سەناتور مۇحتار قۇل-مۇحاممەد پالامەنت وتىرىسىندا ۇكىمەتتىڭ وتستاۆكاعا كەتۋىن تالاپ ەتتى. بۇعان باستى سەبەپ - اسقار مامين باسقاراتىن مينيسترلەر كابينەتىنىڭ ازىق-تۇلىك باعاسىنىڭ وسۋىنە جول بەرگەندىگى.

- بيلىكتىڭ باستى مىندەتى – ازىق-تۇلىك باعاسىن تومەندەتۋ. بىراق وندىرۋشىلەر تاراپىنان ادەيى جاسالىپ جاتقان ارەكەت سەكىلدى كورىنەدى. ەگەر مينيسترلەر كابينەتى ينفلياتسيانى توقتاتا الماسا، ونى باسقا ادامدار ىستەۋ كەرەك. مەنىڭ ويىمشا ەگەر بيلىك بەرىلگەن تاپسىرمانى دۇرىس ورىنداي الماسا، وندا وتستاۆكاعا كەتۋى قاجەت. ال ازىرگە ولاردىڭ جۇمىسىن 3 دەپ باعالايمىز، - دەدى سەنات دەپۋتاتى مۇحتار قۇل-مۇحاممەد.

وتكەندە پاندەميا باستالعالى ءبىر جارىم جىلدان كەيىن جۋرناليستەردى العاش رەت پارلامەنت عيماراتىنا كىرگىزگەن ەدى. جۋرناليستەر ءدال وسى ماسەلە جونىندە پرەمەر-مينيستر اسقار ءماميننىڭ وزىنەن دە جاۋاپ الۋعا تىرىسقان. الايدا  جان-جاعىنان قاۋمالاعان تىلشىلەر ميكروفونىنان ۇرىككەن ۇكىمەت باسشىسى ءۇنسىز كەتكەن. دالىرەك ايتساق، تۇر قاشىپ، جەدەلساتىعا بارىپ تىعىلعان.  

سەناتور قويعان تالاپ ورىندى. ويتكەنى بيلىك باعانى تۇراقتاندىرۋ ءۇشىن بدجەتتىڭ 45 ميلليارد تەڭگەسىن جۇمساعان. بۇل اقشاعا الەۋمەتتىك ماڭىزى بار تاۋارلار ساتىپ الىنادى دەلىنگەن. سول ەسەپپەن، وسى اپتادا 306 مىڭ توننا ازىق-تۇلىك اكەلىنگەن. بىراق سوندا دا ازىق-تۇلىك باعاسى ارزانداماي تۇر. ال حالىقتىڭ تۇرمىسىن قىمباتشىلىق كۇن ساناپ قىسىپ بارادى.

وسى اپتادا دا ازىق-تۇلىك ونىمدەرى تاعى 0,2%-عا قىمباتتاعانىن قۇزىرلى ورگاندار رەسمي مالىمدەدى. باسەكەلەستىكتى قورعاۋ جانە دامىتۋ اگەنتتىگى ساۋدا جەلىلەرىمەن 17 كەلىسىمگە قول قويىپتى. دۇكەندەردە تاۋارعا ۇستەمە 15%-دان 10%-عا دەيىن تومەندەمەك. بىراق مۇنىڭ قاشان بولاتىنى بەلگىسىز. قازىر نارىقتا قانت، ءسابىز، جۇمىرتقا قىمباتتادى.

وسىعان دەيىن پارلامەنت وتىرىسىندا ءۇش جىلعا ارنالعان ەل بيۋدجەتىن تالقىلاعان دەپۋتاتتار، ازىق-تۇلىك باعاسىنىڭ وسۋىنە قاتىستى دا ءبىراز تارتىس جاساعان. ولارعا اسىرەسە، جەرگىلىكتى كوكونىس، ەت پەن نان سەكىلدى ونىمدەردىڭ باعاسىنىڭ تىم ءوسىپ كەتكەنى تۇسىنىكسىز. شەنەۋنىكتەر بۇل ماسەلەگە جاھاندىق ينفلياتسيانى كىنالاپ وتىر.

نازەركە التايقىزى

Abai.kz