رەسەي مەن ۋكراينا اراسىنداعى سوعىس باستالعالى، كرەمل ءوز اراسىندا جاپپاي تازالاۋ جۇمىستارىن جۇرگىزىپ جاتقانى جايلى اقپاراتتار ءتۇرلى باق كوزدەرىندە جازىلۋدا. 

رەسەيدىڭ ۋكراينا قالالارىن تەز باسىپ الۋ جوسپارى ىسكە اسپادى. اسكەري بليتسكريگ جوسپارى جوسپار كۇيىندە قالدى. كيەۆتى جىلدام الۋ، زەلەنسكيدى تاقتان تايدىرۋ، ۋكراينانى ەو كىرۋ جوسپارىن توقتاتۋ، دەميليتاريزاتسيا مەن دەناتسيفيكاتسيا سىندى ساندىراقتىڭ ءبىرى دە ىسكە اسپادى. الەمدىك رەيتينگتە 2 ورىندا تۇرعان رەسەي اسكەرىنىڭ ساتسىزدىكتەرىن اسكەري ساراپشىلار جاپپاي جازا باستادى. ولا رەسەي اسكەرىنىڭ قۇرامىنداعى جەمقورلىق، ساتقىندىق پەن پاراقورلىق، بارلاۋ قىزمەتىنىڭ بىلىكسىزدىگى جايلى تالداۋلاردى جاريالادى. كوپ ۇزاماي رەسەي بيلىگى "تازالاۋ" جۇمىستارىن باستادى.

Bellingcat كومناداسىنىڭ مۇشەسى حريستو گروزەۆ رەسەي بيلىگى 150 فقك (فسب) قىزمەتكەرىنىڭ جۇمىستان شەتتەتىلگەنى نەمەسە تۇتقىنعا الىنعانى جايلى جازدى. جۋرناليست فقك بەسىنشى قىزمەتىنىڭ گەنەرال-پولكوۆنيگى سەرگەي بەسەدانىڭ تۇتقىندالىپ، قاماۋعا الىنعانىن ءبىرىنشى بولىپ جازعان ەدى. "ولاردىڭ باسىم بولىگى تۇتقىندالماسا دا، فقك جۇمىس ىستەمەيدى. الداعى ۋاقىتتا كوبىرەك اقپارات تاۋىپ، تاراتا باستايمىز", – دەدى جۋرناليست.

رەسەي ۋكراينا سوعىسىنداعى قولباسشىنى الماستىردى. ول ءبىر اي ساتسىزدىكتەن كەيىن گەنەرال الەكساندر دۆورنيكوۆتى قولباسشىلىققا تاعايىندادى. دۆورنيكوۆ ۇزاق ۋاقىت سيريادا اسكەري وپەراتسيانى باسقارعان، ورىس-شەشەن سوعىسىنا قاتىسقان. باتىس ساراپشىلارى ونىڭ قاتىگەزدىگى جايلى جازىپ، مىسال رەتىندە سيريا قالالارىن بومبالاعانىن ايتتى.

ايگىلى Bild باسىلىمى رەسەي بيلىگىندەگى "تازالاۋلار" مەن "سەنىمسىزدىك" جايلى جازدى. قورعانىس ءمينيسترى سەرگەي شويگۋگە قاتىستى بىلاي دەيدى: "سوعىس باستالعان ساتتە رەسەيدىڭ قورعانىس ءمينيسترى سەرگەي شويگۋ حالىق نازارىنان جوعالىپ كەتتى. ونىڭ جۇرەك تالماسىنا ۇشىراپ، ەم العانى جايلى جازىلدى. ارتىنشا پۋتين مەن شويگۋ قاتىسقان ۆيدەوكونفەرەنتسيا ۆيدەوسى جاريالاندى. الايدا شويگۋدىڭ بەينەسى بۇلىڭعىر جانە شىنايى كورىنبەدى. تەك اراعا ءبىر اي سالىپ، 21 ءساۋىر كۇنى شويگۋ مەن پۋتين كەزدەسىپ، ماريۋپول جايلى تالقىلادى. وسىنىڭ بارلىعى ەكى ساياساتكەر اراسىندا قاراما قايشىلىق بولعانىن اڭعارتسا كەرەك" ، - دەپ جازدى.

Bild ناۋرىز ايىندا رەسەي ۇلتتىق گۆاردياسىنىڭ ورىنباسارى رومان گاۆريلوۆ تۇتقىندالعان. الايدا بۇل جايلى باق اقپارات تاراتپادى. ول قۇپيا اقپاراتتى ۋكراينا تاراپىنا بەردى نەمەسە جانارماي ساتتى دەگەن كۇدىكپەن ۇستالعان دەيدى Bild.

رەسەيدەگى ساياسي جانە اسكەري تۇلعالار اراسىنداعى "تازالاۋدان" بولەك، مۇناي-گاز سالاسىنداعى باسشىلىق قىزمەت وكىلدەرى قۇپيا جاعدايدا قازا تابا باستادى. ماسكەۋ قالاسىندا  گازپرومبانكتا ۆيتسە-پرەزيدەنت قىزمەتىن اتقارعان ۆلاديسلاۆ اۆاەۆتىڭ دەنەسى تابىلدى. ونىڭ ايەلى، قىزى جانە ءوزىنىڭ دەنەسىن تۋىستارى تاپقان. تەرگەۋ قىزمەتكەرلەرى اۆاەۆ ايەلى مەن قىزىن ءولتىرىپ، ارتىنشا وزىنە قول جۇمساعان دەگەندى ايتادى.

يسپانيادا "نوۆاتەك" كومپانياسىنىڭ ديرەكتورلار كەڭەسىنىڭ مۇشەسى بولعان سەرگەي پروتوسەننىڭ ايەلى مەن قىزى جانە ءوزىنىڭ دەنەسى تابىلدى. ولاردىڭ قازاسىنا ناقتى نە سەبەپكەر بولعانى بەلگىسىز، الايدا اۆاەۆ ستسەناريى قايتالاندى دەيدي رەسەيلىك باق-تار.

وسىلايشا ەكى بىردەي گاز كومپانياسىنداعى جوعارى لاۋازىم اتقارعان باسشىلاردىڭ كوز جۇمعانى بەلگىلى بولدى. باتىس ساراپشىلارى سوعىستىڭ ۇزاققا سوزىلۋى كرەمل ىشىندەگى تالاس پەن تارتىستى ارتتىرىپ، ءوز ىشىنەن جاۋ ىزدەۋ باستالىپ كەتكەنىنە سەنىمدى.

كا مىرزا

Abai.kz