۋلاقپىز. قازىر استانادا نە سالىنباي جاتىر؟ قۇدايعا شۇكىر، بارلىعى سالىنىپ جاتىر. مەن مىناۋ قازىر سالىنىپ جاتقان كەرەمەت وپەرا تەاترىنىڭ ءاربىر كىرپىشى قالانعان سايىن راحات سەزىمگە بولەنەمىن. تەاتر عيماراتى تەك بىزگە عانا بولسىن دەگەن بايبالاممەن شەشىلمەيدى. شىن مانىندە، قالاي بولسا سولاي استاناعا تەاتر سالا سالۋعا دا بولمايدى. بۇل جەردىڭ تەاترى تەحنولوگيالىق جاعىنان بۇگىنگى زامانعا ساي، بارلىق جاعىنان ولشەنىپ-پىشىلگەن تەاتر بولۋى كەرەك. مىنە، وسى جاعىنان العاندا وپەرا تەاترىنىڭ سالىنۋى - وسى ساياساتتى، وسى قاسيەتتى تۇسىنگەندىك دەپ ەسەپتەيمىن. شىن مانىندە، تەاتر دەگەن - ساۋدا ورتالىعى، كينوتەاتر دا ەمەس. تەاتردىڭ بۇگىنگى زامان تالابىنا ساي بولۋى - ەڭ الدىمەن الەمدىك ۇردىسكە ساي كەلۋى ءتيىس. ماسەلەن، تەاتردىڭ ءبىر عانا قاسيەتىن الساق، درامالىق تەاتردا دىبىس كۇشەيتكىشتى قولدانۋعا بولمايدى. ويتكەنى، تەاتر - ءتىرى ونەر. ەگەر كورىپ وتىرعان كورەرمەن اكتەردىڭ ءسوزىن ناق قالپىنداعىداي قابىلداماي، ميكروفوندى پايدالانعانداي جاعداي تۋىنداسا - وندا سپەكتاكلدىڭ ءتىرى ونەر بولىپ كورسەتىلەتىن قاسيەتى جوعالادى. سوندىقتان دا، وسىنىڭ ءبارىن ەگجەي-تەگجەيلى ويلاستىرىپ، كوپتەن كۇتكەن تەاتر عيماراتى ۇلكەن دايىندىقپەن سالىنۋى كەرەك. ارينە، اكتەرلاردىڭ بابى، رەجيسسەرلاردىڭ شابىتى ءوشىپ قالماي تۇرعان كەزدە ءبىز ءۇشىن تەزىرەك بولعانىن قالايمىز. دەگەنمەن، مەن وسى ءبىر ساتتە بايبالامنان گورى، بايسالدى قادامنىڭ قاجەت ەكەنىن تۇسىنەمىن.

- تەاتردىڭ جاڭالىعى - جاڭا قويىلىمى ەكەندىگى داۋسىز. جاقىندا الەمدىك دراماتۋرگيانىڭ شوقتىعى بيىك تۋىندىسى «گاملەتتى» ساحنالادىڭىزدار. باسقا تەاترلارعا قاراعاندا، قاللەكي تەاترىندا شەكسپيردىڭ بۇل شىعارماسى مۇلدەم جاڭاشىلدىقپەن قويىلدى. ءارى تابىستى ءوتتى...

- «جاڭاشىلدىق» دەپ وتىرسىز. مەن «جاڭاشىلدىق» دەگەندى چەحوۆشا تۇسىنەمىن. چەحوۆ ايتادى: «جاڭاشىلدىق دەگەن نە؟ ەگەر ءار نارسە تالانتتى بولسا، ول - جاڭاشىلدىق». سوندىقتان، «شەكسپيردىڭ «گاملەتىنەن» مەن جاڭالىق اشىپ، الەمدى تاڭقالدىرامىن، اياعىن اسپاننان كەلتىرەمىن» دەگەن وي مۇلدەم بولماۋى كەرەك. ءبىز قازىرگى تاڭدا اكادەميالىق مارتەبەگە يە بولىپ تۇرعان، ءبىزدىڭ كورەرمەنىمىز بىزگە باسقاشا كوزقاراسپەن قارايتىنداي جاعداي تۋىنداعان كەزدە «قاي شىعارمانى قويامىز؟» دەگەن سۇراقتىڭ الدىندا تۇرعانىمىز راس. دەگەنمەن، «گاملەت»، جاقىن ارادا ساحنالاناتىن «اقان سەرى - اقتوقتى»، مۇنىڭ بارلىعى، ەڭ الدىمەن تەاتردىڭ وسى بەينەلەردى، وسى وبرازداردى سومدايتىن اكتەرى بار ما دەگەن سۇراققا جاۋاپ بەرەدى. وسى جاعىنان العاندا، «گاملەتتىڭ دە» ەڭ ءبىرىنشى ساتىسى - وڭ جامباسىنا كەلىپ تۇرعان اكتەرلاردىڭ رەجيسسەرمەن تۇسىنىستىكتە ءبىر دەممەن ساحنادا جاسالاتانى ۇلكەن-ۇلكەن پولوتنولى وبرازداردى ومىرگە اكەلگەندىگى. ارينە، بىزدە شەكسپيردىڭ تۋىندىسىنان الەمدە بولماعان قويىلىم قويامىز دەگەن وي بولعان جوق. «ساباقتى ينە ساتىمەن» دەمەكشى، ءساتى كەلىپ تۇرعان كەزدە ساحنالادىق.  گاملەتتى سومداعان نۇركەننىڭ دە، سىرىمنىڭ دا، پاتشانى ويناعان ەرلاننىڭ دا تۋرا قازىر دەر كەزى. كورەرمەن تەاترعا نە ءۇشىن كەلەدى؟ «گاملەتتى» بىلمەيتىن كورەرمەن جوق دەپ تە ايتۋعا بولادى. ويتكەنى، ءبىز سانالى، اقپاراتتىق باي قوعامدا ءومىر ءسۇرىپ جاتىرمىز. سوندىقتان، «گاملەتتىڭ» سيۋجەتىن، مازمۇنىن ءتۇسىندىرىپ جاتۋ ارتىق. ءار كورەرمەننىڭ جۇرەگىندە، ساناسىندا، ءتىپتى، قيالىندا ءوز گاملەتى بار زاماندامىز. سول سەبەپتى، ءبىز ءوز گاملەتىمىزدى ۇسىنعان كەزدە، ەڭ الدىمەن گاملەتتىڭ ىشكى جان دۇنيەسىن كورەرمەننىڭ الدىنا جايىپ سالاتىنداي جاعدايدا جۇمىس جاساۋ كەرەك دەگەن ماقسات قويدىق. ءسىزدىڭ تابىس دەپ وتىرعانىڭىز - ءبىزدىڭ وسى ماقساتىمىزعا جەتكەنىمىز.

