پرەزيدەنت قاسىم-جومارت توقاەۆ جۋىردا جاريالاعان جولداۋىندا «AMANAT» پارتياسىن وزگەرىستەر كۇتىپ تۇرعانىن ايتقان بولاتىن. ماسەلەن، بيىل مەملەكەت باسشىسىنىڭ ءوزى پارتيا توراعالىعىنان كەتىپ، وڭىرلەردەگى فيليالداردى اكىمدەردىڭ باسقارمايتىنىن مالىمدەدى. جۋرناليست، قوعام بەلسەندىسى قانات اۋەسبايدىڭ ايتۋىنشا، اتالعان رەفورما وڭىرلەردەگى پروبلەمانى جەدەل شەشۋگە، پارتيانىڭ حالىقپەن تىعىز جۇمىس ىستەۋىنە مۇمكىندىك بەرەدى.

«پرەزيدەنتتىڭ باستاماسى – «امانات» پارتياسىن جاڭعىرتۋدىڭ ماڭىزدى ءبولىمى. مەنىڭ ويىمشا بۇل باستاما ۇلكەن پروتسەستىڭ باستالۋىنا سەپ بولادى. بۇل باستاما سوڭعى ەكى جىل بويى پارتيانىڭ ءوز ىشىندە ءتۇرلى تالقىلاۋدان ءوتتى. پارتيا مۇنىڭ جۇمىسقا تەجەۋ بولاتىنىن ءتۇسىندى. اكىمنىڭ توراعا بولۋى ايماقتاردا باقىلاۋدى السىرەتتى، ءماسليحات دەپۋتاتتارىنىڭ قولىن بايلادى. ەندى بۇل كەدەرگى الىنىپ تاستالادى، ياعني پارتيا اكىمدەردىڭ جۇمىسىن قاداعالاپ، ايماقتاردا سايلاۋالدى باعدارلامانىڭ ورىندالۋىن باقىلاۋىندا ۇستاي الادى. ال، اكىمدەردىڭ حالىق الدىنداعى جاۋاپكەرشىلىگى ارتا تۇسەدى»، - دەپ جازدى ق.اۋەسباي ءوزىنىڭ Facebook-پاراقشاسىندا.

ونىڭ پىكىرىنشە، پرەزيدەنتتىڭ بۇل باستاماسى پارتيا مەن جەرگىلىكتى بيلىك اراسىندا شەكارانى بەلگىلەيدى، بۇل وتە ماڭىزدى شەشىم. ويتكەنى ەندى قوردالانعان پروبلەمالار قاعازباستىلىققا سالىنباي-اق، جوعارىدان تاپسىرما كۇتپەي-اق جەرگىلىكتى جەرلەردە دەرەۋ شەشىلەتىن بولادى.
«پارتيا مەن اكىمدەردى ءبىر-بىرىنەن وسىلايشا ءبولۋ ءبىزدى ناقتى قانداي ناتيجەلەرگە الىپ كەلەدى، سول تۋرالى ايتىپ كورەيىن:
- اكىمدەر فيليال توراعاسى رەتىندە تەك نومينالدى فۋنكتسيالاردى عانا اتقارىپ كەلدى. بۇكىل جۇمىستى فيليالدىڭ ءوزى جەرگىلىكتى بيلىككە بايلانباي-اق ورىنداپ كەلدى. پارتيانىڭ ايماقتاعى جۇمىسىنىڭ ءبارىن توراعا ەمەس، ونىڭ ورىنباسارى اتقارىپ كەلدى. سوندىقتان، اكىمدەردىڭ پارتيا توراعالىعىنان كەتۋى ونىڭ جۇمىسىنا ەشقانداي تەرىس اسەرىن تيگىزبەيدى.

- بۇل باستاما اكىمدەرگە ءوزىنىڭ نەگىزگى جۇمىسىمەن عانا اينالىسۋىنا مۇمكىندىك بەرەدى. مەملەكەتتىك جانە پارتيالىق جۇمىستى بايلانىستىرۋ، بىرىكتىرۋ تاجىريبەسى توقتايدى.

- ايماقتىق ساياسي مەنەدجمەنتتىڭ بارىنشا ءتيىمدى جۇيەسى قالىپتاسادى. تاەكەلدەر جويىلىپ، قوسىمشا مۇمكىندىكتەر پايدا بولادى. بۇل تۇرعىدا نازار اۋداراتىن باستى ماسەلە – قاراپايىم حالىقتىڭ سۇراۋىن وتەۋ، پروبلەماسىن شەشۋ.

- ءبىلىمدى، بىلىكتى كادرلار ءۇشىن قوسىمشا الەۋمەتتىك ليفتتەر ازىرلەنەدى. ايماقتارداعى فيليال باسشىلىعىنا جاڭا ەڭبەكقور جاس كادرلار كەلەدى، ولار وبلىس حالقىنىڭ مۇڭ-مۇقتاجىن تىڭداپ، پروبلەماسىن شەشۋگە اتسالىسادى. ءبىز قازىردىڭ وزىندە جاس تالاپشىل مامانداردىڭ پروبلەمانى شەشەتىن ۇسىنىستارىن جاريالاپ جاتقانىن كورىپ وتىرمىز. مەملەكەت باسشىسىنىڭ جولداۋىنان كەيىن جاسوتاندىق بەلسەندىلەر دەرەۋ ستول باسىنا جينالىپ، ايماقتارداعى پروبلەمالاردى شەشۋدىڭ جولدارىن تالقىلادى. بەلگىلى بولعانداي، ول پروبلەمالاردىڭ 90% سول جەرگىلىكتى جەردە ورتالىق اپپاراتتىڭ ارالاسۋىنسىز-اق شەشىلەدى ەكەن.

- قاڭتار وقيعالارى كورسەتكەندەي، ايماقتاردا پروبلەمالار ۇزاق جىلداردان بەرى شەشىلمەي قوردالانا بەرگەن. ەگەر جەرگىلىكتى بيلىك پەن پارتيا بىرىگىپ ارەكەت ەتسە بۇل جاعدايدىڭ الدىن الۋعا بولاتىن ەدى. سوندىقتان قازىر پارتيا ايماقتار بويىنشا ءتيىستى جۇمىستارىن باستاپ جاتىر: پارتيانىڭ اتقارۋشى حاتشىسى اسحات ورالوۆ ونلاين-رەجيمدە بارلىق وڭىردەگى پارتيا اكتيۆىمەن جيىن وتكىزىپ، جولداۋدى جۇزەگە اسىرۋ ماسەلەسىن تالقىلادى.

- حالىق يگىلىگى ءۇشىن پارتيا مەن وبلىس باسشىلىعى اراسىندا جوعارى دەڭگەيدەگى ارىپتەستىك قۇرىلۋدا. ايماقيتارداعى فيليالدار جەلىسىنىڭ ارقاسىندا پارتيا وڭىرلەردەگى پروبلەمانىڭ ءبارىن جانە ولاردى شەشۋ جولدارىن جاقسى بىلەدى»، - دەپ جازدى جۋرناليست.

ايتا كەتەيىك، مەملەكەت باسشىسى قاسىم-جومارت توقاەۆ 16 ناۋرىزدا قازاقستان حالقىنا كەزەكتى جولداۋىن ارناعان بولاتىن. ماڭىزدى قۇجاتتا نەگىزىنەن ساياسي رەفورمالار كوتەرىلگەن. بۇگىن وسى باستامالاردى قولداۋ ماقساتىندا «AMANAT» پارتياسىنىڭ الماتىداعى فيليالى ارنايى ميتينگ وتكىزدى.

Abai.kz