ارينە، ادامنىڭ الاسى ىشىندە: كىمنىڭ ىشىندە قانداي وي، پيعىل جاتقانىن بىلە بەرمەيسىڭ. بىراق، پسيحولوگيادا «فرەيدكە سايكەس بايقاماي ايتىلىپ قالعان ءسوز» دەگەن قۇبىلىس بار. ياعني، ادام ءوزىنىڭ ساناسىنىڭ تەرەڭ تۇكپىرىندەگى، ەلدەن جاسىرىپ جۇرگەن ويىنان سىر بەرىپ قويادى.

كەشە ءدال سونداي وقيعا بولدى.

الدىمەن ۋكرايناعا قارسى سوعىس اشۋىنىڭ سەبەپتەرىن بۇرىن دا ءجيى تىلگە تيەك ەتىپ جۇرگەن رەسەي پرەزيدەنتى پۋتيننەن ءبىر دايەكسوز كەلتىرەيىن (ونى ول ءبىزدىڭ بايقوڭىردىڭ ورنىن الماستىرۋعا ءتيىس رەسەيلىك «ۆوستوچنىي» عارىش ايلاعىنىن قۇرىلىسىنا بارىپ ايتتى): ۋكرايناداعى رەسەيدىڭ ارنايى اسكەري وپەراتسياسىنىڭ ماقساتتارى «ابسوليۋتتىك تۇردە تۇسىنىكتى ءارى يگىلىكتى»، ول دەگەنىڭىز «دونباستاعى ەلگە قول ۇشىن بەرۋ». «سولاي بولادى دا. وعان كۇمان كەلتىرۋدىڭ كەرەگى جوق» دەگەن رەسەيباسى دونباسس تۇرعىندارىن قۇتقارۋمەن قاتار رەسەي ءوز كاۋىپسىزدىگىن قامتاماسىز ەتكىسى كەلەتىنىن دە قوسا جەتكىزدى.

ونىڭ ويىنشا، «ۋكراينانى رەسەيگە قارسى پلاتسدارمعا اينالدىرىپ جاتتى» جانە «وندا بۇرىننان دا بار ۇلتشىلدىقتىڭ وسكىندەرىن باپتاپ، كوبەيتە تۇسكەن». «رەسەيدىڭ ول كۇشتەرمەن قاقتىعىسۋى بولماي قويمايتىن ەدى».

مىنە، بۇكىل دۇنيەجۇزى تارپانىنا ايىپتالىپ، ابدەن قارابەت بولعان رەسەيدىڭ رەسمي تۇسىنىكتەمەسى وسى. ونى بۇرىن دا ەستىپ ءجۇرمىز. كەشە پۋتين ونى تاعى دا شەگەلەپ قويدى.

بىراق، قاراڭىز، ءپۋتيننىڭ ەڭ جاقىن سەرىكتەسى، سىرتقى ىستەر ءمينيسترى لاۆروۆ اقاي جوق، نوقاي جوق، وسى يدەولوگەمانىڭ شىنايى نەگىزىن ايتىپ قالدى. جانە دە، ءبىر بايقاعانىم، ەشبىر باق نە ساراپشى كرەملدىڭ باس ديپلوماتىنىڭ وسى سوزىنە نازار اۋدارماعان سياقتى.

لاۆروۆ «روسسيا 24» تەلەارناسىنا بەرگەن سۇحباتىندا: «ارنايى اسكەري وپەراتسيا اقش پەن ونىڭ وداقتاستارىنىڭ الەمدە باسىمدىققا يە بولۋىنا كەدەرگى جاساۋ ءۇشىن قولعا الىندى»، - دەپ، ايدى اسپانعا ءبىر-اق، شىعاردى.

ياعني، ءبىرى دونباسس حالقىنىڭ مۇددەسىن ءبىرىنشى كەزەككە قويسا، ەكىنشىسى سوعىس باستاعان كرەملدىڭ تۇپكى ماقسات-مۇددەسى ۋكراينادان مىڭداعان شاقىرىمداعى اقش-پەن گەوساياسي تۇرعىدان تايتالاسۋ ەكەنىن جاسىرماي ايتتى!

