09.06.12.
1 جانە 3 ماۋسىم كۇندەرى قىزىلوردا وبلىسىندا مەكتەپ بىتىرۋشىلەردى تەستىلەۋگە جىبەرۋ بارىسىندا مينيسترلىك وكىلدەرى تاراپىنان وقۋشىلارعا قاتتى قىسىم جاسالىنىپ، تالاپكەرلەر پسيحولوگيالىق جاعىنان سوققىعا دۋشار بولدى.

مەكتەپ بىتىرۋشىلەردىڭ 70 پايىزى ۇبت-عا جىلاپ كىرىپ، جىلاپ شىقتى. ءوز-وزىنە كەلە الماعان بىرنەشە تالاپكەر تەست جاۋاپتارىن بەلگىلەۋدە پاندەرىن اۋىستىرىپ تا الدى. مينيسترلىك وكىلدەرىنىڭ 3,5 ساعات بويعى قاتال كوزقاراسى مەن قاتتى ايقايلاپ سويلەگەن سوزدەرىنەن بىرنەشە تالاپكەردىڭ قان قىسىمى كوتەرىلىپ، كوپشىلىگى تەست تاپسىرمالارىن قالىپتى جاعدايدا ورىنداي المادى.
ۇزدىكسىز ەسكەرتۋلەر تالاپكەرلەردىڭ تاپسىرمانى تياناقتى ورىنداۋعا كەرى اسەرىن تيگىزدى.
تالاپكەرلەردى باقىلاۋ بارىسىندا مينيسترلىك وكىلدەرى تاراپىنان پەداگوگيكالىق جانە ەتيكالىق نورمالار ساقتالمادى. مينيسترلىك جىبەرگەن وكىلدەر ينديرا ەرعاليەۆا، گۇلجان سارسەنباەۆالار كابينادا قىزداردى شەشىندىرىپ، ىشكيىمدەرىنە دەيىن تەكسەرىپ، ونسىز دا قوبالجىپ كەلگەن شاكىرتتەردىڭ ميىنا پسيحولوگيالىق اۋىرتپالىق سالدى. ال وگان اتكەلدي ولاردان قالىسپاي، وقۋشى بالالاردىڭ شۇلىقتارىنا دەيىن شەشۋدى تالاپ ەتتى. كوبىنە قىز بالالار كابينادان جىلاپ شىعىپ جاتتى. مينيسترلىكتەن كەلگەن وكىلدەر كوميسسياعا جەرگىلىكتى جەردەن قوسىلعان بىزدەردى ادام ەكەن دەمەدى. بۇل ارەكەتتى توقتاتۋدى ايتقان بىزگە «سەندەر ەشتەڭە بىلمەيسىڭدەر» دەپ ءبىزدىڭ كەتۋىمىزدى تالاپ ەتتى. ولار وقۋشىنىڭ ۇستىنەن ءتونىپ، ويلانۋعا مۇمكىندىك بەرمەي تۇردى. كوميسسيا مۇشەسى رەتىندە مەن مۇنى ناقتى دالەلدەي الامىن. ىشتەن جىلاپ شىققان بالالارىن كورىپ، اتا-انالاردىڭ دا قان قىسىمى كوتەرىلگەنىن كوردىك. «جەدەل جاردەم» ءۇستى-ۇستىنە كەلىپ جاتتى.
ءبىرىنشى ماۋسىم كۇنى ۇبت كەزىندە 5 قىز تالىپ قالىپ، ىشكە قايتا كىرگىزىلىپ، العاشقى كومەك كورسەتىلدى. 11 بالا جىلاپ شىعىپ، بىرنەشە ۋاقىت ەستەرىن جيا الماي قالسا، 1 ەر بالا كۇيزەلىسكە ۇشىراپ، باسىن قابىرعاعا سوقتى.
قالاي ايتقاندا دا، مينيسترلىك تاراپىنان جىبەرىلگەن كوميسسيا وكىلدەرىنىڭ ارەكەتتەرى ۇكىلى ۇمىتپەن كەلگەن تۇلەكتەرگە تۇرپىدەي ءتيدى. قازاقستان رەسپۋبليكاسى كونستيتۋتسياسىنىڭ 17-بابىنىڭ، 1-تارماعى بۇزىلىپ، ومىرگە ەندى قادام باسقالى وتىرعان بالالارىمىز ۇلكەن پسيحولوگيالىق-مورالدىق تۇرعىدان سوققى الدى. بالا اۋديتورياعا كىرمەي جاتىپ اياق-قولى دىرىلدەپ، ءمۇساپىر حالگە ءتۇستى. اۋديتوريا ىشىندە تەحنيكالىق بەينەقۇرالدارىمەن قوسا بالانى مينيسترلىك وكىلدەرى باقىلاپ، قيت ەتسە، ەسكەرتۋ جاساپ، «ارتىڭا قاراما»، «قوزعالما!» «اكت تولتىرامىن» «ۋ كوگو ەششە سو سلۋحوم پروبلەمى» دەپ جۇيكەسىنە ءتيدى.
ءبىلىم جانە عىلىم ءمينيسترى باقىتجان جۇماعۇلوۆ 2012 جىلدىڭ 1 ماۋسىمىندا باق وكىلىنە بەرگەن سۇحباتىندا: «ءبىز تۇلەكتەرگە ادامگەرشىلىك تانىتىپ، ولاردىڭ جەكە تۇلعالىق قاسيەتىن قاستەرلەۋىمىز قاجەت. ۇيالى تەلەفوندى قولدانعان جاعدايدا، بۇكىل اۋديتورياعا ماسقارالاپ شىعارىپ جىبەرمەي، تەلەفوندى عانا الىپ، بالا جۇمىسىن جالعاستىرۋى كەرەك. اۋديتوريادان قۋىپ جىبەرۋگە قاتاڭ تىيىم سالامىن. ومىردە كىم قاتەلەسپەيدى. سوندىقتان ءتيىمدى جولىن قاراستىرىپ، بالاعا تۇسىنىستىكپەن قاراۋىمىز كەرەك، ويتكەنى ءاربىر بالا - تۇلعا» دەگەنى بەلگىلى.
ال ءمينيستردىڭ ءسوزىن كوميسسيا مۇشەلەرى نەلىكتەن قاپەرگە المادى؟ مينيسترلىك وكىلدەرىنىڭ مۇنىسى نەسى؟

ميۋا باينازاروۆا
قىزىلوردا وبلىسى