«سبەربانك» ورتالىق جانە شىعىس ەۋروپاداعى ءوزىنىڭ ەنشىلەس نەسيەلىك ۇيىمدارىن ساتۋ تۋرالى كەلىسىمگە قول قويدى. 100% رەسەيگە تيەسىلى بانكتىڭ ءباسپاسوز قىزمەتى: «Sberbank Europe AG جاڭا بيزنەس-مودەلدەردى زەرتتەپ، نارىقتىڭ ءتيىمدى جاعىنا كوڭىل ءبولۋ ءۇشىن ورتالىق جانە شىعىس ەۋروپاداعى ورنىن بوساتۋعا شەشىم قابىلدادى»، - دەپ مالىمدەگەن.

بۇعان دەيىن «سبەربانك» توراعاسىنىڭ ورىنباسارى لەۆ حاسيس بانكتىڭ تۇركيا نارىعىنان كەتكەنىن جانە ەۋروپا نارىعىنان كەتۋىنە گەوساياسي جاعدايلار سەبەپ بولىپ وتىرعانىن ايتقان بولاتىن.

رەسەي قىرىم اۋماعىن كۇشتەپ قوسىپ العاننان كەيىن ەۋرووداق پەن اقش سانكتسياسىنىڭ استىندا قالعان. «سبەربانك» كاپيتالىنىڭ ەۋروپالىق جانە امەريكالىق قارجى نارىعىنا شىعۋىنا شەكتەۋ قويىلعان.

الەمنىڭ الپاۋىت ەلدەرى رەسەي بانكىنەن ىرگەسىن اۋلاق سالۋعا تىرىسۋدا، ال، ءبىزدىڭ بيلىك «سبەربانككە» «حالىقتىڭ جەكە دەرەكتەرىن» سەنىپ تاپسىرماق.

پرەمەر-مينيستر اسقار مامين «قازاقستان ءۇشىن «سبەربانك» پلاتفورماسى تسيفرلىق ترانسفورماتسيادا جەكە دەرەكتەردى قورعاۋ جاعىنان ەڭ ءتيىمدىسى» دەپ سانايدى.

«تسيفرلىق ترانسفورماتسيا ەڭ باستىسى، مەملەكەتتىك قىزمەتتىڭ جانە مەملەكەتتىك باسقارۋ جۇيەسىنىڭ ساپاسىن كوتەرەدى، حالىققا قولجەتىمدىلىگىن ارتتىرادى. ۇلكەن كولەمدەگى دەرەكتەر كەزىندە جىلدام جانە ءتيىمدى شەشىم قابىلداۋعا تسيفرلىق ترانسفورماتسيانىڭ كومەگى زور. وسى ماسەلە تۇرعىسىنان كەلگەندە ءبىزدىڭ پلاتفورمالىق شەشىمدەرگە بەت بۇرعانىمىز دۇرىس. قازىرگى ۋاقىتتا بىرنەشە پلاتفورمالىق شەشىم بار. ءبىز وسى مىندەتتى ىسكە اسىرۋ اياسىندا قانداي مۇمكىندىكتەرىمىز بار ەكەنىن مۇقيات زەرتتەدىك. حۋاۆەي، مايكروسوفت، وزدەرىڭىز بىلەتىن امازون بار. بىراق وسى ماسەلەنى زەرتتەگەندە اقپاراتتىق قاۋىپسىزدىكتى قامتاماسىز ەتۋدى ءبىرىنشى ورىنعا قويدىق. جەكە دەرەكتەردى قورعاۋ تۋرالى ءاردايىم ايتىپ كەلەمىز. وسى تۇرعىدا بىزگە ەڭ قولايلىسى جانە ءتيىمدىسى – «سبەر» پلاتفورماسى»، -  دەگەن ەدى پرەمەر-مينيستر.

ءماميننىڭ ايتۋىنشا، بۇل جۇمىسقا وتاندىق IT ماماندارى شاقىرىلادى، سوندىقتان جەكە دەرەكتەردىڭ قاۋىپسىزدىگىنە الاڭداۋدىڭ قاجەتى جوق-مىس.

ال، تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين «قازاقستاندا «سبەر» سياقتى اۋقىمدى پلاتفورما جوق ەكەنىن العا تارتىپ، رەسەيدەن دايىن پلاتفورمانى ساتىپ العان ءتيىمدى» دەپ سانايدى.

«بۇل شەشىمگە كەلمەس بۇرىن ءبىز جان-جاقتى زەرتتەۋ جۇرگىزدىك. اسىرەسە، پاندەميا باستالعالى بەرى قاي ەلدىڭ قانداي پلاتفورمانى قولداناتىنىن زەرتتەدىك. راس، مۇنداي تەحنولوگيالار Google, Amazon, Facebook سەكىلدى الپاۋىت كومپانيالاردا بار. الايدا، ولار وزدەرى قولدانىپ جاتقان تەحنولوگيانى ەشكىمگە بەرمەيدى. قىرۋار قاراجاتقا ساتىپ العاننىڭ وزىندە دە اشىق كودتارىن ۇسىنبايدى. اشىق كود ءبىزدىڭ باعدارلاماشىلار ءۇشىن پلاتفورمانى ءارى قاراي جەتىلدىرىپ، دامىتۋ، تەحنيكالىق قىزمەت كورسەتۋ جانە سۇيەمەلدەۋ ءۇشىن اۋاداي قاجەت. ەگەر پلاتفورمانى اشىق كودسىز الاتىن بولساق، ءبىز ولاردىڭ بيزنەس مودەلدەرىنە باعىنىشتى بولىپ قالامىز. ونىڭ ۇستىنە ءاربىر جاڭارتۋ، جەتىلدىرۋ ءۇشىن ءبىز تاعى دا قوسىمشا اقشا تولەۋگە ءماجبۇر بولار ەدىك. ال «سبەر» كومپانياسى بىزگە ءبارىن قولجەتىمدى ەتىپ، پلاتفورمانىڭ بارلىق كومپونەنتتەرىنىڭ باستاپقى كودتارىن كورسەتەدى جانە قازاقستانداعى سەرۆەرلەرگە ورنالاستىرادى. كەلىسىم وسىنداي»، - دەپ ءماميننىڭ ءسوزىن قۇپتاپ پىكىر بىلدىرگەن.

«سبەربانك» بوسنيا مەن گەرتسەگوۆيناداعى (Sberbank BH D.D. Sarajevo جانە Sberbank a.d. Banja Luka), حورۆاتياداعى (Sberbank d.D.), ۆەنگرياداعى (Sberbank Magyarország Zrt.), سەربيا (Sberbank Srbija A.d. Beograd) جانە سلوۆەنياداعى (Sberbank banka d.D.) ەنشىلەس نەسيە ۇيىمدارىن ساتادى. كەلىسىمنىڭ جالپى سوماسى – 500 ميلليون ەۋرو. ولاردىڭ 2020 جىلدىڭ سوڭىندا 162 فيليالى جانە 600 000-عا جۋىق كليەنتتەرى بولعان.

ايجان تەمىرحان

Abai.kz