- اعا، ءسوزىڭىز اۋزىڭىزدا. «كورەرمەن تەاترعا نە ءۇشىن كەلەدى؟» دەپ قالدىڭىز. قازىر كورەرمەندەردىڭ ءوزى ەكى-ءۇش توپقا ءبولىندى. ءبىر توبى رەجيسسەرگە، ءبىر توبى اۆتورعا، ەندى ءبىر توبى اكتەرعا كەلۋى مۇمكىن. وسى ورايدا، مەندە «استانادا كورەرمەندەردىڭ مادەنيەتى قانشالىقتى قالىپتاسىپ كەلە جاتىر نەمەسە قالىپتاسقان» دەگەن زاڭدى سۇراق تۋىنداپ وتىر؟!

- كورەرمەندەردىڭ مادەنيەتى تۋرالى اڭگىمە ايتقان كەزدە وتە اباي بولۋ كەرەك. كورەرمەندى كىنالاعان تەاتر - ەڭ الدىمەن ءوزى كىنالى! كورەرمەندى كىنالاعان اكتەر، رەجيسسەر - ەڭ الدىمەن ءوزى كىنالى! ەگەر، شىن مانىندە، جاقسى قويىلىم بولاتىن بولسا - ول ەشقانداي كورەرمەندى تالعامايدى. ماسەلەن، بىرەۋلەر: «ويباي، بالالار وتىر ەكەن، تۇسىنبەي قالدى» دەسە، ەندى بىرەۋلەرى «ۇلكەن كىسىلەر وتىر ەكەن، ولار قابىلداي المادى» دەپ جاتادى. مەنىڭ ويىمشا، وسىنىڭ بارلىعى - جاي عانا سىلتاۋ سەكىلدى. رەجيسسەر مەن اكتەرلاردىڭ جۇرەگىنە جول تابا بىلگەن سپەكتاكل - ول كورەرمەنگە جەتەدى. قازىرگى قوعامدا، كورەرمەندەر تۋرالى ءار ءتۇرلى پىكىر بار. «كورەرمەندى تەاترعا دايىنداپ اكەلۋ كەرەك» دەيدى، بىرەۋلەر. كەشىرىڭىز، ونداي تالاپ ەش جەردە جوق! كورەرمەن - باسقاسىن ايتپاعاندا ەڭ الدىمەن تۇتىنۋشى. ول سىزگە ءارتۇرلى جاعدايدا كەلۋى مۇمكىن. ءتىپتى، سەبەپ-سالدارسىز بايقاماي كەلىپ قالعان كورەرمەن دە بولادى. سوندىقتان، تەك قانا تالانتتى جانە شىنايى، كوز الدىندا تۋعان ونەر عانا كورەرمەندى باۋراپ الا الادى. باسقاشا، ونىڭ جولى جوق! وسىدان جارتى عاسىر بۇرىن، كەڭەستىك تەاتردىڭ كەزىندە تەاترلارعا بىرنەشە مىندەت قويىلاتىن: تاربيەلەۋ، ناسيحاتتاۋ، ۇگىتتەۋ، كوزىن اشۋ، اقپاراتتاندىرۋ. بۇگىنگى كۇنى وسىلاردىڭ ءبارى كۇشىن السىرەتتى. قازىرگى تاڭدا ەشقانداي كورەرمەن تەاترعا «ال، مەنى تاربيەلە. اقپارات بەر. مەنى ءبىر نارسەگە ۇگىتتە» دەپ، كەلمەيدى. ءبىز ءوزىمىزدى-ءوزىمىز الداۋىمىزدىڭ تۇككە دە قاجەتى جوق. قازىرگى كورەرمەن ءبىلىمدى، كوزى اشىق. كەيدە ءوزىمىزدىڭ قولىمىزدان ءىس كەلمەي قالعان كەزدە كەيبىر ارىپتەستەرىمىزدىڭ ءبارىن كورەرمەنگە جابا سالىپ، اعات سوزدەر ايتىپ جۇرگەنىنە مەن ءوزىم كۋامىن. مىسالى، ءبىزدىڭ تەاتردىڭ ساحناسىن كىشكەنتاي ساحنا دەپ جاتامىز. بىلە بىلسەڭىز، بۇل ءبىر جاعىنان «كەرەمەت». ارينە، تەاتر كورەرمەن زالى مەن ساحنا عانا ەمەس. كەيدە بىرەۋلەر، تەاترعا ونىڭ اسحاناسىنا وتىرۋ ءۇشىن نەمەسە اۋراسىنا كىرىپ-شىعۋ ءۇشىن عانا كەلەدى. وسى جاعىنان العاندا، كەمشىن تۇستار بارشىلىق. تاعى دا قايتالاپ ايتامىن، ۇلكەن تەاتردىڭ قاجەتىلىگىنە ءبىز وتە ءزارۋمىز. بىراق، تۋرا ساحنانىڭ قاسىندا وتىرىپ، اكتەردى 15 مەتردەن ەمەس، ءدال جانىنان كورىپ، اكتەردىڭ كەيىپكەرىنىڭ جان دۇنيەسىنە ەنگەنىنە كۋا بولۋ - بۇل كورەرمەننىڭ ەڭ ءبىرىنشى ولجاسى. ۇلكەن ساحنالاردا جارىقپەن، سۋرەتپەن، بوياۋ-گريمدەرمەن ءبىز كورەرمەننىڭ كوز الدىنا تەك قانا اسەر اكەلۋىمىز مۇمكىن. ال، جاپ-جاقىن جەردە، قاسىڭدا وتىرعان كەزدە وبراز جاساۋ، قويىلىمدا ويناۋ بۇل اسەر ەمەس، بۇل ناقتى سونىڭ ىشىنە ەنگىزۋ. وسى جاعىنان العاندا، ءبىزدىڭ تەاتر - باسقا تەاترلارعا قاراعاندا اكتەرلىك شەبەرلىكتىڭ وتە بيىك شەبەرلىگىن تالاپ ەتەتىن تەاتر. سول سەبەپتى، كورەمەنمەن ءبىزدىڭ بايلانىسىمىز باسقالارعا قاراعاندا وتە جوعارى.

