|
13.07.12.
مىڭتەكە مۇناي كەن ورنىندا كوشى-قون پوليتسياسىنىڭ قىزمەتكەرلەرى ەشقانداي قۇجاتسىز جۇمىس ىستەگەن قىتايلىقتاردى انىقتادى. اقتوبە وبلىسى ارقىلى كەلگەن «قوناقتار» كوپ ۇزاماي، اتىراۋ وڭىرىنە كەلىپ جەتكەن. ءتىپتى، ولار يساتاي اۋدانى اۋماعىنداعى مىڭتەكە كەن ورنىنا قىزمەتكە تۇرعان. قۇلقىندارىن تابىس كوزى تەسكەن قىتايلىقتار جەرگىلىكتى جەردىڭ كوشى-قون پوليتسياسىنا بارىپ تىركەلۋ كەرەكتىگىن دە «ەستەن» شىعارىپ العان.
ءتىپتى، كوشى-قون پوليتسياسى ولاردى انىقتاعان كەزدە، قىتايلىقتاردىڭ جۇمىس جاساۋعا رۇقساتى تۇرماق، ولاردىڭ جەكە باستارىن كۋالاندىراتىن ءتول قۇجاتتارى دا بولماي شىقتى.
اتىراۋ ءوىىد-ءنىڭ ءباسپاسوز قىزمەتىنىڭ جەتەكشىسى گۇلنازيرا مۇحتاروۆانىڭ ايتۋىنشا، قىتاي ەلىنىڭ 21 ازاماتى «سينوپەك» كومپانياسىندا قىزمەت ەتىپ كەلگەن. قازىرگى كۇنى ولار ۋاقىتشا قابىلداۋ-ءبولۋ ورنىنا قامالدى. ولاردىڭ ەندىگى تاعدىرىن سوت شەشەتىن بولادى.
جالپى، بۇل مۇنايلى وڭىردەگى شەتەلدىكتەر تاراپىنان بولىپ وتىرعان ورەسكەل زاڭ بۇزۋشىلىقتىڭ ءبىرى عانا ەمەس. جىل باسىنان بەرى سولتۇستىك كاسپي جوباسى بويىنشا قاراباتانداعى زاۋىت قۇرىلىسىندا ەلىمىزدىڭ زاڭىن بەلدەن باسىپ، جۇمىس ىستەپ جۇرگەن 340 شەتەلدىك ازامات انىقتالدى. تابىس تابۋدى ماقسات ەتكەندەر رەسەيدى ايتپاعاندا، يتاليا
مەن ءۇندىستاننان كەلىپتى.
|
