بۇگىن ماجىلىستە پالاتا توراعاسى نۇرلان نىعماتۋلين پولشا رەسپۋبليكاسىنىڭ سەنات مارشالى  توماش گرودزكيمەن كەزدەسىپ، ەكى ەل اراسىنداعى ىنتىماقتاستىقتى دامىتۋدىڭ  وزەكتى ماسەلەلەرى بويىنشا پىكىر الماستى.

پالاتا سپيكەرى كەلەسى جىلى قازاقستان مەن پولشا اراسىنداعى ديپلوماتيالىق قاتىناستاردىڭ ورناعانىنا 30 جىل تولاتىنىن اتاپ ءوتىپ، وسى جىلدار ىشىندە ەلدەر اراسىندا سەنىمدى ساياسي ديالوگ ورناعانىن، ساۋدا-ەكونوميكالىق جانە مادەني-گۋمانيتارلىق ىقپالداستىقتىڭ بەلسەندى دامىعانىن جەتكىزدى.

كەزدەسۋ بارىسىندا ءماجىلىس توراعاسى قازاقستاننىڭ تۇڭعىش پرەزيدەنتى نۇرسۇلتان ءابىشۇلى نازارباەۆتىڭ قازاقستان-پولشا ىنتىماقتاستىعىن نىعايتۋعا قوسقان ۇلەسى ەرەكشە ەكەنىن، وسى جولدا مەملەكەت باسشىسى قاسىم-جومارت توقاەۆتىڭ ەلدەر اراسىنداعى جان-جاقتى ارىپتەستىكتى دامىتۋعا زور ءمان بەرەتىنىن اتاپ ءوتتى.

نۇرلان نىعماتۋليننىڭ ايتۋىنشا، مارتەبەلى مەيماننىڭ ەلىمىزگە ساپارى پارلامەنتارالىق ديالوگتى ودان ءارى نىعايتۋعا جانە ەلدەرىمىز اراسىنداعى ەكىجاقتى ءوزارا ءىس-قيمىلدى كەڭەيتۋگە ەلەۋلى سەرپىن بەردى.

ءوز كەزەگىندە، توماش گرودزكي  قازاقستانمەن ءوزارا ءىس-قيمىلدى دامىتۋ، حالىقتار اراسىنداعى قاتىناستار دوستىق پەن ءوزارا كومەك نەگىزىندە قۇرىلاتىنىن اتاپ ءوتىپ، قازاقستاندا ءتۇرلى ۇلت وكىلدەرىنىڭ دوستىق پەن كەلىسىمدە ءومىر ءسۇرىپ جاتقانىنا قىزىعۋشىلىق تانىتتى.

سونىمەن قاتار، تاراپتار پارلامەنتارالىق ديالوگتى ارتتىرۋعا ەرەكشە نازار اۋداردى.

وتىرىس بارىسىندا نۇرلان نىعماتۋلين مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان ساياسي جۇيەنى رەفورمالاۋ، ازاماتتىق قوعامدى دامىتۋ جونىندەگى جۇمىستارعا نازار اۋداردى. ءماجىلىس توراعاسى سونداي-اق، قازاقستان پارلامەنتى ەلدى ساياسي جاڭعىرتۋ ءۇشىن قاجەتتى زاڭنامالىق بازانى قامتاماسىز ەتە وتىرىپ، بۇل پروتسەسكە بەلسەندى تۇردە تارتىلعانىن اتاپ ءوتتى.

ءماجىلىس توراعاسى پارلامەنتارالىق بايلانىستاردى نىعايتۋدىڭ ماڭىزدىلىعى تۋرالى ايتا كەلىپ، پولياك ارىپتەسىنە قازاقستاندىق جانە پولياك پارلامەنتشىلەرىنىڭ ىنتىماقتاستىق جونىندەگى توپتار، سونداي-اق زاڭنامالىق تاجىريبەمەن الماسۋ ءۇشىن ءتيىستى كوميتەتتەر دەڭگەيىندەگى ءوزارا بايلانىستى كۇشەيتۋدى ۇسىندى.

ءوز كەزەگىندە، سەنات مارشالى توماش گرودزكي پولياك سەناتورلارىنىڭ قازاقستانمەن بارلىق سالادا ىنتىماقتاستىقتى دامىتۋعا قاجەتتى قولداۋ كورسەتۋگە دايىن ەكەندىگىن ايتتى.

كەزدەسۋ سوڭىندا ءماجىلىس توراعاسى نۇرلان نىعماتۋلين پولياك ارىپتەستەرىن جانە پولشا حالقىن 11 قاراشا كۇنى اتاپ وتەتىن ۇلتتىق مەرەكە –پولشا تاۋەلسىزدىگى كۇنىمەن قۇتتىقتادى.

نۇرلان نىعماتۋلين مەن توماش گرودزكي قازاقستاندىق جانە پولشالىق پارلامەنت وكىلدەرى اراسىنداعى ديالوگتى جانداندىرۋ ەكى ەل ءۇشىن دە ءتيىمدى بولاتىنىنا سەنىم ءبىلدىردى.

Abai.kz