ءبىر كۇن بۇرىن ءماجىلىس قازاقستاندا وكىلدىگى جوق الەۋمەتتىك جەلىلەردى بۇعاتتاۋ تۋرالى زاڭ جوباسىنا تۇزەتۋدى ءبىرىنشى وقىلىمدا ماقۇلداعان. تۇزەتۋ قوعامدا ءتۇرلى پىكىر تۋعىزعان.

بەيسەنبى كۇنگى مالىمدەمەسىندە ء"ادىل ءسوز" دەپۋتاتتاردىڭ بۇل ارەكەتىن سىناپ، اتالعان نورما اقپارات الۋ مەن تاراتۋ، ينتەرنەتتى پايدالانۋ قۇقىعىن شەكتەيدى دەپ ماسەلەگە الاڭداعان.

قور وكىلدەرىنىڭ پىكىرىنشە، دەپۋتاتتار بالالار قىلمىسى مەن ءسۋيتسيدتىڭ كوبەيۋىن ينتەرنەتتەن كورىپ وتىر. ەندەشە "اس ءۇي پىشاقتارىن شىعاراتىن وندىرۋشىلەردى دە وكىلدىك اشۋعا مىندەتتەپ، پىشاقتاۋ قىلمىسىن ازايتايىق" دەپ سىنادى ءباسپاسوز قورى.

"بالالاردى ينتەرنەتتىڭ كومەگىمەن ۋلاپ جاتىر. كيبەربۋللينگ – پسيحولوگيالىق ولقىلىق، اگرەسسيا، قىلمىس ءتىپتى سۋيتسيد جاساۋعا سەبەپ دەيدى. ال وتباسى، مەكتەپ، مەديتسينا جانە تاعى باسقالار دەپۋتاتتار ءۇشىن ماسەلە ەمەس سياقتى. اقپارات مينيسترلىگىنىڭ دە مازاسى كەتكەن: 2020 جىلى شامامەن 20 مىڭ كيبەربۋللينگ فاكتىسىن انىقتاپ، سونداي ماتەريالدى جويۋ جونىندە 1,8 مىڭ ءوتىنىش جازعان" دەلىنگەن قور مالىمدەمەسىندە.

قور وكىلدەرى Facebook'تا قازاقستاندىق قولدانۋشىلار ۇلەسىنىڭ از ەكەنىن العا تارتىپ، "ال ەگەر بۇل الىپ كومپانيا قازاقستاندا تىركەلگىسى كەلمەسە شە؟" دەگەن سۇراق قويادى.

ء"ادىل ءسوزدىڭ" دەرەگىنشە، الەمدە 12 ەلدە عانا مەسسەنجەر مەن الەۋمەتتىك جەلىلەردى شەكتەيدى، ال ولاردى دامىعان ەلدەر قاتارىنا كىرگىزۋ قيىن، ەسەسىنە ولار ءسوز بوستاندىعى بويىنشا ارتتا كەلەدى. ء"بىزدىڭ دەپۋتاتتار نە ءۇشىن قازاقستاندى سولاردىڭ قاتارىندا كورگىسى كەلەدى ەكەن؟" دەپ جازدى مالىمدەمە اۆتورلارى.

"بۇل نورما اقپارات الۋ مەن تاراتۋ، ينتەرنەتتى پايدالانۋ قۇقىعىنىڭ شەكتەلۋىنە اپارادى، قازاقستاننىڭ حالىقارالىق قاۋىمداستىق الدىندا بەدەلىن تومەندەتىپ، ەكونوميكالىق ىنتىماقتاستىق پەن دامۋ ۇيىمىنا كىرۋىنە، ەلگە ينۆەستيتسياعا تارتۋعا، ازاماتتار مەن بيزنەستىڭ ىسكەرلىك بەلسەندىلىگىنىڭ تومەندەۋىنە، جارناما مەن ەلەكتروندى ساۋدانىڭ دامۋىنا كەدەرگى جاسايدى" دەلىنگەن مالىمدەمەدە.

Abai.kz