اۋعانستاننىڭ بۇرىنعى پرەزيدەنتى اشراف عاني ەلدەن وزبەكستان ارقىلى ابۋ - دابيگە قازاقستاندىق اۆياكومپانيانىڭ ۇشاعىمەن قاشىپ كەتكەنى انىقتالدى. 

«Flight Radar مالىمەتى بويىنشا، ءدال سول كۇنى تەرمەزدەن (وزبەكستان) ابۋ-دابيگە ۇشقان FJK-1255 رەيسى FlyJet قازاقستاندىق كومپانياسىنا تيەسىلى. چارتەرلىك كومپانيانىڭ بەس قۇرلىقتا كەڭسەلەرى بار. ءدال وسى ۇشاقتا اشراف عاني مەن ونىڭ 53 سەرىگى 16 تامىزدا ساعات 23.00-دە تەرمەزدە 31 ساعاتتىق بوگەلىستەن كەيىن ابۋ-دابيگە ۇشىپ كەتتى. بۇل ۇشاقتى جالعا الۋدىڭ ەگجەي-تەگجەيى- ءارى قاراي زەرتتەۋدى قاجەت ەتەتىن تاعى ءبىر ماسەلە»،- دەلىنگەن «اۋعانستان پرەزيدەنتى اشراف عانيدىڭ ەلدەن قالاي قاشىپ كەتكەنى تۋرالى ايتىلمايتىن اڭگىمە» اتتى ماقالادا.

FlyJet سايتىنداعى اقپاراتقا سايكەس، كومپانيانىڭ كەڭسەسى الماتىدا ورنالاسقان.

«FlyJet جەكە ۇشاعىندا ءار رەيس بىرقالىپتى جانە تىنىش جۇرەدى. تەرمينال ارقىلى جەدەل ترانزيت جانە قاۋىپسىزدىك، كەزەك پەن قۇپيالىلىقتىڭ جوقتىعى - ءسىز ءوزىڭىزدىڭ جەكە، ءساندى جابدىقتالعان اۋە كەمەسىنىڭ بىرىندەسىز، ول ءسىزدى مەجەلى جەرگە اپارادى. سەبەبى ءسىزدىڭ جايلىلىعىڭىز ءۇشىن - ءبىز كۇن سايىن جۇمىس جاسايمىز»،- دەلىنگەن اۋە كومپانياسىنىڭ سايتىندا.

RadarBox ۆەب-سايتىنداعى اقپاراتقا سايكەس، FJK-1255 بۇل - Canadair CL-600-2B19 ايماقتىق رەاكتيۆتى CRJ-200ER (Bombardier CRJ200). قازىرگى ۋاقىتتا بۇل ۇشاق شىنىمەن FlyJet -تە تىركەلگەن.

ەستەرىڭىزگە سالا كەتەيىك، 15 تامىزدا اۋعانستاندا بيلىك تاليبان قوزعالىسىنىڭ باقىلاۋىنا ءوتتى. ەل پرەزيدەنتى اشراف عاني وتستاۆكاعا كەتىپ، بۇرىنعى بارلىق بيلىك ەليتاسىمەن بىرگە قاشىپ كەتكەن بولاتىن.

Abai.kz