ۋكراينا قايدا، اقش قايدا؟!

مەنىڭشە، وسىناۋ كەرەعارلىقتىڭ ءوز سەبەپتەرى بار.

بىرىنشىدەن، كرەملدىڭ و باستا (2014 جىلى قىرىمدى اننەكسيالاعان كەزدە) ءۋاج رەتىندە كەلتىرگەن «قانداستارىمىزدى، ورىس ءتىلىن قورعايمىز» دەگەن تۇجىرىمى تۇرلاۋسىز دا تۇراقسىز، ءبىر سوزبەن ايتقاندا، دالباسا بوپ شىقتى! بومبا مەن وق دونباسس پەن لۋگانسك تۇرعىندارىن ۇلتىنا نەمەسە تىلىنە قاراپ بولمەيدى عوي: ەشنارسەگە قاراماي، قىناداي قىرىپ سالادى! رەسەي ەمەس، الەمدىك باق سيۋجەتتەرىنە قاراساڭىز ءدال سولاي بوپ جاتىر ەمەس پە؟!

ەكىنشىدەن، ءوزىنىڭ بليتسكريگى جۇزەگە اسپاعان جانە باتىس سانكتسيالارىنىڭ استىندا قالىپ، ەكونوميكاسى قۇردىمعا بارا جاتقان رەسەي و باستاعى بايلامدارىنان بەزىپ، جاڭا، بولاشاق گااگا سوتىندا ءۋاج رەتىندە كەلتىرىلۋى مۇمكىن دايەكتەر ىزدەي باستاعان ىسپەتتەس. سودان بارىپ، وسىنداي سايكەسسىزدىكتەر تۋىنداۋدا.

ۇشىنشىدەن، پۋتين ىشكى اۋديتورياعا، ياعني رەسەيلىك «ۋرا-پاتريوتتارعا»، ءوزىنىڭ ەلەكتوراتىنا قارايلاسا، لاۆروۆ، ءوز قىزمەتىنە ساي، شەتەل اۋديتورياسىنا كوبىرەك كوڭىل بولەدى. سوندىقتان دا ەكەۋىنىڭ باسىمدىقتارى ەكى ءتۇرلى بوپ تۇر.

تورتىنشىدەن، بۇكىل وركەنيەتتى دۇنيەنى ءوزىن قارسى قويىپ العان پۋتين بۇگىندە سوزدەرىنىڭ ساباقتاستىعى مەن قيسىنى تۋرالى ۇمىتا باستاعان سىڭايلى. تەلەارنادا قاعازعا قاراماي سويلەگەن سوزدەرىندە ەكسپرومت كوبەيىپ بارادى. ەموتسياعا بەرىلىپ قالادى. اشۋ شاقىرادى. ال، ونىڭ ءبارى، سول باياعى فرەيدكە سالساق، السىزدىكتىڭ، ءوز ءىسىنىڭ دۇرىس ەمەستىگىن تۇسىنە باستاۋىنىڭ بىردەن ءبىر سيمپتومى!

مەنىڭشە، تاياۋ ارادا ءبىز الەمدىك ساياسي ساحنانىڭ ەڭ باستى جاعىمسىز كەيىپكەرلەرىنە اينالعان كرەملدىك ترۋپپانىڭ بۇدان دا سوراقى وقىس، ءبىر-بىرىنە قابىسپايتىن سوزدەرى مەني وعاش قيمىل-ارەكەتتەرىن كورەتىن بولامىز.

مۇنى «اگونيا» دەيدى.

ورىستىڭ «چەم دالشە ۆ لەس، تەم بولشە دروۆ» دەگەن ماتەلى بار.

وعان اتام قازاق «قۋىرداقتىڭ كوكەسىن تۇيە سويعاندا كورەرسىڭ»، - دەپ، الدىن-الا بولجام جاساپ تا قويعان!

ءامىرجان قوسان

Abai.kz