قر پرەزيدەنتى قاسىم-جومارت توقاەۆ جاھاندىق جىلىنۋ ۇدەرىسى، سۋ جانە ازىق-تۇلىك قاۋىپسىزدىگى، ترانسشەكارالىق سۋ رەسۋرستارىن ءتيىمدى پايدالانۋ سەكىلدى اسا ماڭىزدى ماسەلەردى بىرلەسىپ شەشۋ قاجەتتىگىن ايتتى. 

«بۇگىندە بارشا ادامزات جاھاندىق جىلىنۋ ۇدەرىسىنە الاڭداپ وتىر. حالىقارالىق قاۋىمداستىق وسىعان بايلانىستى شۇعىل شارالار قابىلداۋعا مۇددەلى. قازىر سۋ جانە ازىق-تۇلىك قاۋىپسىزدىگىن قامتاماسىز ەتۋ – وزەكتى ماسەلە. ءبىز بيداي ەگىپ، ۇن وندىرەتىن ەڭ ءىرى ون ەلدىڭ ساناتىنا كىرەمىز. جىل سايىن سىرتقى نارىققا 7 ميلليون تونناعا دەيىن بيداي شىعارامىز»، - دەدى مەملەكەت باسشىسى تۇركى مەملەكەتتەرى ۇيىمىنىڭ سامميتىندە.

قازاقستان – ورتالىق ازياداعى استىق ەكسپورتتايتىن بىردەن-ءبىر مەملەكەت.

«الايدا، ءبىزدىڭ ەلىمىزدەگى بيداي ءونىمىنىڭ ازايۋىنا جول بەرمەۋ ءۇشىن، سونداي-اق، بۇكىل ايماقتىڭ ازىق-تۇلىك قاۋىپسىزدىگىنە قاتەر توندىرمەۋ ءۇشىن ترانسشەكارالىق سۋ رەسۋرستارىن ءتيىمدى پايدالانۋىمىز كەرەك. بۇل – وتە ماڭىزدى مىندەت. تۇپتەپ كەلگەندە، وسىنداي شارالار ءبىزدىڭ ەلدەرىمىزدىڭ ءوسىپ-وركەندەۋىنە تىكەلەي ىقپال ەتەدى. سوندىقتان، وزدەرىڭىزبەن بىرلەسىپ، گيدروقۇرىلىمدار سالۋعا دايىنبىز»، - دەدى پرەزيدەنت.

بۇدان بۇرىن حابارلانعانداي، «تۇركىتىلدەس مەملەكەتتەردىڭ ىنتىماقتاستىق كەڭەسى» ەندى «تۇركى مەملەكەتتەرى ۇيىمى» دەپ اتالدى.

Abai.kz