- وسى كورەرمەندەرىڭىزگە الداعى كۇندەرى ۇسىنعالى وتىرعان «تۇساۋكەسەر» قويىلىمدارىڭىز تۋرالى ايتا وتىرساڭىز؟!

- تەاتردا پەرسپەكتيۆالىق جوسپار، الداعى كۇندەرگە جوسپار دەگەن بولادى. سونىمەن بىرگە، تەاتردا «سۋيۆەريە» دەگەن دە بار. الىستاعى نارسەلەردى ايتا بەرۋ دە قابىلدانا بەرمەيتىن جايت. ءبىزدىڭ وندىرىسكە كىرگىزىلگەن بىرنەشە جۇمىسىمىز بار. قازىر ماۋسىم ايىندا ۇلكەن ساحنادا تۇساۋىن كەسەمىز دەپ، دايىندالىپ وتىرعان فاريزا وڭعارسىنوۆا اپامىزدىڭ قالامىنان تۋعان، ازىرگە شارتتى اتاۋى «كۇي قۇدىرەتى» دەپ اتالاتىن شىعارما. بۇل الەمدە سيرەك كەزدەسەتىن ايەل بالاسىنان تۋا بىتكەن كۇيشى دينا نۇرپەيىسوۆا شەشەمىزدىڭ ءومىرى مەن ونەرىنە ارنالعان قويىلىم. سىزدەر بىلەسىزدەر، فاريزا اپامىزدىڭ اقىندىعى، قيال شەبەرلىگى، كوزقاراس كوكجيەگى وتە بيىك جانە تەرەڭ. اقىن دا، كۇيشى دە - جۇرەگىنەن ونەر تۋعان جاندار. مىنە، وسى جاقىندىقتىڭ اراسىنان تۋعان شىعارماعا دايىندىق ۇستىندەمىز. ارينە، بۇل مۋزىكالىق، وركەستر سۇيەمەلدەيتىن جانە بي قويىلىمدارى بار ۇلكەن قويىلىم بولعالى تۇر. ءبىزدىڭ ساحنامىز وسى ۇلكەن قويىلىمعا لايىقسىزداۋ بولعاندىقتان، العاشقى تۇساۋكەسەرىن «بەيبىتشىلىك جانە كەلىسىم سارايىندا» 10 ماۋسىم كۇنى ساحنالايمىز دەپ جوسپارلاپ وتىرمىز. بۇل دا تەاتردىڭ اۋقىمدى دۇنيەلەردى دە، ۇلكەن ساحنالاردا دا ويناي الاتىندىعىنىڭ كورسەتكىشى بولادى دەپ بىلەمىن. سپەكتاكلدى رەجيسسەر نۇرلان جۇمانيازوۆ ازىرلەپ جاتىر. قويىلىمعا تەاتردىڭ بارلىق كۇشى جۇمىلدىرىلعان. سودان كەيىن، «استانا كۇنى» مەرەكەسىنە وراي، قازاق دراماتۋرگياسىنىڭ ءىنجۋ-مارجانى، ۇلكەن شەبەرلىكپەن جازىلعان، بەلگىلى جازۋشى عابيت مۇسىرەپوۆتىڭ «اقان سەرى» شىعارماسىن ءوزىمىزدىڭ ساحنادا قويماقپىز. بۇل دا اۋقىمى كەڭ ۇلكەن شىعارمالاردىڭ ءبىرى. سەبەبى، عابيت مۇسىرەپوۆتىڭ ءوزى دراماتۋرگياعا از بارعان كىسى. بار بولعانى ساحناعا ارنالعان 5-6 تۋىندىسى بار. ەكىنشى جاعىنان بۇل تۋىندى قازاق ساحناسىندا كوپتەن بەرى قويىلماي كەتتى. ويتكەنى، بۇل شىعارماسىندا عابيت مۇسىرەپوۆ اقىندىق، شىعارماشىلىق ماسەلەسىمەن بىرگە ماحاببات ماسەلەسىن دە قوزعايدى. سونىمەن قاتار، بۇل شىعارمادا بيلىكتىڭ جانە ءدىننىڭ دە ماسەلەسى ورىن العان. ءدىن بولعاندا دا، ءدىننىڭ اتىن جامىلىپ ارەكەت ەتۋشىلەردىڭ اراسىنداعى قارىم-قاتىناستان تۇراتىن شىعارما. سوندىقتان، كوپ رەجيسسەردەر مۇنداي «داۋلى» تاقىرىپقا بارماي، بارا الماي، باتا الماي ءجۇر. ءبىز وسى پەسانى بۇگىنگى زاماننىڭ وي-تۇيسىگىمەن كورەرمەنگە ۇسىنساق دەپ وتىرمىز.

