سەنات سپيكەرى ماۋلەن اشىمباەۆ رەسەي قازاقستاننان اسكەري كومەك سۇرامادى دەپ مالىمدەدى. 24 اقپاندا اقپارات قۇرالدارى سپيكەردەن رەسەي كومەك سۇراسا، قازاقستان ۋكرايناعا اسكەرىن جىبەرە مە دەپ سۇراعان.

– ەكى جاقتى فورمات اياسىندا رەسەي بىزگە قايىرىلعان جوق جانە قايىرىلمايدى دەپ تە ويلايمىن، – دەدى سەنات توراعاسى.

سپيكەر سونىمەن بىرگە قازاقستاندىق بىتىمگەر اسكەردى قاقتىعىس ايماعىنا جىبەرۋ ىقتيمالدىعى تۋرالى سۇراققا جاۋاپ بەردى.

— بۇل تۇرعىدا ءبىزدىڭ ۇستانىمىمىز ايقىن: قازاقستان بۇۇ مانداتىنا ساي ءوز بىتىمگەر اسكەرىن ۇقشۇ ايماعىنان تىس جەرگە جىبەرە الادى. ال ۇقشۇ-نىڭ بىتىمگەر كۇشتەرى ۇيىمعا مۇشە ەلدەردىڭ اۋماعىندا عانا پايدالانىلا الادى. قاقتىعىس ايماعى (ۋكراينا - رەد.) ۇيىمعا مۇشە ەلدەردىڭ تەرريتورياسىنا كىرمەيدى، – دەدى سەنات سپيكەرى.

اشىمباەۆ سونىمەن بىرگە "ەگەر بۇۇ دەڭگەيىندە شەشىم قابىلدانىپ، وزگە ەلدەر ونى قولداسا، بۇۇ مانداتىنا سايكەس قازاقستان بىتىمگەر اسكەرىن الەمنىڭ كەز كەلگەن جەرىنە جىبەرە الادى" دەدى.

ۋكرايناداعى جاعدايعا توقتالعان سەنات سپيكەرى:

– مەنىڭ ويىمشا، بۇل وتە كۇردەلى قاقتىعىس. ءبىز اسكەري تەكەتىرەس، سانكتسيالار سوعىسىنا كۋا بولىپ وتىرمىز، – دەدى ول.

ول بۇعان قوسا، "داعدارىستى ديپلوماتيالىق جولمەن شەشۋگە ءالى دە بولسا مۇمكىندىك" بار دەپ قازاقستان "قاقتىعىستىڭ بەيبىت جولمەن شەشىلۋىنە مۇددەلى" دەدى.

ونىڭ ويىنشا، "تاراپتاردىڭ مۇددەسىن ەسكەرەتىن كەلىسسوزدەر" جۇرگىزىلۋى ءتيىس. سەنات سپيكەرىنىڭ پىكىرىنشە، اتالعان كەلىسسوزدەردى بۇۇ جارعىسى اياسىندا وتكىزۋ تيىمدىرەك.

24 اقپاندا تاڭەرتەڭ رەسەي پرەزيدەنتى ۆلاديمير پۋتين ۋكراينانى "دەميليتاريزاتسيالاۋ" ماقساتىندا دونباستا "اسكەري وپەراتسيا" باستالعانىن حابارلاعان. ءپۋتيننىڭ سوزىنەن كەيىن حاركوۆ، كيەۆ، كراماتورسك قالالارىندا جارىلىس (بۇل قالالار دونباسقا كىرمەيدى) بولعانى جايلى حابار تارادى. ودان بولەك، دونباستا سەپاراتيستەردىڭ اتقىلاۋدى كۇشەيتكەنى حابارلاندى.

Abai.kz