ەلباسى وقو ستۋدەنتتەرىنە ءدارىس وقىدى
مەملەكەت باسشىسى نۇرسۇلتان نازارباەۆتىڭ اتىنا م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى ستۋدەنتتەرى اتىنان حات كەلدى، دەپ حابارلايدى اقوردانىڭ ءباسپاسوز قىزمەتى.
مەملەكەت باسشىسى نۇرسۇلتان نازارباەۆتىڭ اتىنا م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى ستۋدەنتتەرى اتىنان حات كەلدى، دەپ حابارلايدى اقوردانىڭ ءباسپاسوز قىزمەتى.
«ءبىز ءسىزدىڭ نازارباەۆ ۋنيۆەرسيتەتىندەگى «قازاقستان ءبىلىم قوعامى جولىندا» اتتى ينتەراكتيۆتى ءدارىسىڭىزدى زور ىقىلاسپەن تىڭداي وتىرىپ، ويىمىزدا جۇرگەن كوپتەگەن سۇراققا تولىقتاي جاۋاپ الدىق. بۇل ءدارىس جاستار ءۇشىن تاعى دا ۇلكەن سەرپىن بەرىپ، كەلەشەككە دەگەن زور سەنىمىمىزدى ۇيالاتتى» دەپ جازادى حات يەلەرى.
ودان ءارى ستۋدەنتتەر ەلباسىنىڭ ينتەراكتيۆتى ءدارىسىنىڭ باستى ەرەكشەلىگى - وتكەندى سارالاي وتىرىپ، قازاقستان حالقى، ونىڭ ىشىندە جاستار، الداعى ۋاقىتتا اتقاراتىن مىندەتتەردى بەلگىلەپ بەرگەنىن اتاپ وتەدى. سونداي-اق ەل دامۋىنىڭ جاڭا كەزەڭى مەن تاۋەلسىزدىكتىڭ ءۇشىنشى ونجىلدىعىنا بەت بۇرعان تۇستا قوعامداعى ەڭ ءىرى الەۋمەتتىك توپ - جاستارعا دەگەن پرەزيدەنتتىڭ سەنىمى مەن قامقورلىعى ولاردى ودان ءارى قاناتتاندىراتىنىنا توقتالعان.
ستۋدەنتتەر جولداعان حاتتا ەلباسى تاپسىرماسىمەن جاستار ساياساتى جاڭا سەرپىن العانى، بۇل ورايدا جاستار اراسىنان جاڭا كاسىپ يەلەرى - مەنەدجەرلەر مەن سپورتشىلاردىڭ جاڭا بۋىنى قالىپتاسىپ كەلە جاتقانى اتاپ وتىلگەن. ولار ءبىلىمدى، تاربيەلى جانە ونەگەلى جاستار دەنى ساۋ ۇلت قالىپتاستىراتىنا سەنىم بىلدىرەدى.
«ءبىز، ستۋدەنت جاستار، تاۋەلسىز ەلىمىزدىڭ وركەندەۋى مەن قارقىندى دامۋى جولىندا مەملەكەت الدىنداعى جاۋاپكەرشىلىگىمىزدى تەرەڭ تۇسىنەمىز. ءبىزدىڭ مىندەتىمىز ايقىن. ەندىگى كەزەكتە ايانباي ەڭبەك ەتىپ، وزات وقۋىمىز بەن العان ءبىلىمىمىزدى ەلىمىزدىڭ ودان ءارى ءوسىپ-وركەندەۋى جولىنا جۇمسايتىنىمىزعا سەندىرەمىز. سىزدەي ەلى سۇيگەن ەلباسىن ءبىز ءاردايىم ماقتان تۇتامىز» دەلىنگەن حاتتا.