- دراماتۋرگيا دەمەكشى، دراماتۋرگتارمەن بايلانىستارىڭىز قانداي دارەجەدە؟

- «قازىرگى تاڭدا دراماتۋرگيا جوق، پەسا جازىلماي ءجۇر» دەگەن پىكىرگە ەش قوسىلمايمىن. قۇدايعا شۇكىر، كۇنىنە ءبىر جاڭا شىعارما وقيمىز. استانا جانە الماتىداعى مىقتى دەگەن دراماتۋرگتەردىڭ بارىمەن بايلانىستامىز. قورجىنىمىزدا بىرنەشە جاقسى دۇنيەلەر دە بار. ارينە، ساحناعا قويا سالۋ - رەپەرتۋار ساياساتىنىڭ ولشەنبەي جاسالعان نە بولماسا ولشەنىپ جاسالعان ساياساتىنا بايلانىستى. ادەمى جازىلعان ءبىر پەسا ءدال سونداي تاقىرىپتا، ءدال سونداي جانردا ءبىزدىڭ رەپەرتۋارىمىزدا بولۋى مۇمكىن. نە بولماسا ءدال سونداي تاقىرىپتا قويىلىپ كەتكەن بولۋى مۇمكىن. وسى سياقتى تولىپ جاتقان ءار ءتۇرلى سەبەپتەر بار. ودان كەيىن، ءوزىڭىز بىلەسىز، تەاتردا جىلىنا ءتورت-بەس-اق جاڭا شىعارما قويىلادى. ونىڭ بىرەۋى - الەمدىك دراماتۋرگيا، بىرەۋى - ادەمى جازىلعان بۇگىنگى كۇن تاقىرىبىنداعى اۋدارما دۇنيە بولۋى مۇمكىن. ءبىزدى اۋدارما دۇنيە قوياسىڭدار دەپ كىنالايدى.    نەگە قويماسقا؟ ونى نەگە قازاق كورەرمەنى بىلمەۋى كەرەك؟ مىسالى، شەۆرەنىڭ «ىزگىلىك فورمۋلاسى» اتتى اۋدارما تۋىندىسى بىزدە ءبىر جىل كولەمىندە قويىلدى. شىندىعىن ايتۋ كەرەك، ەڭ ءبىر جاقسى پىكىر تۋىنداتقان قويىلىم، كورەرمەنمەن اراداعى بايلانىستى تابا بىلگەن ادەمى شىعارما بولدى. قازاق دراماتۋرگياسىنا بارىپ تۇرۋىمىز كەرەك. مىنە، وسى جاعىنان العاندا بۇگىن جازىلعان شىعارمانىڭ ءبارىن بۇگىن ساحنادا قويۋعا مۇمكىندىك جوق. سارالاپ، سالماقتاپ بارىپ كورەرمەنگە ۇسىنامىز.

- ەركىن اعا، اۋدارما تۋرالى اڭگىمەنىڭ ۇشىن شىعاردىڭىز. جالپى، ەلىمىزدىڭ تەاترلارىنىڭ بارلىعىندا دەرلىك اۋدارما پەسالار كوپتەپ قويىلادى. ءوزىڭىز ايتپاقشى، بۇل قاللەكي تەاترىندا دا بار جاعداي. ەلوردا تەاترىنىڭ اۋدارما پەسالارىنىڭ دەڭگەيى قانداي؟

