قارجى ءمينيسترى ەرۇلان جاماۋباەۆ ينتەرنەتتە پايدا بولعان ەاەو مەن قىتاي اراسىنداعى تاۋەلسىز حالىقارالىق ۆاليۋتا-قارجى جۇيەسىن قۇرۋ جوباسىن ازىرلەۋ تۋرالى اقپاراتقا قاتىستى پىكىر ءبىلدىردى. 

"مينيسترلىك دەڭگەيىندە مۇنداي ماسەلە كۇن تارتىبىنە قويىلمادى. ەاەو اياسىندا وزەكتى ماسەلەلەر كۇن تارتىبىنە قويىلىپ، تالقىلاناتىن بەلگىلى ءبىر پلاتفورمالار بار. مىسالى، ۆەدومستۆوارالىق ورگاندار، مەملەكەتارالىق ورگاندار. ال مىنا اقپاراق نەگىزسىز», - دەدى جاماۋباەۆ ۇكىمەت وتىرىسىنان كەيىن تىلشىلەرگە جاۋاپ بەرىپ.

مينيستر قازاقستاندىقتاردى جانە باق وكىلدەرىن تەك رەسمي اقپارات كوزدەرىنە سەنۋگە شاقىردى.

"قۇدايعا شۇكىر، بىزدە اقوردانىڭ دا، ۇكىمەتتىڭ دە، مەملەكەتتىك ورگانداردىڭ دا Telegram ارنالارى بار. مەن حالىقتى مۇنداي قاۋەسەتتەرگە بايلانىستى ۇرەيلەنبەۋگە جانە جاعدايدى تاعى ۋشىقتىرماۋعا شاقىرامىن", - دەپ تۇيىندەدى مينيستر.

بۇعان دەيىن باق-تا ەاەو مەن قىتايدىڭ جاڭا ورتاق ۆاليۋتانى ەنگىزۋ كوزدەلىپ وتىرعان تاۋەلسىز حالىقارالىق ۆاليۋتا-قارجى جۇيەسىنىڭ جوباسىن ازىرلەيتىنى تۋرالى اقپارات پايدا بولعان ەدى.

Abai.kz