قازاقستان رەسپۋبليكاسى پارلامەنتى سەناتىنىڭ سپيكەرى ماۋلەن اشىمباەۆ ماسكەۋ قالاسىنا جاساعان جۇمىس ساپارى كەزىندە ماسكەۋ جانە بۇكىل رۋس پاتريارحى كيريللمەن كەزدەستى.

سەنات توراعاسى ورىس پراۆوسلاۆ شىركەۋىنىڭ باسشىسىنا قازاقستان پرەزيدەنتى قاسىم-جومارت توقاەۆتىڭ 2022 جىلعى قىركۇيەكتە وتەتىن الەمدىك جانە ءداستۇرلى دىندەر ليدەرلەرىنىڭ VII سەزىنە شاقىرۋ حاتىن تاپسىردى.

ماۋلەن اشىمباەۆ قازاقستاندىقتار اسا قاسيەتتى پاتريارح كيريللدىڭ الەمدە مورالدىق، ادامگەرشىلىك قۇندىلىقتاردى ىلگەرىلەتۋگە، دىنارالىق ديالوگتى دامىتۋعا، حالىقتار اراسىنداعى بەيبىتشىلىك پەن كەلىسىمدى نىعايتۋعا قوسقان ۇلەسىن جوعارى باعالايتىنىن اتاپ ءوتتى.

كەزدەسۋدە الداعى الەمدىك جانە ءداستۇرلى دىندەر ليدەرلەرىنىڭ سەزىنە دايىندىق بارىسى دا تالقىلاندى.

«وتكەن 18 جىلدىڭ ىشىندە التى سەزد ۇيىمداستىرىلدى. وسى ارالىقتا قازاقستاندىق دىنارالىق فورۋم بەدەلدى جانە بەلگىلى اشىق ديالوگ الاڭىنا اينالدى. وسى مۇمكىندىكتى پايدالانا وتىرىپ، ماسكەۋ پاتريارحاتىنا قازاقستان باستاماسىنا تۇراقتى جانە بەلسەندى قولداۋ ءبىلدىرىپ كەلە جاتقانى ءۇشىن العىسىمىزدى بىلدىرەمىز»، – دەدى ماۋلەن اشىمباەۆ.

سەنات توراعاسى الداعى سەزگە «پاندەميادان كەيىنگى كەزەڭدە ادامزاتتىڭ رۋحاني-الەۋمەتتىك دامۋىنداعى الەمدىك جانە ءداستۇرلى دىندەر ليدەرلەرىنىڭ ءرولى» تاقىرىبى ارقاۋ بولاتىنىن ايتتى. سەنات سپيكەرى جاڭا جاعدايدا قازىرگى زاماننىڭ سىن-قاتەرلەرىنە تويتارىس بەرۋ ءۇشىن بىرلەسىپ ارەكەت ەتۋدىڭ ماڭىزدى ەكەنىن اتاپ ءوتتى.

سۇحبات بارىسىندا تاراپتار قازاقستان مەن رەسەيدىڭ ءوزارا قارىم-قاتىناسىنىڭ ءداستۇرلى جوعارى دەڭگەيىنە نازار اۋداردى.

«ەكى ەلدىڭ ىنتىماقتاستىعىن دامىتۋعا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ ۇلكەن ۇلەس قوستى. قازاقستان پرەزيدەنتى قاسىم-جومارت توقاەۆ وسى ساياسي ساباقتاستىقتى جالعاستىرا وتىرىپ، ەلدەرىمىز اراسىنداعى ءوزارا بايلانىستى ودان ءارى نىعايتۋعا باسا ءمان بەرىپ كەلەدى. قازاقستان پارلامەنتىنىڭ سەناتى ءوز تاراپىنان ەلدەرىمىزدىڭ باسشىلارى قول جەتكىزگەن ۋاعدالاستىقتاردى قۇقىقتىق تۇرعىدان قامتاماسىز ەتىپ، قازاقستان-رەسەي قاتىناستارىن ءارى قاراي دامىتۋ ءۇشىن بارلىق قاجەتتى جاعدايدى جاساۋدا»، – دەدى ماۋلەن اشىمباەۆ.

ءوز كەزەگىندە اسا قاسيەتتى پاتريارح كيريلل قازاقستان پرەزيدەنتىنە سەزگە قاتىسۋعا شاقىرعانى ءۇشىن العىسىن جەتكىزدى.

ورىس پراۆوسلاۆ شىركەۋىنىڭ باسشىسى قازاقستاننىڭ دىنارالىق ديالوگتى جاھاندىق دەڭگەيدە ىلگەرىلەتۋ جۇمىستارىن جوعارى باعالادى. پاتريارح كيريلل قازاقستاننىڭ تۇڭعىش پرەزيدەنتى – ەلباسىنىڭ ەل تاۋەلسىزدىگىن نىعايتۋداعى جانە بەيبىتشىلىك پەن كەلىسىمنىڭ ءتيىمدى ۇلگىسىن قالىپتاستىرۋداعى اسا كورنەكتى ءرولىن ايرىقشا اتاپ ءوتتى. سونداي-اق ول مەملەكەت باسشىسىنىڭ وسى ساياسي ساباقتاستىقتى ساقتاي وتىرىپ، قازىرگى تاڭدا ەلدەگى قوعامدىق كەلىسىمدى ودان ءارى نىعايتۋعا ۇلكەن ۇلەس قوسىپ كەلە جاتقانىنا نازار اۋداردى. ورىس پراۆوسلاۆ شىركەۋىنىڭ باسشىسى قازاقستان مەن رەسەيدىڭ ءوزارا قارىم-قاتىناسىنىڭ جوعارى دەڭگەيىن دە تىلگە تيەك ەتتى. ول رۋحاني ليدەرلەر ەلدەرىمىزدىڭ وداقتاستىق سەرىكتەستىگىن ءارى قاراي نىعايتۋ جانە دامىتۋ ءۇشىن قولدان كەلگەننىڭ ءبارىن جاساۋعا ءتيىس ەكەنىن اتاپ ءوتتى.

كەزدەسۋ سوڭىندا سەنات سپيكەرى قازاقستاننىڭ دىنارالىق ديالوگتى دامىتۋعا قاتىستى باستامالارى ورىس پراۆوسلاۆ شىركەۋىنىڭ قىزمەتىمەن ۇندەسەتىنىن تىلگە تيەك ەتتى. ماۋلەن اشىمباەۆ الداعى ۋاقىتتا دا دىنارالىق ديالوگ پەن كەلىسىمدى حالىقارالىق دەڭگەيدە ىلگەرىلەتۋ بويىنشا ىنتىماقتاسا جۇمىس ىستەۋگە دايىن ەكەنىن جەتكىزدى.

Abai.kz