- جالپى، ادەبيەتتە اۋدارما ماسەلەسىنىڭ قانداي كوكەيكەستى ماسەلەلەرىنىڭ بار ەكەنىنەن حاباردارمىز. ال، ەندى تەاترعا اۋدارمانى اكەلۋدىڭ ونىڭ ۇستىنە قوسىلاتىن ماسەلەلەرى تاعى بار. ويتكەنى، ساحنا ءتىلى، ساحنا ءسوزى، ءسوز استارى، اكتەردىڭ سويلەۋ مانەرى، ءستيلى - وسىنىڭ بارلىعى اۋدارماعا ۇلكەن جاۋاپكەرشىلىك جۇكتەيتىن سالالار. وسى جاعىنان العاندا، پەسا اۋدارۋدىڭ ءوزى - ۇلكەن ماسەلە. كەيبىرەۋلەر: «رەجيسسەردىڭ ءوزى اۋدارىپ قويا سالادى» دەگەن سياقتى كىنا تاعۋى مۇمكىن. بىلەسىز بە، كەيدە تىكەلەي اۋدارمادان گورى ساحنالىق ارەكەتكە ۇلاستىرىلعان، رەجيسسەردىڭ ايتايىن دەگەن ويىنا جاقىن اۋدارما ساحناعا لايىق بولۋى مۇمكىن. ارينە، بۇل ماسەلەنىڭ پىكىرتالاس تۋدىراتىنىن مەن تۇسىنەمىن. دەگەنمەن دە، بۇل ەڭ الدىمەن سپەكتاكلدىڭ ايتار ويىنا، قويىلىمنىڭ يدەياسىنا كوپ بايلانىستى نارسە. سوندىقتان، تۇپنۇسقادان قازاقشاعا اۋدارۋ ماسەلەسىندە ەگجەي-تەگجەيلى سالماقتاپ كەلىپ كىرىسەتىنىمىز بار.

- ويدان وي تۋادى دەمەكشى، ءوزىڭىز دە ازدى-كوپتى پەسا جازعانىڭىزدى بىلەمىز. سونىڭ كوبىسى قاللەكي تەاترىندا ساحنالانىپ، كورەرمەندەرگە ۇسىنىلدى. مۇنىڭىزعا: «تەاتر باسشىسى ءوزى جازىپ، ءوزى قويادى» دەپ سىن ايتقاندار دا بولدى. وسىعان قانداي ءۋاج ايتاسىز؟!

- بىرىنشىدەن، ەشقانداي ءۋاج ايتاتىن ويىم جوق! ەكىنشىدەن، جازعان پەسامنىڭ ءبارى مەنىڭ تەاترىمدا قويىلىپ جاتىر دەگەن ونشا شىندىققا جاناسپايدى. مەنىڭ قانشا پەسا جازىپ، سونىڭ قانشاسى وزىمە ۇناماي قالعانى، قانشاسى ءوزىنىڭ ۋاقىتىن كۇتىپ جاتقانى تەك ماعان عانا ايان. سوندىقتان، مەنىڭ جازعاندارىم ءبىزدىڭ تەاتردىڭ رەپەرتۋارىنا سۇرانىپ تۇرماسا دا ساحنالاي  بەرۋگە مۇددەلى ەمەسپىن.

- ال، بەلگىلى ءبىر اۆتورلارعا قالاماقى تولەيسىزدەر مە؟

- مىندەتتى تۇردە. ءبىز ميلليونداردى توگىپ تاستاماساق تا، كەلىسىم-شارت جاساسىپ، قالاماقىنى تولەپ تۇرامىز.

- ەركىن اعا، مەن جۋرناليست رەتىندە دە، قاراپايىم كورەرمەن رەتىندە دە قاللەكي تەاترىن باقىلاپ كەلە جاتقانىما ءبىر جىلدان اسا ۋاقىت بولدى. مەنىڭشە، تەاترداعى جاس ارتىستەردىڭ ورنى ەرەكشە ءارى بولەك سەكىلدى. «اكەمتەاتر» اتانعان الماتىداعى مۇحتار اۋەزوۆ تەاترىنىڭ مايتالمان ءارتيسى  بەكجان تۇرىس اعامىز ماعان بەرگەن ءبىر سۇحباتىندا: «ەلوردا تەاترىنىڭ جاس اكتەرلەرىنە قىزىعامىن. ساحنادا ءوتىپ جاتقان قويىلىمدا ءجۇرىپ، تامادا بولىپ باسقاراتىن تويىن نەمەسە تۇسەتىن كينوسىن ويلاپ تۇراتىن ءبىزدىڭ تەاتردىڭ «جۇلدىزسىماق» جاستارى سەكىلدى ەمەس، ونەرگە شىن بەرىلگەن جاستار. سول جاستارمەن بىرگە كەرەمەت ءبىر قويىلىمدا ويناعىم كەلەدى» دەگەنى ەسىمدە. شىنىندا دا، سىزدەر جاس ارتىستەرىڭىز ماقتاۋعا دا، ولارمەن ماقتانۋعا دا تۇرارلىقتاي...

