جولداسىم مۇعالىم، باستاۋىشقا ءومىر بويى ساباق بەرىپ زەينەتكەرلىككە شىققان. ەندى 1-كلاسسقا باراتىن نەمەرەمە قوسىمشا ساباق بەرىپ ءجۇر. قاسىندا تىڭداپ وتىرىپ ەرىكسىز جاعامدى ۇستايمىن. نەمەرەم سولاقاي. قازىر، قۇدايعا شۇكىر، قاي قولىڭ ىڭعايلى بولسا سونىمەن جازۋعا رۇحسات بەرىپتى. بۇرىن قالايدا وڭ قولعا قالام ۇستاتىپ زورلاپ ۇيرەتىپتى. ونى كىم ويلاپ تاپقان - ول دا بەلگىسىز كۇيىندە كەتتى، تابيعات زاڭىنا قارسى شىققانى ءۇشىن ەشكىم جازالانباعان دا شىعار، كىم ءبىلىپتى.

تاڭ قالاتىن سەبەبىم - تۇسكە دەيىن وقىپ كەلگەنى ءوز الدىنا، تۇسقايتا ەندى تاعى 2-3 ساعات وقىپ، ۇيگە بەرىلگەن تاپسىرمانى زورعا تاۋىسادى. سوندا بالا قاي ۋاقىتتا وينايدى؟ نە دەگەن كوپ ساباق؟ بۇگىنگە بولدىڭدار ما دەسەم، جوق، ءالى اعىلشىن ءتىلى بار دەگەندە شالقامنان تۇسە جازدادىم. ەپت. مىنا مۇعالىمدەردىڭ ەسى اۋىسقان با، ءالى دۇرىس جۇرگىزىپ وقي المايتىن بالاعا اعىلشىن ءتىلى نەسى؟ ونسىز دا ورىسشا مۋلتيك كورىپ، اۋلاداعى ورىسشا سويلەيتىن بالالارمەن ارالاسىپ جۇرگەن بالانىڭ باسى ەندىگى اتالا بولعان شىعار؟

ارينە، ءبىرىنشى كلاسستا قالاي وقىعانىم ەسىمدە جوق، بىراق 3-4 كلاسستاردا تۇسقايتا ءبىر كەزەك ويناپ، ءۇيدىڭ دە شارۋاسىن تىندىرىپ، قويلاردى قوراعا قاماپ، جەمىن سالىپ، كەشكە ۇيگە ءبىر-اق كەلەتىنىمىز ەستە قالىپتى. ودان كەيىنگى كلاسستاردا دا سوعان ۇقساس تىرلىك ءجۇرىپ جاتتى. ەگەر پەداگوگتار اقىرى سولايقاي بالاعا سول قولىمەن جازۋعا رۇحسات بەرگەن بولسا، وندا ءدال سونداي تابيعي زاڭدىلىق - ءبىر كەزەك اسىر سالىپ ويناۋعا نەگە مۇمكىندىك قالدىرماعان؟

ابىروي بولعاندا جولداسىم باستاۋىش كلاسس مۇعالىمى، ونىڭ بىتىرگەن بالالارى ۇنەمى مەكتەپتە جوعارى كورسەتكىشتەرىمەن كوزگە تۇسكەن. بىلاي ومىردە دە سىيلاپ جۇرەدى العاشقى ۇستازىن. ال ەلدىڭ ءبارىنىڭ بىردەي اجەسى باستاۋىش كلاسس مۇعالىمى ەمەس قوي، سولاردىڭ نەمەرەلەرى قايتىپ جاتىر ەكەن دەپ ويلايمىن دا. ءبىزدىڭ ءوزىمىز زورعا ۇلگەرىپ جۇرگەندە باسقالاردىڭ ءتىپتى باسى قاتىپ كەتكەن شىعار؟ قانشاما رەفورما جاساسا دا اقىرى كەلىستىرە المادى.

قۋانىش ەدىلحانتەگى

Abai.kz