- بەكجان تۇرىس باسقالار تۋرالى كوپ پىكىر ايتا بەرمەيتىن، بىراق، ايتسا - ءدال، ورىندى ايتاتىن حالقىمىزدىڭ زيالى ازاماتتارىمىزدىڭ ءبىرى. مەن ونىڭ ءبىزدىڭ تەاتر، ءبىزدىڭ جاستار تۋرالى ايتىپ جۇرگەن جىلى لەبىزدەرىنە قاتتى قۋانىشتىمىن. بەكجان - مەن سىيلايتىن ونەردىڭ ناعىز مايتالماندارىنىڭ ءبىرى. بەكجانمەن سىيلاسىپ، كوپ جىل بىرگە قىزمەت اتقاردىق. مەن وسىنداي پىكىردى ءوزىم ايتىپ، ماقتانىپ جاتسام - ونىڭ ءسانى دە، رەتى دە ەش كەلمەس ەدى. مۇنداي ازاماتتاردىڭ ءبىزدىڭ جاستارعا بەرگەن باعاسىن - وتە قۇندى باعا دەپ ەسەپتەيمىن. ونىڭ ۇستىنە، شىن باعانى وسى ونەردە، ساحنادا جۇرگەن ازاماتتار بەرەدى دەپ بىلەمىن. تەاتردا - تەاتردى سۇيگەن ادام عانا جۇمىس ىستەۋى كەرەك. ەڭ الدىمەن، ساحنادا ءومىرىنىڭ ءمانى - تەاتر دەپ ويلايتىن ماماندار عانا جۇمىس ىستەسە كەرەك. قازىر ساناپ وتىرسام، استانا قالاسىنداعى قازاق ۇلتتىق ونەر ۋنيۆەرسيتەتىنەن تەاترعا توعىز بالانى جۇمىسقا قابىلداپپىن. العان بەتتە ەشقايسىسىن كوپشىلىك ساحناسىندا ءجۇرسىن، جەتپەي جاتقان جەرلەرگە تىعىن قىلايىن دەگەن ويىمدا ەش بولعان جوق. قايسىسىن السام دا، ارقايسىسىن بەلگىلى ءبىر ناقتى وبرازعا، رولگە العان ەكەنمىن. بۇل، ەڭ الدىمەن، ءبىزدىڭ تاراپىمىزدان ولارعا كورسەتىلىپ وتىرعان جاقسى مۇمكىندىك، زور سەنىم دەپ ويلايمىن. سول جاس، سول سەنىمدى اقتاۋ ءۇشىن جانە وزىنە كورسەتىلگەن سەنىمنىڭ ۇدەسىنەن شىعۋ ءۇشىن جۇمىس ىستەۋگە بار جاعدايدى جاسايمىز. ارينە، بىرەۋىنە پاتەر جەتپەي جاتىر، بىرەۋىنىڭ جالاقىسى كۇنكورىسىنە جەتپەي جاتىر. بىراق، ساحنادا جۇمىس ىستەۋ باقىتىنىڭ وزدەرىنە بۇيىرعانىن ولار قاتتى ءتۇسىنۋ كەرەك. مىسالى، گۇلجان اسپەتوۆا، تىلەكتەس مەيراموۆ، بولات ىبىراەۆتارمەن بىرگە قاتار ءجۇرۋ، ءتىپتى بولماسا قاسىنداعى سىرىم قاشقاباەۆ، نۇركەن وتەۋىلوۆپەن ارىپتەس بولۋ - كەشە عانا ۋنيۆەرسيتەت قابىرعاسىنان شىققان جاستار ءۇشىن وتە ۇلكەن باقىت. ءبىزدىڭ تەاتردا جاسامىس اكتەردىڭ وتىرىك گريم سالىپ الىپ جاس كەيىپكەردى ويناۋى مۇمكىن ەمەس. بەرىلگەن مۇمكىندىكتى پايدالانۋ كەرەكتىگىن جاستارعا تۇسىندىرۋگە تىرىسۋدامىن. اينۇر جەتپىسباەۆا، تاڭسۇلۋ مۇزاپپاروۆا، گاۋحار ءجۇسىپوۆا، شاحمۇرات ورداباەۆ، جانات وسپانوۆ، جاسۇلان ەربولات - بۇلاردىڭ بارلىعىنىڭ قورجىندارىندا قازىر ءبىردى-ەكىلى ۇلكەن رولدەرى بار جاستار. ەندى وسىلارعا بەكجان ايتقان «جۇلدىز اۋرۋى» جۇقپاسا ەكەن دەپ ويلايمىن. بۇلار كينوعا تۇسپەي جۇرگەن جوق، تەلەۆيدەنيەگە بارماي جۇرگەن جوق. توي باسقارماي جۇرگەن جوق. تەك بارلىعىنا رەتپەن قاراۋعا ۇيرەنسە دەيمىن. قۇنىعۋ - ەڭ جامان نارسە. ارينە، تويدا سپەكتاكلگە شىققاننان گورى كوبىرەك اقشا الادى. بىراق، ادام قاناعاتتى، ەڭبەكتىڭ ءلاززاتىن سالماقتاي الاتىن بولسا - ودان ۇلكەن ونەر ادامى شىعادى. اكتەرلىق وزىمەن ءوزى جۇمىس ىستەۋدەن تۋىندايتىن ونەر. كۇندە ەرتەسىمەن داۋسىن باپتاماسا، دەنەسىن شىنىقتىرماسا، ءتىل تەحنيكاسىمەن اينالىسپاسا - اكتەردىڭ توقتاپ قالۋى ءبىر-اق ساتتە. ونىڭ ەرتەڭ-اق رەجيسسەرگە كەرەك بولماي قالۋى مۇمكىن. ءسال جالقاۋلىقتىڭ شەتىن كورسەتكەن اكتەرمەن ءبىزدىڭ رەجيسسەرلەر جۇمىس ىستەمەيدى. نۇرلان جۇمانيازوۆتىڭ تالاپشىلدىعى، بولات ۇزاقوۆتىڭ سابىرمەن، سالماقپەن جۇمىس ىستەيتىن قاسيەتى، الىمبەك ورازبەكوۆتىڭ بۇرقىراعان تەمپەرامەنتى - اكتەرمەن جۇمىس ىستەۋدە وتە كىرپياز دۇنيە ەكەندىگىن ايتقىم كەلەدى.

- سوزىڭىزدە ەلىمىزدەگى ەڭ مىقتى دەگەن ءۇش رەجيسسەردىڭ اتىن اتاپ ءوتتىڭىز. ەلىمىزدەگى تەاترلاردىڭ كوبىسىندە رەجيسسەر ماسەلەسى اقساپ جاتقانى شىندىق. ءتىپتى، كەيبىرەۋلەرىندە باس رەجيسسەر دەگەن اتىمەن جوق. ال، سىزدەردە ەلىمىزدىڭ ەڭ مىقتىلار ساناتىنداعى تابانى كۇرەكتەي ءۇش رەجيسسەر ەڭبەك ەتىپ جاتىر...

- قازاقستانداعى مىقتى رەجيسسەرلار وسى ۇشەۋىمەن ءبىتىپ قالدى دەپ ايتۋعا بولمايدى. وكىنىشكە وراي، تەاترسىز جۇرگەن رەجيسسەرلار دا كوپ. ەڭ ءبىرىنشى قارىن اشاتىن نارسە - تەاتردى باسقاراتىنداردىڭ كوبىسىندە رەجيسسەرسىز تەاتر بولمايتىنىن تۇسىنبەۋشىلىك بار. «ەشتەڭە جوق، شاقىراسىڭدار دا، قويعىزا سالاسىڭدار» دەيدى. «ولارعا پاتەر، باسقا جاعداي قايدا؟» دەپ سالعىرت قاراۋدىڭ سالدارىنان كوپتەگەن ۇلكەن-ۇلكەن تەاترلاردا بىردە-ءبىر رەجيسسەر جوق نە بولماسا جاس تولقىن رەجيسسەردىڭ كەلۋىنە ەش مۇمكىندىك جوق. اشىعىن ايتقاندا، ءبىرىنشى كەدەرگى - جاعدايدىڭ جوقتىعى. ەگەر ارقايسىسىنا ءبىر-ءبىر پاتەر بەرىپ، جۇمىسقا شاقىرسىنشى، سول جەرگە بارىپ ولار جۇمىس ىستەيدى. مەن سول تەاترلارعا بارىپ تۇرىپ، جاعدايدىڭ جوقتىعىنان ءبىر جىل بويى ەكى ورتادا پويىزدا كۇنىن وتكىزگەن، اقىر اياعىندا ءبىر پاتەرگە قول جەتكىزە الماعان بىرنەشە رەجيسسەرلەردى بىلەمىن. رەجيسسەردىڭ جاۋاپكەرشىلىگى - تەاترداعى باسقا قىزمەتكەرلەرگە قاراعاندا وتە جوعارى. ءبىزدىڭ تەاتردىڭ جەتىستىگى - وسى رەجيسسەرلاردىڭ وتىمەن كىرىپ، كۇلىمەن شىعىپ ءجۇرۋىنىڭ ارقاسىندا.

- سىزدەردىڭ تەاتر - مۋزىكالىق-درامالىق سيپاتتا. كوپتەگەن سپەكتاكلدەرىڭىزدى تىكەلەي وركەستر سۇيەمەلدەيدى. مۇنى سىزدەردىڭ ارتىقشىلىقتارىڭىز دا، ەرەكشەلىكتەرىڭىز دە دەپ ايتۋىمىزعا ابدەن بولادى. مۋزىكالىق سيپاتتا، تىكەلەي وركەستر سۇيەمەلدەۋىمەن جۇمىس ىستەۋ قانشالىقتى قيىن؟!

- وتە قيىن. وركەستردىڭ ءوزىنىڭ ورىنداۋ قيىنشىلىعى بىلاي تۇرسىن، سپەكتاكلدە اكتەرگە ارەكەت ەتە ءجۇرىپ، وركەسترمەن جۇمىس جاساۋ، كورەرمەننىڭ جۇرەگىنە جول تابۋدىڭ قيىندىعىندا ءسوز جوق. بىزدە «جۇبايلاردىڭ جۇمباعى» دەگەن قويىلىم بار. ءوزىڭىز بىلەسىز، بىزدە وركەستر وتىراتىن ارنايى جاسالعان شۇڭقىر جوق. ءبىز وركەستردى دە، ارتىستەردى ساحناعا شىعارىپ قويعانبىز. وسى سپەكتاكلگە قاراپ وتىرساڭىز، بايلانىستى قاتتى سەزەسىز. ديريجەردىڭ تاياقشاسىنىڭ قيمىلداعانىنان باستاپ، ءار اكتەردىڭ ارەكەتىنە وركەستردى ىڭعايلاۋ، كەرىسىنشە وركەسترگە اكتەردى ىڭعايلاۋ، ولاردىڭ وركەسترىمەن ساناسۋى - وتە ۇلكەن ماشىقتىق. قۇرىلتايشىمىز - استانا قالاسىنىڭ اكىمدىگى ەكى جىلدان بەرى ءوزىمىزدىڭ وركەسترىمىزدىڭ اشۋعا مۇمكىندىك بەردى. بۇگىندە 18 ادامنان تۇراتىن كىشى سيمفونيالىق وركەسترىمىز بار. كۇندەلىكتى ارتىستەرىمىزبەن دايىندالىپ وتىرادى. باسقا جاقتان شاقىرعان وركەسترمەن كۇندە دايىندالۋ مۇمكىن ەمەس. «ماشىق» دەگەن ءسوزدى بەكەر ايتقان جوقپىن. ءىرى-ءىرى شىعارمالاردى كاسىبي دەڭگەيدە وركەستردىڭ سۇيەمەلدەۋىمەن ويناۋ ءۇشىن كۇندەلىكتى ماشىقتى تالاپ ەتەدى.

- قورجىندارىڭىزدا ءبىراز شىعارمالار جاتقانعا ۇقسايدى؟!

- بۇل سۇراعىڭىزعا ءبىر-اق نارسەنى ايتايىن. «تەاتردىڭ باسشىسى ايتقان، قالاعان، كورسەتكەن شىعارماسى عانا قويىلادى» دەيدى كەيبىرەۋلەر. شىن مانىندە، ولاي ەمەس. بۇل اكتەردىڭ، رەجيسسەردىڭ شىعارماشىلىعىنا كوپ بايلانىستى نارسە. قاي شىعارمانى الماستان بۇرىن، ول كوركەمدىك كەڭەستىڭ تالقىسىنا تۇسەدى. سول جەردە-اق قاي اكتەردىڭ سول شىعارمادا وينايتىنى، رەجيسسەردىڭ وسى شىعارما ارقىلى نە ايتقىسى كەلەتىندىگى ساراپتاۋدان وتەدى. مەن «پالەنباي دەگەن پەسا جاتىر، سونى قازىر قويامىن» دەپ ايتۋدان اۋلاقپىن. بۇل جۇرت سەنسە دە، سەنبەسە دە ۇجىم بولىپ شەشىلەتىن نارسە. كوركەمدىك كەڭەستىڭ ۇلكەن تالقىسىنان وتكەن ساحناعا شىعادى.

- وسىناۋ جيىرما جىل ىشىندە تەاتردىڭ قول جەتكىزگەن جەتىستىكتەرى جەتەرلىك. ال، تەاتر ارتىستەرىنىڭ الەۋمەتتىك «جەتىستىكتەرى» قالاي شەشىلىپ جاتىر؟!

- ءبارى ءبىر كۇندە بولا سالمايدى جانە ول مۇمكىن ەمەس. قالا اكىمشىلىگىنىڭ قولداۋى وتە ۇلكەن. باستى كەزەكتەگى باسپانا ماسەلەسى دە جولعا قويىلعان. سوڭعى ءۇش جىلدىڭ ىشىندە تەاتر قىزمەتكەرلەرىنە 21 پاتەر بەرىلدى. بۇل - ۇلكەن كورسەتكىش جانە ۇلكەن قولداۋ. اكادەميالىق مارتەبەگە يە بولعانىمىزعا بايلانىستى، تەاتر قىزمەتكەرلەرىنىڭ جالاقىسى دا ءبىرشاما ءوستى. ونەر ادامى ءۇشىن اتاق، ماراپات ماسەلەسى جاعىنان كەلەتىن بولساڭىز، ول جاعىنان دا كەندە ەمەسپىز. بىلتىر عانا ءۇش اكتەرىمىز - «قازاقستاننىڭ ەڭبەك سىڭىرگەن قايراتكەرى» اتاندى. سول سياقتى وردەن، مەدال العان كوپتەگەن اكتەرلارىمىز بار. جالپى ايتقاندا، قولداۋدان ەش كەندە ەمەسپىز.

- اعا، سوڭعى سۇراقتى، وزىڭىزگە قاتىستى قويۋعا رۇقسات ەتىڭىز. اياۋلى ازەكەڭدەي، ءازىربايجان مامبەتوۆتەي تۇلعادان كەيىن، قارا شاڭىراقتى باسقارۋ سىزگە وڭاي سوقپاعان بولار؟!

- بۇل ارينە قىزىق سۇراق. مەنىڭ جاۋابىم دا قانشالىقتى دۇرىس بولاتىنىن بىلمەيمىن. ازەكەڭ تەاتر باسقارعان ۋاقىت، ول كىسىنىڭ جۇمىس جاساعان ءستيلى - ول باسقا مەجە، باسقا بيىك. «مەن ازەكەڭدەي بولامىن، سول كىسىنىڭ ستيلىمەن جۇمىس جاسايمىن، سول كىسى جەتكەن بيىككە جەتەمىن» دەپ تالپىنسام، ەرسى كورىنەر ەدىم. ازەكەڭ - زامانىنىڭ تاۋ تۇلعاسى، حالقىنىڭ ارداقتى ۇلى. ءتىپتى، ول كىسىنىڭ جەتكەن مەجەلەرىن الامىن دەۋ دە مۇمكىن ەمەس. ويتكەنى، ول مەجەلەردىڭ ءوزى قازىر جوق. سوندىقتان، ازەكەڭ - تەاتردىڭ التىن تاريحى. ول كىسى تۋرالى ارتىق اۋىز ءسوز ايتۋدىڭ قاجەتتىلىگى جوق. ال، مەن بۇگىنگى كۇننىڭ ادامىمىن. ەڭ باستىسى، تەاتردىڭ الدىنا قويعان ماقساتىنا جەتۋ ءۇشىن تەاتردا قانشا ادام جۇمىس ىستەسە، بارلىعىن جۇمىلدىرا ءبىلۋىم كەرەك.

- مازمۇندى اڭگىمەڭىزگە كوپ راحمەت، اعا!

سۇحباتتاسقان

نۇرسۇلتان مىقتىباي

استانا قالاسى

«اباي-اقپارات»